Exodo 1:1-22
1 Dagitoy ti nagan dagiti annak ni Israel nga immay iti Egipto a kimmuyog ken Jacob, tunggal lalaki nga immay a kadua ti pamiliana:+
2 da Ruben, Simeon, Levi, Juda,+
3 Isacar, Zabulon, Benjamin,
4 Dan, Neftali, Gad, ken Aser.+
5 Ket 70 amin ti annak a nagtaud ken Jacob,* ngem adda idin ni Jose idiay Egipto.+
6 Idi agangay, natay ni Jose,+ ken uray ti amin a kakabsatna ken dayta a henerasion.
7 Nagpartak nga immadu dagiti Israelita* ken nagtultuloyda a pimmigsa iti kasta unay, ket napno ti intero a lugar a pagnanaedanda.+
8 Idi agangay, adda baro nga ari iti Egipto a saan a makaam-ammo ken Jose.
9 Ket kinunana kadagiti umili: “Kitaenyo! Ad-adun ken napigpigsan dagiti Israelita ngem datayo.+
10 Mangaramidtayo iti pamuspusan tapno saanda nga agtultuloy nga umadu. Ta no umaduda latta ket adda mapasamak a gubat, makikaduadanto kadagiti kabusortayo, gubatendatayo, ken panawanda ti nasiontayo.”
11 Isu a nangpilida kadagiti panguluen a mangpilit kadagiti Israelita nga agtrabaho iti nadagsen.+ Isuda ti nangbangon kadagiti siudad ti Pitom ken Raamses+ a pagidulinan ni Faraon kadagiti taraon ken suplay.
12 Ngem bayat a parparigatenda ida, lallalo met nga umad-adu ken agwarwarasda+ isu a nagbuteng unay dagiti Egipcio.
13 Gapu iti dayta, pinarigat ken inadipen ida dagiti Egipcio.+
14 Pinagtrabahoda ida iti nadagsen kas iti panagaramid iti pila a pagsemento ken ladrilio ken pinilitda ida nga agtrabaho iti talon. Awanan asi a pinagtrabaho ken inadipen ida dagiti Egipcio.+
15 Idi agangay, kinasarita ti ari ti Egipto dagiti Hebreo a partera a da Sifra ken Pua,
16 ket kinunana kadakuada: “No paanakenyo+ dagiti Hebreo ket makitayo iti tugaw a paganakan a lalaki ti ipasngayda, patayenyo ti ubing; ngem no babai ti ipasngayda, bay-anyo nga agbiag.”
17 Ngem adda panagbuteng dagiti partera iti pudno a Dios isu a saanda a tinungpal ti bilin ti ari ti Egipto. Binay-anda ketdi nga agbiag dagiti kayyanak nga ubbing a lallaki.+
18 Idi agangay, pinaayaban ti ari ti Egipto dagiti partera ket kinunana kadakuada: “Apay a palpalubosanyo nga agbiag dagiti ubbing a lallaki?”
19 Kinuna dagiti partera ken Faraon: “Naiduma ngamin dagiti Hebreo a babbai kadagiti Egipcio a babbai. Napipigsada ken nakaanakdan sakbay pay nga adda sumangpet a partera.”
20 Gapuna, binendisionan ti Dios dagiti partera; ket nagtultuloy nga immadu dagiti Israelita ken nagbalinda a nakabilbileg.
21 Gapu ta adda panagbuteng dagiti partera iti pudno a Dios, impaayanna ida iti bukodda a pamilia idi agangay.
22 Kamaudiananna, imbilin ni Faraon iti amin nga umili: “Ibellengyo iti Karayan Nilo ti amin nga ubbing a lallaki nga iyanak dagiti Hebreo, ngem pagtalinaedenyo a sibibiag ti amin nga ubbing a babbai.”+
