Exodo 32:1-35
32 Kabayatanna, nadlaw dagiti Israelita a nakabaybayag ni Moises iti bantay+ isu a napanda ken Aaron ket kinunada: “Iyaramidannakami iti dios a mangidalan kadakami,+ ta saanmin nga ammo ti napasamak ken Moises a nangiruar kadakami idiay Egipto.”
2 Kinuna ni Aaron kadagiti lallaki: “Itedyo kaniak dagiti balitok nga aritos+ dagiti assawayo ken annakyo a lallaki ken babbai.”
3 Isu nga inikkat ti amin a tattao dagiti balitok nga aritosda ket intedda ken Aaron.
4 Innala ken linunag ni Aaron dagiti balitokda ket nagusar iti remienta a nangaramid iti estatua* nga urbon a baka.+ Kalpasanna, kinuna dagiti tattao: “Daytoy ti Diosmo, O Israel, a nangipanaw kenka idiay Egipto.”+
5 Idi nakita ni Aaron dayta, nagaramid iti altar iti sango dayta sa impakaammona: “Inton bigat, addanto piesta para ken Jehova.”
6 Kabigatanna, nasapada a bimmangon ken nagidatonda kadagiti daton a mapuoran ken daton a pakikappia. Kalpasanna, nagtugaw dagiti tattao tapno mangan ken uminumda, sa timmakderda tapno agraragsak.+
7 Imbaga ni Jehova ken Moises: “Sumalogkan gapu ta dakesen ti ar-aramiden dagiti kailiam nga inruarmo idiay Egipto.+
8 Nagbiitda a simmukir kadagiti bilinko.+ Nagaramidda iti estatua* nga urbon a baka a pagdaydayawanda. Agrukruknoy ken agidatdatonda iti dayta nga ibagbagada, ‘Daytoy ti Diosmo, O Israel, a nangipanaw kenka idiay Egipto.’”
9 Kinuna ni Jehova ken Moises: “Talaga a nasukir* dagitoy a tattao.+
10 Makapungtotak unay isu a bay-annak a mangpapatay kadakuada amin, ket sika laengen ti piliek a mangpataud iti maysa a dakkel a nasion.”+
11 Impakpakaasi ni Moises ken Jehova a Diosna:+ “O Jehova, apay a makaungetka ket kayatmo nga aramiden ti kasta kadagiti tattaom idinto ta inruarmo ida idiay Egipto babaen ti dakkel a pannakabalinmo ken mannakabalin nga imam?+
12 Apay nga ipalubosmo nga ibaga dagiti Egipcio, ‘Dakes ti panggepna a nangiruar kadakuada. Kayatna a patayen ida iti kabambantayan ken pukawen amin ida iti rabaw ti daga’?+ Pabaawem koma ti pungtotmo ket panunotem manen* ti desisionmo a mangyeg iti daytoy a didigra kadagiti tattaom.
13 Lagipem dagiti adipenmo a da Abraham, Isaac, ken Israel, a nangikariam ken nangibagaam, ‘Paaduekto ti kaputotanyo* kas kadagiti bituen iti langit,+ ket itedkonto iti kaputotanyo* daytoy a daga a pinilik a kukuada iti agnanayon.’”+
14 Pinanunot manen* ni Jehova ti desisionna maipapan iti didigra nga imbagana nga iyegna kadagiti tattaona.+
15 Kalpasanna, simmalog ni Moises iti bantay nga iggemna ti dua a tapi ti Testimonia.+ Nasuratan ti agsumbangir dagiti tapi, iti sango ken likudda.
16 Ti Dios ti nangaramid kadagita a tapi, ken ti Dios a mismo ti nangisurat kadagiti naikitikit kadagita.+
17 Idi nangngeg ni Josue ti ariwawa dagiti tattao gapu iti panagpupukkawda, kinunana ken Moises: “Kasla aggugubat dagiti tattao iti kampo.”
18 Ngem kinuna ni Moises:
“Saan a kanta dayta ti panagballigi,*
Ken saan met a sangit dagiti naabak;
Sabali a kita ti panagkanta ti mangmangngegko.”
19 Apaman a nakaasideg ni Moises iti kampo ken nakitana ti sinan-urbon a baka+ ken dagiti agsasala, nakapungtot unay ket imbarsakna dagiti iggemna a tapi ket naburak dagita iti sakaanan ti bantay.+
20 Innalana ti inaramidda nga estatua, linunagna, ken pinulbosna+ sa inwarakiwakna iti danum ket imbilinna nga inumen dagiti Israelita.+
21 Insaludsod ni Moises ken Aaron: “Ania ti inaramid kenka dagitoy a tattao ta impalubosmo nga agbasolda iti nadagsen?”
22 Insungbat ni Aaron: “Dika koma agung-unget, apo. Ammom met a napigsa ti tarigagayda nga agaramid iti dakes.+
23 Isu nga imbagada kaniak, ‘Iyaramidannakami iti dios a mangidalan kadakami, ta saanmin nga ammo ti napasamak ken Moises a nangiruar kadakami idiay Egipto.’+
24 Isu nga imbagak kadakuada, ‘No adda balitok ti asinoman kadakayo, itedyo ngarud kaniak.’ Linunagko dagita ket inaramidko nga estatua.”
25 Nakita ni Moises a binaybay-an ni Aaron nga aglablabes dagiti tattao, isu a nagbalinda a nakababain iti imatang dagiti bumusbusor kadakuada.
26 Nagtakder ni Moises iti ruangan ti kampo ket kinunana: “Siasino ti sumurot ken Jehova? Umay kaniak!”+ Ket napan kenkuana ti amin a Levita.
27 Kalpasanna, imbagana kadakuada: “Kastoy ti kinuna ni Jehova a Dios ti Israel, ‘Ibarikes ti tunggal maysa kadakayo ti kampilanna, ket sursorenyo ti intero a kampo ket papatayenyo ti kakabsat, kaarruba, ken dagiti nadekket a kakaduayo.’”+
28 Inaramid dagiti Levita ti imbilin ni Moises isu nga agarup 3,000 a lallaki ti napapatay iti dayta nga aldaw.
29 Kinuna ni Moises: “Patibkerenyo ita ti pakinakemyo* para iti panagserbiyo ken Jehova, gapu ta pinatay ti tunggal maysa kadakayo ti mismo nga anak ken kabsatna.+ Ita nga aldaw, bendisionannakayo ti Dios gapu iti inaramidyo.”+
30 Iti simmaganad nga aldaw, kinuna ni Moises kadagiti tattao: “Nakaaramidkayo iti nadagsen a basol, ket ita mapanak agpakaasi ken Jehova bareng no pakawanenna ti basolyo.”+
31 Simmang-at ni Moises iti bantay ket kinunana ken Jehova: “Anian a nagdagsen ti basol nga inaramid dagitoy a tattao! Nagaramidda iti balitok a dios a pagdaydayawanda!+
32 Pakawanem koma ti basolda.+ No saan, punasem laengen ti naganko iti librom.”+
33 Ngem kinuna ni Jehova ken Moises: “Ti laeng nakabasol kaniak ti punasek ti naganna iti librok.
34 Ala, inkan, ket idauluam dagiti tattao a mapan iti lugar nga ibagak kenka. Ibaonkonto ti anghelko iti sanguanam,+ ket iti aldaw nga iyegko ti pannusa, dusaekto ida gapu iti basolda.”
35 Dinusa ngarud ni Jehova dagiti tattao gapu iti estatua nga urbon a baka nga impaaramidda ken Aaron.
Footnotes
^ Wenno “sinukog nga estatua.”
^ Wenno “sinukog nga estatua.”
^ Lit., “natangken ti teltel.”
^ Wenno “pagladingitam.”
^ Lit., “bin-iyo.”
^ Lit., “bin-iyo.”
^ Wenno “Pinagladingitan.”
^ Wenno “naindaklan nga aramid.”
^ Lit., “Kargaanyo ti imayo.”
