Exodo 26:1-37
26 “Mangaramidkayo iti tabernakulo+ nga addaan iti 10 a pessat* ti tela a naabel kadagiti napino a lienso a sinulid, asul a sinulid, purpura a sinulid a delana, ken nalabaga a sinulid. Bordaanyo+ dagita kadagiti kerubin.+
2 Tunggal pessat ti tela ket 28 a kasiko* ti kaatiddogna ken 4 a kasiko ti kaakabana. Agpapada ti rukod ti amin a pessat.+
3 Pagsasaipenyo* ti lima a pessat ti tela. Kasta met ti aramidenyo iti lima a sabali pay a pessat.
4 Ti murdong ti tunggal napagsasaip a tela ket iyaramidanyo kadagiti pagyusokan nga asul a sinulid a pagsilpuandanto.
5 Mangaramidkayo iti 50 a pagyusokan iti murdong ti umuna a napagsasaip a tela ken 50 met a pagyusokan iti murdong ti maikadua a napagsasaip a tela tapno agbabatog ti panagsilpoda.
6 Mangaramidkayo iti 50 a kawit a balitok a mamagsilpo iti dua a napagsasaip a tela para iti tabernakulo.+
7 “Mangaramidkayo met iti 11 a pessat ti tela+ a dutdot ti kalding ti materialesna.+ Dagita ti agbalinto nga abbong ti tabernakulo.
8 Tunggal pessat ti tela ket 30 a kasiko ti kaatiddogna ken 4 a kasiko ti kaakabana. Agpapada ti rukod ti amin a 11 a pessat.
9 Pagsasaipenyo ti lima a pessat ti tela ken kasta met ti aramidenyo iti innem a sabali pay a pessat. Ikupinyo ti maikanem a pessat iti sango ti tolda.
10 Mangaramidkayo met iti 50 a pagyusokan iti murdong ti umuna a napagsasaip a tela ken 50 a pagyusokan iti murdong ti maikadua a napagsasaip a tela tapno agbabatog ti panagsilpoda.
11 Mangaramidkayo iti 50 a kawit a gambang ket ikawityo dagita kadagiti pagyusokan tapno mapagsilpoyo ti dua a napagsasaip a tela kas maysa nga abbong para iti tabernakulo.
12 Ti surok dagiti tela ket maipauy-oy iti sikigan ti tabernakulo. Maipauy-oy met iti likud ti tabernakulo ti kagudua ti pessat a surok ti tela.
13 Maipauy-oy kadagiti sikigan ti tabernakulo ti maysa a kasiko a surok dagiti tela tapno abbonganna dayta.
14 “Iyaramidanyo met ti tabernakulo iti abbong a lalat ti kalakian a karnero ti materialesna sa matinaan iti nalabaga. Iyaramidanyo pay iti maysa nga abbong a lalat ti foka.+
15 “Mangaramidkayo kadagiti hamba*+ a kayo ti akasia a maipatakder iti amin a sikigan ti tabernakulo.+
16 Ti tunggal hamba ket 10 a kasiko ti kangatona ken maysa ket kagudua a kasiko ti kaakabana.
17 Adda dua a pannakasaka ti tunggal hamba. Maisulbong dagita iti dua a pirak a batay. Kasta ti aramidenyo a disenio ti amin a hamba ti tabernakulo.
18 Mangaramidkayo iti 20 a hamba para iti abagatan a sikigan ti tabernakulo.
19 “Mangaramidkayo iti 40 a pirak a batay+ a pakaisulbonganto ti 20 a hamba. Tunggal hamba ket addaan iti dua a pannakasaka ken maisulbong iti dua a pirak a batay. Kasta met la ti aramidenyo iti dadduma pay a hamba.+
20 Mangaramidkayo iti 20 a hamba para iti amianan a sikigan ti tabernakulo,
21 ken 40 a pirak a batay. Tunggal hamba ket maisulbong iti dua a pirak a batay.
22 Mangaramidkayo iti innem a hamba para iti laud a sikigan ti tabernakulo.+
23 Mangaramidkayo met iti dua a hamba a pannakaadigi ti dua a suli ti laud a sikigan ti tabernakulo.
24 Trianggulo ti disenio dagiti hamba. Ti dua a naipatakder a puonda ket agsinnabat iti ngato nga ayan ti umuna a sinansingsing a pagyusokan. Kasta ti maaramid iti dua a pannakaadigi iti suli.
25 Ket masapul nga adda 8 a hamba ken 16 a babassit a pirak a batay. Maisulbong ti tunggal hamba iti dua a pirak a batay.
26 “Mangaramidkayo kadagiti trangka a kayo ti akasia a mamagkakamang kadagiti hamba; lima a trangka para iti maysa a sikigan ti tabernakulo,+
27 lima a trangka para iti maysa pay a sikigan ti tabernakulo, ken lima a trangka para kadagiti hamba iti laud a sikigan.
28 Ti makintengnga a trangka a maikabit kadagiti hamba ket masapul nga aglaylayon manipud maysa nga ungto agingga iti sabali nga ungto.
29 “Kalupkopanyo dagiti hamba iti balitok.+ Aramidenyo dagiti balitok a sinansingsing a pagyusokanda a pangtengngel kadagiti trangka, ken kalupkopanyo dagiti trangka iti balitok.
30 Masapul a maaramid ti tabernakulo maitunos iti plano a naipakitan kenka idiay bantay.+
31 “Mangaramidkayo iti kortina+ a ti materialesna ket asul a sinulid, purpura a sinulid a delana, nalabaga a sinulid, ken napino a lienso a sinulid. Mabordaan dayta kadagiti kerubin.
32 Ikabityo ti kortina iti uppat nga adigi nga akasia a nakalupkopan iti balitok. Masapul a balitok dagiti kawitda. Dagiti adigi ket maisulbong iti uppat a pirak a batay.
33 Ikabityo ti kortina kadagiti pagisab-itan ket ikabilyo ti lakasa ti Testimonia+ iti likudan ti kortina. Ti kortina ket masapul nga adda iti nagbaetan ti Nasantuan+ ken ti Kasasantuan.+
34 Ikabilyo ti kalub iti rabaw ti lakasa ti Testimonia idiay Kasasantuan.
35 “Ikabilyo ti lamisaan iti uneg ti Nasantuan.* Maipuesto ti lamisaan iti amianan a sikigan ti tabernakulo. Ikabilyo met ti kandelero+ iti batog ti lamisaan. Maipuesto ti kandelero iti abagatan a sikigan ti tabernakulo.
36 Ti ruangan ti tolda ket iyaramidanyo iti tabing* a ti materialesna ket asul a sinulid, purpura a sinulid a delana, nalabaga a sinulid, ken napino a lienso a sinulid.+
37 Ti tabing* ket iyaramidanyo iti lima nga adigi nga akasia ken kalupkopanyo dagita iti balitok. Masapul a balitok dagiti kawitda, ken mangaramidkayo iti lima a gambang a batay a pakaisulbongan dagita.
