Exodo 24:1-18

  • Umanamong dagiti tattao a tungpalenda ti tulag (1-11)

  • Ni Moises idiay Bantay Sinai (12-18)

24  Kinuna ni Jehova ken Moises: “Umulikayo iti bantay a kaduam da Aaron, Nadab, Abihu,+ ken ti 70 a panglakayen iti Israel. Inton adayokayo pay, agruknoykayon kaniak.  Siak ni Jehova, sika laeng Moises ti umasideg kaniak. Saan a mabalin nga umasideg dagiti kakaduam ken ti dadduma pay nga Israelita.”+  Kalpasanna, simmalog ni Moises ket impakaammona kadagiti tattao ti amin nga imbaga ni Jehova ken ti amin a pangngeddeng,+ ket sangsangkamaysa a kinunada: “Aramidenmi ti amin nga imbaga ni Jehova.”+  Isu nga insurat ni Moises ti amin nga imbaga ni Jehova.+ Kabigatanna, sinapsapana ti nagriing ket nangaramid iti maysa nga altar iti sakaanan ti bantay ken nangisaad iti 12 a bato a mangirepresentar iti 12 a tribu ti Israel.  Kalpasanna, nangpili ni Moises kadagiti agtutubo a lallaki nga Israelita a mangipaay kadagiti daton a mapuoran ken kalakian a baka kas daton a pakikappia+ ken Jehova.  Inkabil ni Moises kadagiti palanggana ti kagudua ti dara sa inwarsina iti altar.  Ket innalana ti libro ti tulag ken imbasana iti napigsa kadagiti tattao.+ Kinuna dagiti tattao: “Aramidenmi ti amin nga imbilin ni Jehova ken agtulnogkami kenkuana.”+  Innala ni Moises ti dara sa inwarsina kadagiti tattao+ ket kinunana: “Daytoy ti dara ti pannakitulag ni Jehova kadakayo maitunos iti amin a kangkangngegyo a sasao.”+  Simmang-at da Moises, Aaron, Nadab, Abihu, ken ti 70 a panglakayen iti Israel, 10  ket nakitada* ti Dios ti Israel.+ Ti nagbatayan ti sakana ket kasla suelo a naaramid iti safiro ken kas kalawag ti langit.+ 11  Saanna a dinangran dagiti mabigbigbig a lallaki iti Israel,+ ket nakitada ti pudno a Dios babaen ti sirmata bayat a mangmangan ken umin-inumda. 12  Kinuna ni Jehova ken Moises: “Sumang-atka ditoy bantay ken umayka iti ayanko ket agyanka ditoy. Itedko kenka dagiti tapi a bato a pangisuratak kadagiti linteg ken bilin a tungpalen dagiti tattao.”+ 13  Isu a nagrubbuat ni Moises ken ni Josue a katulonganna+ ket simmang-at ni Moises iti bantay ti pudno a Dios.+ 14  Ngem imbagana kadagiti panglakayen: “Urayendakami ditoy agingga nga agsublikami.+ Kaduayo nga agbati da Aaron ken Hur.+ Isuda ti asitgan ti asinoman nga adda kasona.”+ 15  Simmang-at ni Moises iti bantay a nakumotan iti ulep.+ 16  Nagtalinaed ti dayag ni Jehova+ iti Bantay Sinai+ ket innem nga aldaw a kinumotan ti ulep. Iti maikapito nga aldaw, inawaganna ni Moises manipud iti ulep. 17  Iti panagkita dagiti Israelita, ti dayag ni Jehova ket kasla iti mangibus nga apuy iti tapaw ti bantay. 18  Simrek ni Moises iti ulep ken simmang-at iti bantay.+ Nagyan sadiay iti 40 nga aldaw ken 40 a rabii.+

Footnotes

Kaipapananna, “nakitada ti dayag.”