Exodo 21:1-36
21 “Dagitoy a pangngeddeng ti ibagam kadakuada:+
2 “No gumatangka iti adipen a Hebreo,+ agserbinto nga adipenmo iti innem a tawen. Ngem iti maikapito a tawen, mawayawayaanto nga awan bayadanna.+
3 No awan asawana idi nagatang, maymaysananto a pumanaw. No adda asawana idi nagatang, isudanto nga agassawa ti pumanaw.
4 No ikkan ti amona iti asawa ket aganak iti lallaki wenno babbai, kukuanto ti amona ti agiina ket isunanto laeng ti pumanaw.+
5 Ngem no ipilit nga ibaga ti adipen, ‘Ay-ayatek ti amok, ti asawak, ken dagiti annakko; diak kayat ti mawayawayaan ken pumanaw,’+
6 isu ket masapul nga ipan ti amona iti imatang ti pudno a Dios. Kalpasanna, ipidegna ti adipen iti ridaw wenno iti hamba ti ridaw ket tebbenganna, ket agserbinto a kas adipenna iti unos ti panagbiagna.
7 “No ilako ti maysa a tao ti anakna a babai kas adipen, saanto a mawayawayaan a kas iti pannakawayawaya ti adipen a lalaki.
8 No saan a maragsakan ti amona kenkuana ken saanna a pagbalinen a sabali pay nga asawana no di ket ilakona,* saan a mabalin nga ilakona kadagiti ganggannaet, ta di umiso ti panangtratona kenkuana.
9 No iyasawana iti anakna a lalaki, masapul a tratuenna a kas anakna a babai.
10 No mangasawa iti sabali, masapul nga itultuloyna nga ipaayan iti taraon ken bado ti umuna nga asawana a babai, ken makidenna+ latta kenkuana.
11 No saanna nga ipaay kenkuana dagitoy tallo a banag, ti babai ket mawayawayaan nga awan aniaman a bayadanna.
12 “Asinoman a mangkabil iti maysa a tao a pakaigapuan ti ipapatayna, rumbeng met a mapapatay.+
13 Ngem no saanna nga inggagara dayta ket impalubos ti pudno a Dios a mapasamak, isurokto kadakayo ti lugar a mabalin a pagkamanganna.+
14 No makapungtot unay ti maysa iti padana a tao ket igagarana a patayen,+ isu ket rumbeng a mapapatay uray no nagkamang iti altarko.+
15 Rumbeng a mapapatay ti asinoman a mangkabil iti ama wenno inana.+
16 “Asinoman a mangkidnap iti maysa a tao+ ken ilakona wenno matiliwan nga adda iti poderna ti nakidnap,+ isu ket masapul a mapapatay.+
17 “Asinoman a mangilunod ken* ni tatang wenno ni nanangna ket rumbeng a mapapatay.+
18 “Kastoy ti masapul a maaramid no adda agapa ken kinabil ti maysa ti padana a tao babaen ti bato wenno ima* ngem saan a natay no di ket nadangran ken naidalit iti pagiddaan:
19 No makabangon ken makapagnan iti ruar a nakasarukod, saanto a madusa daydiay nangkabil kenkuana. Bayadannanto laeng dagiti aldaw a saan a nakapagtrabaho dayta a tao agingga nga umimbag.
20 “No pang-oren ti maysa a tao ti adipenna a lalaki wenno babai a pakaigapuan ti ipapatayna, isu ket rumbeng a madusa.+
21 Ngem no saan a matay iti uneg ti maysa wenno dua nga aldaw, saan a madusa ti amo, ta ginatangna dayta nga adipenna.
22 “No agkinkinnabil ti dua a tao ket nadangranda ti maysa a masikog ket naganak a saan pay a nadanonan ti aldawna,*+ ngem awan ti natay* kadakuada nga agina, masapul a bayadan ti nakabasol ti multa nga inkeddeng ti asawa ti babai; ken rumbeng a bayadanna dayta maitunos iti desision dagiti hues.+
23 Ngem no matay ti maysa kadagiti agina, rumbeng ngarud a bayadanyo ti biag iti biag,*+
24 mata iti mata, ngipen iti ngipen, ima iti ima, saka iti saka,+
25 sinit iti sinit, sugat iti sugat, dunor iti dunor.
26 “No dangran ti maysa a tao ti mata ti adipenna a lalaki wenno babai ket mabuldingan, rumbeng a wayawayaanna ti adipen a kas pagbayad iti matana.+
27 Ket no napusina ti ngipen ti adipenna a lalaki wenno babai, rumbeng a wayawayaanna ti adipen a kas pagbayad iti ngipenna.
28 “No adda baka a mangsangdo iti maysa a lalaki wenno babai a pakaigapuan ti ipapatayna, rumbeng a maubor ti baka agingga a matay+ ken saan a masida ti karnena; ngem saan a madusa ti makinkukua iti baka.
29 Ngem no kanayon a sumangdo ti maysa a baka ket napakdaaranen ti makinkukua iti dayta ngem dina impupok, ket matay ti maysa a lalaki wenno babai a sinangdona, maubor ti baka ken mapapatay met ti makinkukua.
30 No mapalubosan nga agmulta ti makinkukua iti baka tapno saan a mapapatay, masapul ngarud a bayadanna ti maikalikagum a gatad.
31 No ubing a lalaki wenno babai ti sinangdona, daytoy met laeng a pangngeddeng ti masurot para iti makinkukua iti baka.
32 No maysa nga adipen a lalaki wenno babai ti sinangdo ti baka, agbayad ti makinkukua iti baka iti 30 a siklo* iti amo ti adipen, ket maubor ti baka agingga a matay.
33 “No ikkaten ti maysa a tao ti kalub ti abut, wenno agkali iti abut ket saanna a kaluban, ket adda baka wenno asno a matnag iti dayta,
34 rumbeng nga agbayad ti makinkukua iti abut.+ Rumbeng nga itedna ti bayadna iti makinkukua iti animal, ket kukuanan ti natay nga animal.
35 No adda baka ti maysa a tao a nangdangran iti baka ti sabali pay a tao ket matay dayta, masapul ngarud nga ilakoda ti sibibiag a baka ket pagguduaanda ti naglakuanda; pagguduaanda met ti natay nga animal.
36 Wenno no kanayon a sumangdo ti maysa a baka ngem saan nga impupok ti makinkukua iti dayta, rumbeng a sukatanna ti natay a baka iti sibibiag a baka ket kukuanan ti natay a baka.
