Exodo 8:1-32

  • Maikadua a didigra: dagiti tukak (1-15)

  • Maikatlo a didigra: dagiti sepsep (16-19)

  • Maikapat a didigra: dagiti bingraw (20-32)

    • Saan a naapektaran ti Gosen (22, 23)

8  Kalpasanna, kinuna ni Jehova ken Moises: “Mapanka ken Faraon ket ibagam, ‘Kastoy ti kinuna ni Jehova: “Palubosam dagiti tattaok tapno makapagserbida kaniak.+  No saanmo ida a palubosan, mangyegak kadagiti tukak a mangdidigra iti intero nga Egipto.+  Ket mapnonto iti tukak ti Karayan Nilo. Sumang-at ken sumrekdanto iti balaymo, iti kuartom, iti pagiddaam, kadagiti balay dagiti adipenmo ken tattaom, kadagiti pugonmo, ken kadagiti pagmasmasaam iti tinapay.*+  Arakendakanto dagiti tukak. Arakendanto met dagiti tattaom ken amin nga adipenmo.”’”  Kalpasanna, kinuna ni Jehova ken Moises: “Ibagam ken Aaron, ‘Iyunnatmo ti bastonmo iti rabaw dagiti karayan, dagiti lubnak,* ken dagiti kanal ti Nilo, ket pasang-atem dagiti tukak iti daga ti Egipto.’”  Isu nga inyunnat ni Aaron ti imana iti rabaw ti dandanum ti Egipto, ket simmang-at dagiti tukak ken nagsaknapda iti intero nga Egipto.  Nupay kasta, tinulad dayta dagiti salamangkero a papadi ket pinasang-atda met dagiti tukak iti daga ti Egipto.+  Idi kuan, pinaayaban ni Faraon da Moises ken Aaron ket kinunana: “Ipakaasiyo ken Jehova a dagiti tukak ket ikkatenna kaniak ken kadagiti tattaok,+ ta kayatkon a palubosan dagiti Israelita a pumanaw tapno makapagdatonda ken Jehova.”  Kinuna ni Moises ken Faraon: “Makaammoka a mangibaga no kaano a kiddawek a maikkat dagiti tukak kenka, kadagiti adipenmo, tattaom, ken balbalaymo. Idiayto laengen Karayan Nilo ti pakasarakan kadakuada.” 10  Kinuna ni Faraon: “Inton bigat.” Isu a kinuna ni Moises: “Matungpal ti kiddawmo tapno maammuam nga awanen ti sabali pay a kas ken Jehova a Diosmi.+ 11  Dagiti tukak ket pumanawto kenka, kadagiti balaymo, ad-adipenmo, ken tattaom. Idiayto laengen Karayan Nilo ti pakasarakan kadakuada.”+ 12  Iti kasta, pimmanaw da Moises ken Aaron iti sanguanan ni Faraon, ket impakpakaasi ni Moises ken Jehova nga ikkatenna dagiti tukak nga inyegna ken Faraon.+ 13  Ket pinatgan ni Jehova ti kiddaw ni Moises, isu a natay dagiti tukak kadagiti balay, paraangan, ken taltalon. 14  Binumbunton ti natay a tukak nga inummong dagiti Egipcio, ket bimmangsit ti daga. 15  Nakita ni Faraon nga awanen dagiti tukak, ngem nasukir*+ ket saanna ida nga impangag, kas iti imbaga ni Jehova. 16  Kinuna ni Jehova ken Moises: “Ibagam ken Aaron, ‘Iyunnatmo ti bastonmo ken ibautmo dayta iti tapok ti daga, ket agbalinto a sepsep iti intero nga Egipto.’” 17  Ket inaramidda dayta. Inyunnat ni Aaron ti bastonna ken imbautna iti tapok ti daga, ket kimpet dagiti sepsep kadagiti tattao ken animal. Nagbalin a sepsep ti amin a tapok iti intero nga Egipto.+ 18  Pinadas dagiti salamangkero a papadi a tuladen dayta tapno makapataudda iti sepsep,+ ngem saanda a kabaelan. Amin a tattao ken animal ket kinaptan dagiti sepsep. 19  Isu a dagiti salamangkero a papadi imbagada ken Faraon: “Ramay ti Dios dayta!”+ Ngem nasukir latta ni Faraon, ket saanna ida a pinati, kas iti sinao ni Jehova. 20  Kinuna ni Jehova ken Moises: “Bumangonka a nasapa inton bigat. Asitgam ni Faraon inton mapan iti karayan ket ibagam, ‘Kastoy ti kinuna ni Jehova: “Palubosam dagiti tattaok tapno makapagserbida kaniak. 21  Ngem no saanmo ida a palubosan, mangyegak kadagiti bingraw* a mangdidigra kenka, kadagiti adipenmo, tattaom, ken balbalaymo; ket mapnonto dagiti balay dagiti Egipcio iti bingraw, ken agwarasdanto iti Egipto. 22  Iti dayta nga aldaw, salaknibakto ti Gosen a pagnanaedan dagiti tattaok. Awanto ti bingraw sadiay.+ Gapu iti dayta, maammuamto a siak ni Jehova ken addaak iti intero a daga.+ 23  Naidumanto ti panangtratok kadagiti tattaok iti panangtratok kadagiti umilim. Makitam daytoy a pagilasinan inton bigat.”’” 24  Kasta ti inaramid ni Jehova, isu a rineprep a bingraw ti simrek iti balay ni Faraon, iti balbalay dagiti adipenna, ken iti intero nga Egipto.+ Nadadael ti daga gapu kadagiti bingraw.+ 25  Kamaudiananna, pinaayaban ni Faraon da Moises ken Aaron ket kinunana: “Ditoykayon Egipto nga agdaton iti Diosyo.” 26  Ngem kinuna ni Moises: “Saan a mabalin a ditoy ta kagura dagiti Egipcio ti idatonmi ken Jehova a Diosmi.+ No agdatonkami iti kagura dagiti Egipcio, saandakaminto ngata nga uboren? 27  Agdaliasatkaminto iti tallo nga aldaw a mapan iti let-ang ket agdatonkami idiay ken Jehova a Diosmi kas iti imbagana kadakami.”+ 28  Kinuna ni Faraon: “Sige, inkayo agdaton ken Jehova a Diosyo idiay let-ang. Isuna laeng ta dikay unay umad-adayo. Ikararagandak iti Diosyo.”+ 29  Kinuna ni Moises: “Mapanakon ket agpakaasiak ken Jehova. Inton bigat, pumanawto dagiti bingraw ken Faraon, kadagiti adipenna ken tattaona. Ngem dinakami koma manen allilawen ni Faraon. Palubosam koman dagiti Israelita a mapan agdaton ken Jehova.”+ 30  Kalpasan dayta, pimmanaw ni Moises iti sango ni Faraon ket nagpakaasi ken Jehova.+ 31  Pinatgan ni Jehova ti kiddaw ni Moises isu a pimmanaw dagiti bingraw ken Faraon, kadagiti adipenna, ken kadagiti tattaona. Awan uray maysa a nabati. 32  Ngem nasukir latta ni Faraon ket dina pinalubosan dagiti Israelita.

Footnotes

Wenno “malukongmo.”
Wenno “napitak a kadandanuman.”
Lit., “natangken ti pusona.”
Kita ti ngilaw nga agkagat.