Exodo 33:1-23
33 Kinuna pay ni Jehova ken Moises: “Pumanawkayo iti daytoy a lugar, sika ken dagiti tattao nga inruarmo idiay Egipto. Inkayo iti daga nga inkarik kada Abraham, Isaac, ken Jacob, idi kinunak, ‘Itedkonto daytoy iti kaputotanyo.’*+
2 Mangibaonak iti anghel iti sanguananyo+ ket papanawek dagiti Canaanita, Amoreo, Heteo, Perizeo, Heveo, ken Jebuseo.+
3 Inkayo iti daga a pagay-ayusan ti gatas ken diro.+ Ngem saanak a sumurot kadakayo ta amangan no mapataykayo amin iti dalan+ gapu iti kinasukiryo.”*+
4 Idi nangngeg dagiti tattao dayta a pakdaar, nagladingitda ket awan a pulos kadakuada ti nagalahas.
5 Kinuna ni Jehova ken Moises: “Ibagam kadagiti Israelita, ‘Nasukirkayo.*+ No makikuyogak la ngata kadakayo iti apagbiit, amangan no mapataykayo amin.+ Isu a dikay agalahas bayat a pampanunotek no ania ti aramidek kadakayo.’”
6 Isu a saan a nagalahas dagiti Israelita idi pimmanawda idiay Bantay Horeb.
7 Kalpasanna, inyakar ni Moises ti toldana iti ruar ti kampo, iti medio pangadaywen, ket inawaganna dayta iti tolda a pagkonsultaan. Tunggal maysa nga agkonsulta ken Jehova+ ket mapan iti tolda a pagkonsultaan iti ruar ti kampo.
8 No rummuar ni Moises a mapan iti tolda, tumakder ti amin a tattao iti ruangan ti bukodna a tolda ket kitkitaenda ni Moises agingga a makastrek iti tolda.
9 Apaman a makastrek ni Moises iti tolda, bumaba ti sinan-adigi nga ulep+ ket agtalinaed iti ruangan ti tolda bayat a makisasao ti Dios ken Moises.+
10 No makita dagiti tattao ti sinan-adigi nga ulep iti ruangan ti tolda, agruknoyda amin iti ruangan ti bukodda a tolda.
11 Rupanrupa+ a nakisao ni Jehova ken Moises, kas iti panagtungtong ti dua a tao. No agsubli ni Moises iti kampo, ti agserserbi kenkuana ken katulonganna+ a ni Josue+ nga anak ni Nun ket agtalinaed iti tolda.
12 Kinuna ni Moises ken Jehova: “Ibagbagam kaniak, ‘Idauluam dagitoy a tattao,’ ngem saanmo nga imbaga no siasino ti ibaonmo a kumuyog kaniak. Ken imbagam pay, ‘Am-ammoka unay* ken maragragsakanak kenka.’
13 Pangngaasim, no maragragsakanka kaniak, ipakaammom koma kaniak dagiti dalanmo,+ tapno maam-ammoka ken kanayon a maragsakanka kaniak. Laglagipem met koma a daytoy a nasion ket kukuam.”+
14 Kinunana ken Moises: “Siak a mismo* ti kumuyog kenka+ ket natalgedkanto.”+
15 Insungbat ni Moises: “No sika a mismo ket* saan a kumuyog, ditoykami latta ngaruden.
16 No dika kumuyog kadakami,+ kasano ngarud a maammuan ti sabsabali a maragragsakanka kaniak ken kadagiti tattaom, ken mailasinda a naidumakami kadagiti sabsabali a tattao iti daga?”+
17 Kinuna ni Jehova ken Moises: “Sige, aramidek met daytoy a kiniddawmo gapu ta maragragsakanak kenka ken am-ammoka unay.”*
18 Kinuna ni Moises: “Pangngaasim, ipakitam kaniak ti dayagmo.”
19 Ngem kinuna ti Dios: “Ipakitak kenka ti amin a kinaimbagko, ken iyam-ammok kenka ti naganko a Jehova;+ ket paraburak daydiay paraburak ken kaasiak daydiay kayatko a kaasian.”+
20 Innayonna: “Saan a mabalin a makitam ti rupak, ta matay ti asinoman a tao a makakita kaniak.”
21 Kinuna pay ni Jehova: “Adda lugar iti asidegko. Tumakderka iti rabaw ti dakkel a bato.
22 Inton lumabas ti dayagko, ikabilkanto iti rengngat ti dakkel a bato, ket lingdanka iti imak agingga a makalabasak.
23 Kalpasanna, ikkatekto ti imak ket makitamto ti likudak. Ngem saanmo a makita ti rupak.”+
