Exodo 40:1-38

  • Pannakaibangon ti tabernakulo (1-33)

  • Agraniag ti dayag ni Jehova iti tabernakulo (34-38)

40  Kinuna ni Jehova ken Moises:  “Iti umuna nga aldaw ti umuna a bulan, bangonem ti tabernakulo, ti tolda a pagkonsultaan.+  Ikabilmo ti lakasa ti Testimonia iti unegna,+ ket ibitinmo ti kortina+ a panglinged iti Lakasa.  Iserrekmo ti lamisaan+ ken urnosem dagiti maiparabaw iti dayta ken iserrekmo ti kandelero+ ken sindiam dagiti silawna.+  Kalpasanna, ikabilmo ti balitok nga altar ti insienso+ iti sango ti kortina a nanglinged iti lakasa ti Testimonia sa ibitinmo ti kortina iti ruangan ti tabernakulo.+  “Masapul nga ikabilmo ti altar ti daton a mapuoran+ iti sango ti ruangan ti tabernakulo, ti tolda a pagkonsultaan,  ket ikabilmo ti palanggana iti nagbaetan ti tolda a pagkonsultaan ken ti altar ket kargaam iti danum.+  Kalpasanna, aramidem ti paraangan+ ken ikabilmo ti tabing*+ iti ruangan ti paraangan.  Mangalaka iti nasantuan a lana+ ket warsiam ti tabernakulo ken ti amin nga adda iti dayta,+ ket pagbalinem dayta a nasantuan ken ti amin nga alikamenna. 10  Patedtedam iti nasantuan a lana ti altar ti daton a mapuoran ken ti amin nga alikamen nga adda iti dayta ket pagbalinem ti altar a nasantuan tapno agbalin dayta a kasasantuan nga altar.+ 11  Patedtedam met iti nasantuan a lana ti palanggana ken ti pagbatayanna ket pagbalinem a nasantuan. 12  “Ipanmo ni Aaron ken dagiti annakna iti asideg ti ruangan ti tolda a pagkonsultaan ket ibilinmo nga agdigusda.+ 13  Isuotmo ken Aaron dagiti nasantuan a bado+ sa bukbokam ti ulona iti nasantuan a lana*+ ken pagbalinem a nasantuan, ket agserbinto kaniak kas padi. 14  Kalpasanna, iyasidegmo dagiti annakna ken ikawesmo kadakuada dagiti nagayad a bado.+ 15  Kas iti inaramidmo iti amada, bukbokam ti uloda iti nasantuan a lana+ tapno agserbida kaniak kas papadi. Dayta ti mangipakita nga agtultuloy ti kinapadida iti amin a henerasionda.”+ 16  Inaramid ni Moises ti amin nga imbilin ni Jehova.+ Kasta ti eksakto nga inaramidna. 17  Naibangon ti tabernakulo+ iti umuna nga aldaw ti umuna a bulan ti maikadua a tawen. 18  Idi ibangon ni Moises ti tabernakulo, inkabilna dagiti batay a pagisulbongan,+ implastarna dagiti hamba,+ inyusokna dagiti trangka+ dagiti hamba, sa impatakderna dagiti adigi. 19  Inyukradna ti tela+ iti ngato ti tabernakulo sa imparabawna dagiti abbong,+ kas iti imbilin ni Jehova ken Moises. 20  Kalpasanna, innalana ti Testimonia,+ inkabilna dayta iti uneg ti Lakasa,+ inyusokna dagiti assiw+ iti Lakasa, ken inkabilna ti kalub+ ti Lakasa.+ 21  Inserrekna ti Lakasa iti tabernakulo, inkabitna ti kortina,+ ken liningdanna ti lakasa ti Testimonia+ babaen ti kortina, kas iti imbilin ni Jehova ken Moises. 22  Inserrekna met ti lamisaan+ iti tolda a pagkonsultaan iti amianan a sikigan ti tabernakulo, iti ruar ti kortina, 23  ket inurnosna a pinagtutuon dagiti tinapay+ iti rabaw ti lamisaan iti sanguanan ni Jehova, kas iti imbilin ni Jehova ken Moises. 24  Inserrekna met ti kandelero+ iti uneg ti tolda a pagkonsultaan ket inkabilna iti sango ti lamisaan, iti abagatan a sikigan ti tabernakulo. 25  Sinindianna dagiti lampara+ iti sanguanan ni Jehova, kas iti imbilin ni Jehova ken Moises. 26  Kalpasanna, inserrekna ti balitok nga altar+ iti uneg ti tolda a pagkonsultaan ken impuestona iti sanguanan ti kortina, 27  tapno makapagpaasuk+ iti nabanglo nga insienso+ iti rabawna, kas iti imbilin ni Jehova ken Moises. 28  Kalpasanna, inkabitna ti tabing*+ iti ruangan ti tabernakulo. 29  Ti altar ti daton a mapuoran+ ket inkabilna iti ruangan ti tabernakulo, ti tolda a pagkonsultaan, tapno pagidatonanna iti daton a mapuoran+ wenno daton a bukbukel, kas iti imbilin ni Jehova ken Moises. 30  Kalpasanna, inkabilna ti pagbugguan a palanggana iti nagbaetan ti tolda a pagkonsultaan ken ti altar ket kinargaanna iti danum.+ 31  Dayta ti pangbugguan ni Moises, ni Aaron, ken dagiti annakna kadagiti ima ken sakada. 32  Tunggal sumrekda iti tolda a pagkonsultaan ken no umasidegda iti altar, agbuggoda+ kas iti imbilin ni Jehova ken Moises. 33  Kamaudiananna, inaramidna ti paraangan+ iti aglawlaw ti tabernakulo ken ti altar ken inkabitna ti tabing* iti ruangan ti paraangan.+ Nalpas ni Moises ti trabaho. 34  Adda ulep a nangabbong iti tolda a pagkonsultaan ket nagraniag ti dayag ni Jehova iti tabernakulo.+ 35  Saan a nakastrek ni Moises iti tolda a pagkonsultaan gapu ta nagtalinaed ti ulep iti ngato ti tabernakulo ket nagraniag ti dayag ni Jehova iti tabernakulo.+ 36  No umakar ti ulep manipud iti ngato ti tabernakulo, agrubbuat met nga umakar dagiti Israelita iti pagkampuanda. Kasta ti inar-aramidda iti intero a panagdaliasatda.+ 37  Ngem no saan nga umakar ti ulep, saanda met a pumanaw iti nagkampuanda. Pumanawda laeng no umakar ti ulep.+ 38  Iti aldaw, ti ulep ni Jehova ti makita iti ngatuen ti tabernakulo, ket iti rabii, apuy ti adda iti isu met la a lugar a makita ti amin nga Israelita bayat ti intero a panagdaliasatda.+

Footnotes

Wenno “kortina.”
Wenno “pulotam.”
Wenno “kortina.”
Wenno “kortina.”