Exodo 17:1-16

  • Reklamo maipapan iti kaawan ti danum idiay Horeb (1-4)

  • Danum manipud iti dakkel a bato (5-7)

  • Ti pannakigubat ken pannakaabak dagiti Amalekita (8-16)

17  Pimmanaw ti amin nga Israelita iti let-ang ti Sin.+ Kas imbilin ni Jehova,+ nagakar-akarda iti nagduduma a lugar ket nagkampoda idiay Refidim.+ Ngem awan ti nasarakanda idiay a danum nga inumen dagiti tattao.  Isu a nakiriri dagiti tattao ken Moises+ nga ibagbagada: “Ikkannakami iti inumenmi.” Ngem kinuna ni Moises: “Apay a rirririendak? Apay a subsubokenyo ni Jehova?”+  Ngem mawaw unay dagiti tattao isu a dida simmardeng a nagtanabutob maibusor ken Moises,+ nga ibagbagada: “Apay ngamin nga inruarnakami idiay Egipto? Tapno patayennakami iti waw, agraman dagiti annakmi ken tarakenmi?”  Impakpakaasi ni Moises ken Jehova: “Ania ti aramidek kadagitoy a tattao? Dandanidakon uboren!”  Kinuna ni Jehova ken Moises: “Itugotmo ti bastonmo nga inyunnatmo iti Karayan Nilo+ ken mangpilika iti sumagmamano a panglakayen iti Israel. Ikuyogmo ida ket umun-unakayo a magna.  Agtakderakto iti sangoyo iti dakkel a bato idiay Horeb. Ibautmo ti bastonmo iti dayta a bato, ket addanto rummuar a danum nga inumen dagiti tattao.”+ Kasta ti inaramid ni Moises iti imatang dagiti panglakayen iti Israel.  Massa*+ ken Meriba*+ ti impanagan ni Moises iti dayta a lugar gapu iti pannakiriri dagiti Israelita ken gapu ta sinubokda ni Jehova+ nga ibagbagada, “Adda kadi ni Jehova kadatayo wenno awan?”  Kalpasanna, immay rimmaut dagiti Amalekita+ ket ginubatda dagiti Israelita idiay Refidim.+  Gapu iti dayta, kinuna ni Moises ken Josue:+ “Mangpilika kadagiti lallaki a kaduam a makigubat kadagiti Amalekita. Inton bigat, agtakderakto iti rabaw ti turod ken iggamakto ti baston ti pudno a Dios.” 10  Inaramid ni Josue ti eksakto nga imbilin ni Moises,+ ket nakigubat kadagiti Amalekita. Simmang-at da Moises, Aaron, ken Hur+ iti rabaw ti turod. 11  No nakangato latta dagiti ima ni Moises, mangabak dagiti Israelita, ngem no ibabana, mangabak dagiti Amalekita. 12  Idi maktanganen dagiti ima ni Moises, nangalada iti bato a pagtugawanna. Sa inngato da Aaron ken Hur dagiti imana tapno saan a maktangan agingga a limnek ti init. 13  Gapu iti dayta, pinapatay ni Josue dagiti Amalekita ken ti kakaduada babaen ti espada.+ 14  Kinuna ni Jehova ken Moises: “Isuratmo daytoy iti libro kas pakalaglagipan ket ibagam manen ken Josue, ‘Pukawek a mamimpinsan dagiti Amalekita iti baba ti langit, ket awanton a pulos ti pakalaglagipan kadakuada.’”+ 15  Nangaramid ni Moises iti maysa nga altar ken pinanagananna iti Jehova-nissi.* 16  Kinunana: “Gapu ta binusor dagiti Amalekita ti turay ni Jah,+ gubatento ida ni Jehova agingga nga awan matedda kadakuada.”+

Footnotes

Kaipapananna, “Panangsubok.”
Kaipapananna, “Panagaapa.”
Kaipapananna, “Ni Jehova ti Pagilasinan a Postek.”