Exodo 7:1-25

  • Pabilgen ni Jehova ni Moises  (1-7)

  • Agbalin a dakkel nga uleg ti baston ni Aaron (8-13)

  • Umuna a didigra: nagbalin a dara ti danum (14-25)

7  Kinuna ni Jehova ken Moises: “Pinagbalinka a kas Dios* ken Faraon, ket ti kabsatmo a ni Aaron ti agbalinto a propetam.+  Ulitemto nga ibaga ti amin nga ibilinko kenka, ket ti kabsatmo a ni Aaron ti makisaritanto ken Faraon, ket palubosannanto dagiti Israelita a pumanaw iti Egipto.  Ipaluboskonto a sumukir ni Faraon+ ket agaramidakto iti adu a pagilasinan ken milagro iti Egipto.+  Ngem saannakayto a patien ni Faraon isu nga ipakitakto ti pannakabalinko iti Egipto ken iruarko sadiay dagiti tattaok* nga Israelita, ket dusaekto iti nakaro dagiti Egipcio.+  Sigurado a maammuanto dagiti Egipcio no asino ni Jehova+ inton dusaek ti Egipto ken iruarko dagiti Israelita iti tengngada.”  Inaramid da Moises ken Aaron ti imbilin ni Jehova. Kasta ti eksakto nga inaramidda.  Agtawen ni Moises iti 80 ken ni Aaron iti 83 idi nakisaritada ken Faraon.+  Kinuna ni Jehova kada Moises ken Aaron:  “No ibaga ni Faraon, ‘Mangaramidkayo iti milagro,’ ibagamto ken Aaron, ‘Alaem ti bastonmo ket ipuruakmo iti sango ni Faraon.’ Agbalinto a dakkel nga uleg.”+ 10  Isu a napan da Moises ken Aaron iti ayan ni Faraon ket inaramidda ti kas iti imbilin ni Jehova. Impuruak ni Aaron ti bastonna iti sango ni Faraon ken dagiti adipenna ket nagbalin dayta a dakkel nga uleg. 11  Ngem pinaayaban ni Faraon dagiti masirib a tattao ken dagiti mangkukulam, ket kasta met ti inaramid dagiti salamangkero a papadi iti Egipto babaen kadagiti salamangkada.*+ 12  Impuruakda dagiti bastonda ket nagbalin a dadakkel nga uleg; ngem ti baston ni Aaron inalun-onna amin a bastonda. 13  Ngem kas iti imbaga ni Jehova, nasukir latta ni Faraon+ ket saanna ida a pinati. 14  Kalpasanna, kinuna ni Jehova ken Moises: “Natangken ti puso ni Faraon.+ Dina kayat a palubosan dagiti Israelita. 15  Inton bigat, aramidem daytoy: Inton mapan ni Faraon iti Karayan Nilo, sabatem iti igid ti karayan ket itugotmo ti bastonmo a nagbalin nga uleg.+ 16  Ket ibagam kenkuana, ‘Imbaonnak ni Jehova a Dios dagiti Hebreo+ a mangibaga kenka: “Palubosam a pumanaw dagiti tattaok tapno mapanda agserbi kaniak idiay let-ang,” ngem agingga ita, saanka a nagtulnog. 17  Kastoy ti kinuna ni Jehova: “Maammuam ita a siak ni Jehova+ inton agbalin a dara ti Karayan Nilo apaman nga iyablatko ti bastonko iti danum. 18  Matayto dagiti lames iti Karayan Nilo, ket bumangsitto ti karayan ket saanto a maitured dagiti Egipcio nga inumen ti danumna.”’” 19  Kinuna ni Jehova ken Moises: “Ibagam ken Aaron, ‘Alaem ti bastonmo ket iyunnatmo ta imam iti rabaw dagiti danum ti Egipto,+ dagiti karayanna, dadakkel a kanalna,* lubnakna,*+ ken amin a pagurnonganna iti danum, tapno agbalinda a dara.’ Addanto dara iti intero nga Egipto, uray kadagiti kayo ken burnay a pagkargaan iti danum.” 20  Dagus nga inaramid da Moises ken Aaron ti imbilin ni Jehova. Inyablat ni Aaron ti bastonna iti danum ti Karayan Nilo iti sango ni Faraon ken dagiti adipenna, ket nagbalin a dara ti amin a danum iti karayan.+ 21  Natay dagiti lames nga adda iti karayan,+ ket bimmangsit ti karayan. Saan a nairusok dagiti Egipcio nga inumen ti danum ti karayan,+ ket adda idi dara iti intero nga Egipto. 22  Nupay kasta, tinulad dayta dagiti salamangkero a papadi iti Egipto,+ isu a nasukir latta ni Faraon ken saan a namati kadakuada, kas iti imbaga ni Jehova.+ 23  Nagawid ket saanna nga inkaskaso dayta. 24  Isu a nagkali ti amin nga Egipcio iti aglawlaw ti Karayan Nilo tapno adda pagalaanda iti inumenda, ta dida mainum ti amin a danum nga aggapu iti Nilo. 25  Pito nga aldaw a pinagbalin ni Jehova a dara ti Karayan Nilo.

Footnotes

Lit., “Inaramidka a Dios.”
Lit., “armadak.”
Wenno “arte ti panagsalamangkada.”
Kayatna a sawen, dagiti kanal manipud iti Nilo.
Wenno “napitak a kadandanumanna.”