Exodo 31:1-18
31 Intuloy a kinuna ni Jehova ken Moises:
2 “Pinilik* ni Bezalel+ nga anak ni Uri ken apoko ni Hur iti tribu ni Juda.+
3 Ikkakto iti espirituk* tapno maaddaan iti sirib, pannakaawat, pannakaammo, ken kinasigo iti amin a kita ti trabaho,
4 iti panagdisenio, iti panagsukog iti balitok, pirak, ken gambang,
5 iti panagtabas ken panagimontar kadagiti napateg a bato,+ ken iti panagaramid iti amin a kita ti alikamen a kayo.+
6 Pinilik met a tumulong kenkuana ni Oholiab+ nga anak ni Ahisamac iti tribu ni Dan. Ipaayak met iti sirib ti amin a nalaing a trabahador* tapno maaramidda ti amin nga imbilinko kenka:+
7 ti tolda a pagkonsultaan,+ ti lakasa ti Testimonia+ ken ti kalubna,+ ti amin nga alikamen ti tolda,
8 ti lamisaan+ ken dagiti alikamenna, ti kandelero a puro a balitok ken amin nga alikamenna,+ ti altar ti insienso,+
9 ti altar ti daton a mapuoran+ ken amin nga alikamenna, ti palanggana ken ti pagbatayanna,+
10 dagiti napintas a naabel a bado, dagiti nasantuan a bado ni Aaron a padi, dagiti bado ti annakna nga agserbi kas papadi,+
11 ti nasantuan a lana, ken ti nabanglo nga insienso para iti santuario.+ Aramidendanto ti amin nga imbilinko kenka.”
12 Kinuna pay ni Jehova ken Moises:
13 “Ibagam kadagiti Israelita, ‘Masapul a ngilinenyo dagiti sabbathko,+ ta pagilasinan dayta kaniak ken kadakayo. Dayta a pagilasinan ti mangipalagip iti amin a henerasionyo a siak ni Jehova, ti namagbalin kadakayo a nasantuan.
14 Masapul a ngilinenyo ti Sabbath ta nasantuan dayta kadakayo.+ Mapapatay ti asinoman a saan nga agtungpal iti dayta a bilin. Asinoman nga agtrabaho iti dayta nga aldaw ket mapapatay.+
15 Mabalinyo ti agtrabaho iti innem nga aldaw, ngem ti maikapito nga aldaw ket espesial nga aldaw ti panaginana.+ Nasantuan dayta ken Jehova. Mapapatay ti asinoman nga agtrabaho iti aldaw ti Sabbath.
16 Masapul a ngilinen dagiti Israelita ti Sabbath iti amin a henerasionda. Agnanayon a tulag dayta.
17 Isu a ti Sabbath ket agnanayon a pagilasinan iti tulaganmi kadagiti Israelita,+ ta innem nga aldaw nga inaramid ni Jehova ti langit ken ti daga ken naginana iti maikapito nga aldaw ket naragsakan.’”+
18 Idi nalpasen a nakisarita ti Dios ken ni Moises idiay Bantay Sinai, intedna kenkuana ti Testimonia,+ ti dua a tapi a bato a naglaon kadagiti bilin nga insurat ti ramay ti Dios.+
