Exodo 30:1-38

  • Altar ti insienso (1-10)

  • Sensus ken kuarta a pangsubbot (11-16)

  • Gambang a palanggana a pagbugguan (17-21)

  • Espesial a templa ti nasantuan a lana (22-33)

  • Pormula ti nasantuan nga insienso (34-38)

30  “Mangaramidka iti altar a kayo ti akasia+ a pagpuoran iti insienso.+  Masapul a kuadrado dayta, maysa a kasiko* ti kaatiddogna, maysa a kasiko ti kaakabana, ken dua a kasiko ti kangatona. Dagiti sarana ket paset a mismo ti altar.+  Kalupkopam iti puro a balitok: ti rabawna, ti amin a sikiganna, ken dagiti sarana; ket mangaramidka iti balitok a dekorasion iti aglawlawna.  Mangaramidka met iti dua a sinansingsing a pagyusokan a balitok iti baba ti dekorasionna iti agsumbangir a sikiganna, a pakayusokan dagiti assiw a pangawit iti altar.  Mangaramidka kadagiti assiw a kayo ti akasia ket kalupkopam iti balitok.  Ti altar ket ikabilmo sakbay ti kortina nga asideg ti lakasa ti Testimonia+ ken ti kalubna, a pagparangakto kenka.+  “Tunggal bigat, no mapan isagana ni Aaron+ dagiti lampara,+ masapul nga agpuor iti nabanglo nga insienso+ iti rabaw ti altar+ ket pagasukenna dayta.  No sindian ni Aaron dagiti lampara sakbay a sumipnget kalpasan a lumnek ti init,* mangpuor manen iti insienso. Maysa dayta a daton nga insienso iti sanguanan ni Jehova. Kasta ti kanayon nga aramidenyo iti amin a henerasionyo.  Diyo pagdatonan ti altar iti saan a mayanatup nga insienso+ wenno daton a mapuoran wenno daton a bukbukel, ken diyo bukbokan iti daton nga inumen. 10  Maminsan iti kada tawen,+ masapul a mangala ni Aaron iti dara ti animal manipud iti daton gapu iti basol+ ket ikabilna dayta kadagiti sara ti altar tapno nadalus ti altar. Tinawen nga aramidenna dayta iti amin a henerasionyo. Kasasantuan dayta para ken Jehova.” 11  Kinuna pay ni Jehova ken Moises: 12  “Kada bilangem dagiti annak ni Israel,+ tunggal maysa ket masapul a mangted ken Jehova iti pangsubbot iti biagna* iti tiempo ti sensus, tapno awan ti dumteng a didigra kadakuada no mairehistroda. 13  Daytoy ti ited ti amin a mairehistro: kagudua a siklo* sigun iti siklo a maus-usar iti nasantuan a disso.*+ Ti maysa a siklo ket 20 a gera,* isu a kagudua a siklo ti kontribusion para ken Jehova.+ 14  Amin a mairehistro nga agtawen iti 20 ken agpangato ket mangted iti kontribusion para ken Jehova.+ 15  Saan koma a mangted dagiti nabaknang iti ad-adu ngem iti kagudua a siklo, ken saan met koma a mangted dagiti napanglaw iti basbassit ngem iti dayta, kas kontribusion para ken Jehova a pangsubbot iti biagyo. 16  Alaem kadagiti Israelita ti kontribusionda a kuarta a pirak. Itedmo dayta a pangsuporta iti serbisio a maar-aramid iti tolda a pagkonsultaan. Dayta a kuarta ket agserbi kas pakalaglagipan iti sanguanan ni Jehova para kadagiti Israelita, a pangsubbot iti biagyo.” 17  Imbaga pay ni Jehova ken Moises: 18  “Mangaramidka iti gambang a palanggana a pagbugguan ken pagbatayanna.+ Ikabilmo dayta iti nagbaetan ti tolda a pagkonsultaan ken ti altar, ket kargaam iti danum.+ 19  Dita ti pangbugguan ni Aaron ken dagiti annakna kadagiti ima ken sakada.+ 20  No sumrekda iti tolda a pagkonsultaan wenno umasidegda iti altar tapno agserbida ken tapno puoranda dagiti maidaton ken Jehova, agbuggoda iti danum tapno saanda a matay. 21  Masapul a bugguanda dagiti ima ken sakada tapno saanda a matay. Permanente dayta a paglintegan a masapul a tungpalenda, isu ken dagiti annakna, ken ti amin a henerasionda.”+ 22  Intuloy ni Jehova nga imbaga ken Moises: 23  “Mangalaka kadagiti kasayaatan a bangbanglo: 500 a sukat* ti timmangken a mirra, ken kagudua dayta, 250 a sukat* ti nasam-it a kanela, 250 a sukat* ti nasam-it a kalamo, 24  ken 500 a sukat* ti kasia, ken maysa a hin* ti lana ti olibo, sigun iti siklo a maus-usar iti nasantuan a disso.*+ 25  Dagita ti usarem a mangaramid iti nasantuan a lana a pangdutok; masapul a nasayaat ti panaglalaokda.*+ Dayta ti agbalin a nasantuan a lana a pangdutok. 26  “Warsiam iti nasantuan a lana ti tolda a pagkonsultaan+ ken ti lakasa ti Testimonia, 27  ti lamisaan ken ti amin nga alikamenna, ti kandelero ken dagiti alikamenna, ti altar ti insienso, 28  ti altar ti daton a mapuoran ken ti amin nga alikamenna, ken ti palanggana ken ti pagbatayanna. 29  Masapul nga ilasinmo dagita tapno agbalinda a kasasantuan.+ Masapul a nasantuan ti asinoman a mangsagid kadagita.+ 30  Bukbokam iti lana ti ulo* ni Aaron+ ken dagiti annakna+ ken pagbalinem ida a nasantuan iti panagserbida kaniak kas papadi.+ 31  “Ibagam kadagiti Israelita, ‘Daytoy ti agtultuloy a mausar a pangdutok a nasantuan a lanak iti amin a henerasionyo.+ 32  Saan a mabalin a mayapros iti kudil ti tao, ken dikay mangaramid iti lana a kas iti dayta. Nasantuan a banag dayta ken kanayon nga ibilangyo a nasantuan. 33  Masapul a mapapatay ti asinoman a mangaramid iti sapsapo a kas iti dayta ken mangikabil iti dayta iti saan nga autorisado.’”*+ 34  Kinuna ni Jehova ken Moises: “Mangalaka iti agpapada a kaadu dagitoy a bangbanglo:+ estakte, onicha, napabanglo a galbanum, ken puro nga olibano. Rumbeng nga agpapada ti kaadu ti tunggal maysa. 35  Dagita ti aramidem nga insienso;+ masapul a napaglalaok a naimbag dagita,* naasinan,+ puro, ken nasantuan. 36  Mangdekdekka iti dadduma iti dayta tapno agbalin a napino a pulbos ket ikabilmo ti dadduma iti sango ti Testimonia iti tolda a pagkonsultaan a pagparangakto kenka. Rumbeng a kasasantuan dayta kadakayo. 37  Saankayo a mangaramid iti kasta nga insienso para iti bagiyo.+ Masapul nga ibilangyo dayta a nasantuan para ken Jehova. 38  Asinoman a mangaramid iti kasta tapno usarenna a bangbanglo ket masapul a mapapatay.”

Footnotes

Ti 1 kasiko ket 44.5 cm. Kitaem ti App. B14.
Lit., “iti nagbaetan ti dua a rabii.”
Wenno “kararuana.”
Ti 1 siklo ket 11.4 g. Kitaem ti App. B14.
Wenno “babaen ti nasantuan a siklo.”
Ti 1 gera ket 0.57 g. Kitaem ti App. B14.
Wenno “innem a kilo.”
Wenno “tallo a kilo.”
Wenno “tallo a kilo.”
Wenno “innem a kilo.”
Ti 1 hin ket 3.67 L. Kitaem ti App. B14.
Wenno “babaen ti nasantuan a siklo.”
Wenno “kas iti ar-aramiden ti agar-aramid iti sapsapo.”
Wenno “Pulotam.”
Lit., “iti estranghero,” kayatna a sawen, saan a miembro ti pamilia ni Aaron.
Wenno “kas iti ar-aramiden ti agar-aramid iti sapsapo.”