Exodo 11:1-10

  • Naipakaammo ti maika-10 a didigra (1-10)

    • Dawatan dagiti Israelita dagiti Egipcio (2)

11  Kinuna ni Jehova ken Moises: “Adda pay maysa a didigra nga iyegko ken Faraon ken iti Egipto. Kalpasanna, palubosannakayon a pumanaw.+ Inton palubosannakayo, sigurado a papanawennakayo amin.+  Ibagam itan iti amin a lallaki ken babbai a dawatanda dagiti kaarrubada iti bambanag a pirak ken balitok.”+  Ket tinignay ni Jehova dagiti Egipcio a mangted a sipaparabur kadagiti tattaona. Maysa pay, ni Moises ket raraemen unay dagiti adipen ni Faraon ken dagiti Egipcio.  Kinuna ni Moises: “Kastoy ti kinuna ni Jehova, ‘Inton tumengnga ti rabii, sursorekto ti Egipto,+  ket matayto ti amin nga inauna iti intero nga Egipto:+ ti inauna nga anak ti agturturay a ni Faraon agingga iti inauna nga anak ti adipen a babai a paragiling, ken ti tunggal inauna nga anak dagiti taraken nga animal.+  Iti intero nga Egipto, addanto nakaro a panagsasangit a di pay pulos napasamak ken dinton mapasamak.+  Ngem awanto ti uray maysa nga aso a mangtaul* kadagiti Israelita wenno kadagiti tarakenda nga animal, tapno maammuanyo nga agduma ti panangtrato ni Jehova kadagiti Egipcio ken kadagiti Israelita.’+  Sigurado nga umayto kaniak ti amin nga adipenmo ken agruknoyda kaniak nga ibagbagada, ‘Pumanawka ken ti amin a tattao a sumurot kenka.’+ Kalpasanna, pumanawakto.” Makapungpungtot pay laeng ni Moises idi pimmanaw iti sanguanan ni Faraon.  Kalpasanna, imbaga ni Jehova ken Moises: “Saannakanto a denggen ni Faraon.+ Gapu iti dayta, ad-adu pay a milagro ti aramidek iti Egipto.”+ 10  Inaramid da Moises ken Aaron amin dagitoy a milagro iti sanguanan ni Faraon,+ ngem impalubos ni Jehova a sumukir ni Faraon, isu a saanna latta a pinalubosan dagiti Israelita a pumanaw iti daga a pagturayanna.+

Footnotes

Lit., “mangpatadem iti dilana.”