Exodo 34:1-35

  • Naisagana dagiti baro a tapi a bato (1-4)

  • Makita ni Moises ti dayag ni Jehova (5-9)

  • Naulit dagiti detalye maipapan iti tulag (10-28)

  • Agranraniag ti rupa ni Moises (29-35)

34  Kinuna ni Jehova ken Moises: “Mangaramidka iti dua a tapi a bato a kas kadagiti immuna,+ ket isuratkonto kadagita ti linaon dagiti tapi+ a binurakmo.+  Agsaganaka a sumang-at inton bigat idiay Bantay Sinai ket agtakderka iti sanguanak iti tapaw ti bantay.+  Masapul a sika laeng ti sumang-at, ken awan koma ti sabali a mapan iti bantay. Awan met koma ti animal a mapan agarab iti sakaanan ti bantay.”+  Isu a nangaramid ni Moises iti dua a tapi a bato a kas kadagiti immuna ken bimmangon a nasapa iti bigat. Kas imbilin ni Jehova, simmang-at iti Bantay Sinai nga iggemna ti dua a tapi a bato.  Bimmaba ni Jehova+ iti ulep ket nagtakder iti asideg ni Moises ken impakaammona ti nagan a Jehova.+  Ibagbaga ni Jehova bayat a lumablabas idi iti sango ni Moises: “Ni Jehova, ni Jehova, maysa a Dios a naasi+ ken mannakipagrikna,*+ nabannayat nga agpungtot+ ken dakkel ti napudno nga ayatna+ ken kanayon a tungpalenna ti saona,+  mangipakpakita iti napudno nga ayat kadagiti rinibu,+ mangpakpakawan kadagiti kamali, biddut, ken basol,+ ngem sigurado a dusaenna dagiti nakabasol.+ Dusaenna dagiti annak, appoko, ken appoko iti tumeng gapu iti kamali dagiti amma.”+  Dagus a nagrukob ken nagruknoy ni Moises.  Kalpasanna kinunana: “O Jehova, no agpayso a maragragsakanka kaniak, pangngaasim, Jehova, ta kumuyogka koma kadakami,+ uray no nasukirkami.*+ Pakawanem kadi dagiti kamali ken basolmi,+ ken awatennakami kas tattaom.” 10  Simmungbat ni Jehova: “Makitulagak kadakayo: Iti sanguananyo amin, mangaramidakto kadagiti nakaskasdaaw a bambanag a saan pay a pulos napasamak ditoy daga wenno iti aniaman a nasion.+ Makitanto ti amin a tattao dagiti aramidko, ta nakaskasdaaw ti ar-aramidek kadakayo.+ 11  “Tungpalenyo dagiti bilinko ita nga aldaw.+ Pagtalawek iti sanguananyo dagiti Amoreo, Canaanita, Heteo, Perizeo, Heveo, ken Jebuseo.+ 12  Dikay makitultulag kadagiti agnanaed iti daga a papananyo,+ di la ket ta dayta ti pakadadaelanyo.+ 13  Rakrakenyo ketdi dagiti altarda, rebbaenyo dagiti sagrado nga adigida, ken putdenyo dagiti sagrado a posteda.*+ 14  Dikay agruknoy iti sabali a dios,+ ta ni Jehova ket pagaammo nga* agkalikagum iti naipamaysa a debosion.* Wen, isu ket Dios nga agkalikagum iti naipamaysa a debosion.*+ 15  Dikay makitultulag kadagiti agnanaed iti daga a papananyo, ta inton agbalangkantis ken agidatonda kadagiti diosda,+ addanto mangawis kadakayo ket mangankayto iti indatonna.+ 16  Ket sigurado nga addanto annakyo a lallaki a mangasawa kadagiti annakda a babbai,+ ket isudanto ti agbalangkantis kadagiti diosda ken mangisungsong kadagiti annakyo a lallaki nga agbalangkantis kadagiti diosda.+ 17  “Dikay mangaramid iti didiosen a metal.+ 18  “Selebraranyo ti Piesta ti Tinapay nga Awan Lebadurana.+ Pito nga aldaw a mangankayto iti tinapay nga awan lebadurana kas iti imbilinko kadakayo, iti bulan ti Abib,*+ ta iti dayta a tiempo a rimmuarkayo idiay Egipto. 19  “Amin nga inauna a lalaki* ket kukuak,+ agraman ti amin a kalakian kadagiti tarakenyo, baka man wenno karnero.+ 20  Tunggal inauna nga asno ket sakaenyo babaen ti maysa a karnero. Ngem no diyo sakaen, masapul ngarud a tukkolenyo ti tengngedna. Masapul a sakaenyo ti amin nga inauna nga annakyo a lallaki.+ Awan koma ti ima-ima nga umay agparang kaniak. 21  “Innem nga aldaw nga agtrabahokayo, ngem aginanakayo iti maikapito nga aldaw.*+ Uray no panagaarado ken panagaani, aginanakayo. 22  “Ket selebraranyo ti Piesta Dagiti Lawas kadagiti umuna a maapityo iti immulayo a trigo. Selebraranyo met ti Piesta ti Panagurnong* iti ngudo ti tawen.+ 23  “Kada tawen, masapul a mamitlo nga umay ti amin a lallaki tapno agdaydayawda iti pudno nga Apo a ni Jehova, ti Dios ti Israel.+ 24  Ta papanawekto dagiti nasion iti imatangyo,+ ken palawaekto ti teritoriayo, ket awanto ti mangagaw iti dagayo bayat a mapankayo agparang ken Jehova a Diosyo mamitlo iti kada tawen. 25  “Diyo pakuyogan iti tinapay nga adda lebadurana ti dara ti animal a maidaton kaniak.+ Diyo met ipabigat ti naidaton kaniak bayat ti piesta ti Paskua.+ 26  “Ipanyo iti balay ni Jehova a Diosyo dagiti kasayaatan kadagiti umuna a naapityo iti talon.+ “Diyo iluto ti urbon a kalding iti gatas ti inana.”+ 27  Kinuna pay ni Jehova ken Moises: “Isuratmo dagitoy a sasao,+ ta dagitoy ti pagannurotan ti pannakitulagko kenka ken iti Israel.”+ 28  Ket nagtalinaed ni Moises sadiay a kadua ni Jehova iti 40 nga aldaw ken 40 a rabii. Saan a nangnangan ken saan nga immin-inum iti danum.+ Insurat ti Dios kadagiti tapi a bato ti sasao ti tulag, ti Sangapulo a Bilin.*+ 29  Idi simmalog ni Moises iti Bantay Sinai nga iggemna ti dua a tapi ti Testimonia,+ saanna nga ammo a nakaranraniag ti rupana gapu iti pannakisaona iti Dios. 30  Idi nakita ni Aaron ken ti amin nga Israelita ti nakaranraniag a rupa ni Moises, mabutengda nga umasideg kenkuana.+ 31  Ngem inayaban ida ni Moises isu nga immasideg kenkuana ni Aaron ken ti amin a panguluen dagiti Israelita, ket nakisao ni Moises kadakuada. 32  Kalpasan dayta, immasideg kenkuana ti amin nga Israelita ket impakaammona kadakuada ti amin a bilin nga inted kenkuana ni Jehova idiay Bantay Sinai.+ 33  Kada malpas idi a makisarita ni Moises kadakuada, abbonganna ti rupana.+ 34  Kada makisarita ni Moises ken Jehova, ikkatenna ti abbong ti rupana agingga a rummuar.+ Inton rummuar, ibagana kadagiti Israelita dagiti inawatna a bilin.+ 35  No makita dagiti Israelita a nakaranraniag ti rupa ni Moises, abbonganna manen ti rupana agingga iti sumaruno a pannakisaritana iti Dios.*+

Footnotes

Wenno “nakonsiderar.”
Lit., “natangken ti teltelmi.”
Kitaem ti Glosario.
Lit., “ni Jehova, ti naganna ket.”
Wenno “kayatna nga isu laeng ti pagdaydayawan.”
Wenno “kayatna nga isu laeng ti pagdaydayawan.”
Kitaem ti App. B15.
Lit., “Amin a mangilukat iti aanakan.”
Wenno “ngilinenyo ti sabbath.”
Naawagan met iti Piesta ti Abong-abong (Tabernakulo).
Lit., “ti Sangapulo a Sasao.” Naawagan met iti Dekalogo.
Lit., “kenkuana.”