Exodo 28:1-43

  • Dagiti bado ti padi (1-5)

  • Ti efod (6-14)

  • Ti pektoral (15-30)

    • Ti Urim ken Tummim (30)

  • Ti awan manggasna a bado (31-35)

  • Ti turbante nga addaan iti balitok a metal (36-39)

  • Dadduma pay a bado ti papadi (40-43)

28  “Ayabam ni Aaron+ a kabsatmo ken dagiti annakna a da Nadab, Abihu,+ Eleazar, ken Itamar+ manipud kadagiti Israelita tapno agserbida kaniak kas papadi.+  Iyaramidam kadagiti nasantuan a bado ni Aaron a kabsatmo tapno nadayaw ken makaay-ayo ti langana.+  Kasaritam ti amin a nalalaing,* dagidiay inikkak iti sirib,+ tapno iyaramidanda ni Aaron kadagiti bado a mangipakita nga isu ket pinagbalinko a nasantuan, tapno makapagserbi kaniak kas padi.  “Dagitoy ti aramidenda: maysa a pektoral,+ maysa nga efod,+ maysa nga awan manggasna a bado,+ maysa a nagayad a bado a kuadrakuadrado ti disenio ti pannakaabelna, maysa nga espesial a turbante,+ ken maysa a barikes.+ Aramidenda dagita a nasantuan a bado para ken Aaron a kabsatmo ken kadagiti annakna a lallaki, tapno makapagserbida kaniak kas papadi.  Agusar dagiti eksperto a trabahador iti balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid.  “Aramidenda ti efod babaen kadagiti balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid. Masapul a nabordaan dayta.+  Paidaitam iti saggaysa a tela ti rabaw ti agsumbangir nga abaga, iti nagsaipan ti efod.  Ti naabel a sinturon*+ a maigalut a naimbag iti efod ket maaramid kadagiti isu met la a materiales: balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid.  “Mangalaka iti dua a bato nga onix+ ket ipakitikitmo kadagita ti nagnagan ti annak ni Israel.+ 10  Sag-iinnem a nagan ti maikitikit iti tunggal bato, sigun iti panagsasaganad ti edadda. 11  Ikitikit ti agkitkitikit iti bato dagiti nagan ti annak ni Israel a kas iti panangaramidna iti maysa a pagselio.+ Kalpasanna, ipaimontarmo* dagita iti balitok. 12  Ikabilmo ti dua a bato iti rabaw ti naidait a tela iti agsumbangir nga abaga ti efod kas maysa a palagip kadagiti annak ni Israel,+ ket masapul nga awiten ni Aaron ti nagnaganda iti imatang ni Jehova iti rabaw ti dua nga abagana kas maysa a palagip. 13  Mangaramidka kadagiti pagimontaran a balitok 14  ken dua a kawar a puro a balitok a natiritir a sinantali,+ ket masapul nga ikabitmo dagita kadagiti pagimontaran.+ 15  “Kiddawem iti bumuborda a mangaramid iti pektoral a pangammo kadagiti pangngeddeng ti Dios.+ Kas iti efod, mausar dagiti balitok a sinulid, asul a sinulid, purpura a sinulid a delana, nalabaga a sinulid, ken napino a lienso a sinulid.+ 16  Masapul a kuadrado no makupin, sangadangan* ti kaatiddogna ken sangadangan ti kaakabana. 17  Dayta ti pangikabilam kadagiti naimontar a batbato a nayurnos iti uppat nga intar. Ti umuna nga intar ket rubi, topasio, ken esmeralda. 18  Ti maikadua nga intar ket turkesa, safiro, ken jaspe. 19  Ti maikatlo nga intar ket bato a lesem,* agata, ken amatista. 20  Ti maikapat nga intar ket krisolito, onix, ken jade. Masapul a balitok ti pakaimontaranda. 21  Maysa a bato para iti tunggal anak ti Israel. Makitikitan ti tunggal bato kas iti pannakakitikit ti maysa a pagselio. Maikitikit iti tunggal bato ti nagan ti maysa kadagiti 12 a tribu. 22  “Mangaramidka kadagiti puro a balitok a sinantali a singdan para iti pektoral.+ 23  Mangaramidka iti dua a sinansingsing a pagyusokan a balitok ken ikabilmo dagita iti dua a makinngato a suli ti pektoral. 24  Iyusokmo ti dua a sinantali a balitok iti dua a sinansingsing a pagyusokan kadagiti makinngato a suli ti pektoral. 25  Ikabitmo ti dua a murdong ti dua a sinantali a balitok iti dua a nakaimontaran dagiti bato iti rabaw ti agsumbangir nga abaga ti efod, iti makinsango a paset. 26  Mangaramidka iti dua a sinansingsing a balitok ket ikabilmo dagita iti dua a suli ti makin-uneg a paset ti pektoral a maisagid iti efod.+ 27  Mangaramidka iti dua pay a sinansingsing a balitok iti sango ti efod, iti baba ti naidait a tela iti agsumbangir nga abaga ti efod nga asideg iti nagsaipanna, iti ngato ti naabel a sinturon.*+ 28  Maigalut ti asul a singdan iti pektoral ken kadagiti sinansingsing a pagyusokan nga adda iti efod tapno agtalinaed a nakaplastar ti pektoral iti ngato ti naabel a sinturon* ti efod. 29  “No sumrek ni Aaron iti Nasantuan, masapul nga awitna iti batog ti pusona ti nagnagan dagiti annak ni Israel iti pektoral a pangammo kadagiti pangngeddeng ti Dios. Patinayon a palagip dayta iti imatang ni Jehova. 30  Masapul nga ikabilmo ti Urim ken ti Tummim*+ iti pektoral a pangammo kadagiti pangngeddeng ti Dios, ket masapul nga addadanto iti batog ti puso ni Aaron no sumrek iti sanguanan ni Jehova. Masapul a kanayon nga awiten ni Aaron dagita iti batog ti pusona no mangaramid kadagiti pangngeddeng para kadagiti Israelita iti imatang ni Jehova. 31  “Asul laeng a sinulid ti mausar a pangaramid iti awan manggasna a bado a maisuot nga umuna sakbay ti efod.+ 32  Ti tengnga ti bado ket mayaramidan iti tengnged a pangyusokan iti ulo. Ti aglawlaw ti tengnged ti bado ket masapul a maikkan iti inabel tapno saan a mapigis, kas iti pannakakuelio ti kabal nga isuot ti soldado. 33  Ti gayadanna ket maikkan kadagiti sinanprutas a granada a naaramid iti asul a sinulid, purpura a sinulid a delana, ken nalabaga a sinulid. Baetbaetam ti sinanprutas a granada iti balitok a kampanilia. 34  Ti intero a gayadan ti bado ket mabitinan iti agbimbinnallaet a sinanprutas a granada ken balitok a kampanilia. 35  Masapul nga isuot dayta ni Aaron tapno makapagserbi, ken masapul a mangngeg ti kalangiking ti badona no sumrek ken rummuar iti santuario iti sanguanan ni Jehova, tapno saan a matay.+ 36  “Mangaramidka iti nasileng a metal a puro a balitok. Aramidem dayta a kas iti pannakakitikit ti pagselio ken daytoy ti ikitikitmo: ‘Ni Jehova ket nasantuan.’+ 37  Singdanam dayta iti asul ken igalutmo iti espesial a turbante.+ Masapul nga agtalinaed dayta iti sango ti espesial a turbante. 38  Addanto dayta iti muging ni Aaron, ket isu ti mapabasol no saan nga umiso ti panangusar ti maysa a tao kadagiti nasantuan a banag.+ Dagita a banag ket masapul nga idaton dagiti Israelita kas nasantuan a sagutda iti Dios. Kanayon nga agtalinaed dayta iti mugingna, tapno akseptaren ida ni Jehova. 39  “Napino a lienso a sinulid ti usarem a mangabel iti nagayad a bado a kuadrakuadrado ti diseniona. Kasta met la a sinulid ti mausar para iti espesial a turbante, ken mangaramidka iti inabel a barikes.+ 40  “Mangaramidka met kadagiti nagayad a bado, barikes, ken turbante para kadagiti annak ni Aaron+ tapno nadayaw ken makaay-ayo ti langada.+ 41  Ikawesmo dagitoy iti kabsatmo a ni Aaron ken kadagiti annakna. Bukbokam ti uloda iti nasantuan a lana+ ken isaadmo ida,*+ ken pagbalinem ida a nasantuan, ket agserbidanto kaniak kas papadi. 42  Iyaramidam met ida iti lienso a sapin a mangabbong kadagiti pribado a paset ti bagida.+ 43  Masapul nga isuot dagita ni Aaron ken dagiti annakna no sumrekda iti tolda a pagkonsultaan wenno no umasidegda iti altar iti panagserbida iti nasantuan a disso, tapno dida makabasol ken matay. Permanente dayta a paglintegan a masapul a tungpalenna ken dagiti kaputotanna.*

Footnotes

Lit., “masirib ti pusoda.”
Wenno “barikes.”
Wenno “ipaikapetmo.”
Agarup 22.2 cm. Kitaem ti App. B14.
Di masigurado no ania a kita ti napateg a bato, nalabit amber, hyacinth, opal, wenno tourmaline.
Wenno “barikes.”
Wenno “barikes.”
Kitaem ti Glosario.
Lit., “ken kargaam ti imada.”
Lit., “bin-ina.”