Exodo 37:1-29
37 Inaramid ni Bezalel+ ti Lakasa+ a kayo ti akasia a dua ket kagudua a kasiko* ti kaatiddogna, maysa ket kagudua a kasiko ti kaakabana, ken maysa ket kagudua a kasiko ti kangatona.+
2 Kinalupkopanna ti uneg ken ruar ti lakasa iti puro a balitok ken inyaramidanna iti balitok a dekorasion iti aglawlawna.+
3 Kalpasanna, nangaramid iti uppat a balitok a sinansingsing a pagyusokan ken inkabilna dagita iti ngato ti uppat a saka ti lakasa, dua a sinansingsing a pagyusokan iti kannigid a sikigan ken dua a sinansingsing a pagyusokan iti kannawan a sikigan.
4 Nangaramid kadagiti assiw a kayo ti akasia ken kinalupkopanna iti balitok.+
5 Inyusokna dagiti assiw kadagiti sinansingsing iti agsumbangir a sikigan ti Lakasa a pangawit iti dayta.+
6 Nangaramid iti kalub a puro a balitok+ a dua ket kagudua a kasiko ti kaatiddogna ken maysa ket kagudua a kasiko ti kaakabana.+
7 Nagusar iti martilio iti panangaramidna iti dua a kerubin+ a balitok a naikabil iti agsumbangir a pungto ti kalub.+
8 Ti maysa a kerubin ket naikabil iti maysa a pungto ken naikabil ti maikadua a kerubin iti sabali pay a pungto. Inaramidna dagiti kerubin iti agsumbangir a pungto ti kalub.
9 Nakaukrad dagiti payakda iti ngatuenda tapno malinongan ti kalub.+ Nagsinnangoda ken nakadumogda iti kalub.+
10 Nangaramid iti lamisaan a kayo ti akasia,+ a dua a kasiko ti kaatiddogna, maysa a kasiko ti kaakabana, ken maysa ket kagudua a kasiko ti kangatona.+
11 Kinalupkopanna dayta iti puro a balitok ken inyaramidanna iti balitok a dekorasion iti aglawlawna.
12 Kalpasanna, nangikabil iti kayo a sangadakulap* ti kaakabana iti aglawlaw ti lamisaan ken dinekorasionanna iti balitok ti intero nga ikingna.
13 Nangaramid met iti uppat a balitok a sinansingsing a pagyusokan ken inkabilna dagita iti uppat a suli a nakaikapetan dagiti saka ti lamisaan.
14 Dagiti sinansingsing a pagyusokan ket asideg iti iking, kas pangpatibker kadagiti assiw a pangawit iti lamisaan.
15 Nangaramid met kadagiti assiw a kayo ti akasia a pangawit iti lamisaan ken kinalupkopanna iti balitok.
16 Nangaramid pay kadagiti alikamen a puro a balitok para iti lamisaan—dagiti pinggan, kopa, ken malukong ken pitser a pakaibukbokan dagiti daton nga inumen.+
17 Kalpasanna, nangpanday iti kandelero+ a puro a balitok. Ti puon, ungkay, ken sangsangana nga addaan kadagiti sabong, busel, ken petalo ket namimpinsan a napanday.+
18 Adda innem a sanga ti agsumbangir a sikigan ti kandelero, tallo a sanga iti kannigid ken tallo iti kannawan.
19 Ti tunggal sanga iti maysa a bangir ket addaan iti tallo a sabong a kasla sabsabong ti almendro, a nabaetbaetan iti busel ken petalo. Kapada dayta ti tunggal sanga ti sabali a bangirna. Kasta ti itsura ti innem a sanga ti kandelero.
20 Iti ungkay ti kandelero ket adda uppat a sabong a kasla sabsabong ti almendro, a naballaballaetan iti busel ken petalo.
21 Maysa a busel ti adda iti baba ti umuna a dua a sanga manipud iti ungkay. Maysa met a busel iti baba ti sumaganad a dua a sanga, ken maysa a busel iti baba ti sumaganad a dua a sanga, para iti innem a sanga manipud iti ungkay ti kandelero.
22 Dagiti busel ken dagiti sanga ken ti intero a kandelero ket puro a balitok a namimpinsan a napanday. Martilio ti nausar iti pannakaaramid dayta.
23 Kalpasanna, puro a balitok ti inusarna a nangaramid iti pito a lampara+ ti kandelero agraman dagiti sipitna ken dagiti pagikkan iti narunot a pabilo ti silaw.
24 Maysa a talento* a puro a balitok ti inusarna a nangaramid iti kandelero ken kadagiti alikamen dayta.
25 Inaramidna met ti kuadrado nga altar ti insienso+ manipud kayo ti akasia; maysa a kasiko ti kaatiddogna, maysa a kasiko ti kaakabana, ken dua a kasiko ti kangatona. Dagiti sarana ket paset a mismo ti altar.+
26 Kinalupkopanna iti puro a balitok ti rabaw, ti amin a sikigan, ken dagiti sara ti altar, ken dinekorasionanna iti balitok ti aglawlawna.
27 Nangaramid met iti dua a sinansingsing a pagyusokan a balitok iti baba ti dekorasion ti altar iti agsumbangir a sikiganna, ket dagita ti nakayusokan dagiti assiw a pangawit iti dayta.
28 Kalpasanna, nangaramid kadagiti assiw a kayo ti akasia ket kinalupkopanna iti balitok.
29 Inaramidna met ti nasantuan a lana a pangdutok+ ken ti puro ken nabanglo nga insienso+ a nasayaat ti panaglalaokda.*
Footnotes
^ Wenno “kas iti ar-aramiden ti agar-aramid iti sapsapo.”
