Exodo 12:1-51

  • Pannakairugi ti Paskua (1-28)

    • Maiwarsi ti dara iti hamba ti ridaw (7)

  • Maika-10 a didigra: napapatay dagiti inauna (29-32)

  • Mangrugi ti Ipapanaw (33-42)

    • Panagpatingga ti 430 a tawen (40, 41)

  • Dagiti paglintegan iti panangselebrar iti Paskua (43-51)

12  Kinuna ni Jehova kada Moises ken Aaron idiay Egipto:  “Daytoy a bulan ti umuna a bulan iti tawen para kadakayo.+  Ibagayo iti amin nga Israelita: ‘Iti maika-10 nga aldaw daytoy a bulan, masapul a mangalakayo iti maysa a karnero+ para iti pamiliayo.  Ngem no saan a maibus ti maysa a pamilia ti sangabukel a karnero, isuda ken ti kaasitgan a kaarrubada ket rumbeng a pagbibingayanda dayta iti balayda sigun iti bilang dagiti mangan iti dayta ken sigun iti kabaelanda a kanen.  Masapul a nasalun-at ti kalakian a karneroyo+ a maysa ti tawenna. No awan ti karnero, mabalin ti urbon a kalding.  Masapul nga aywananyo dayta agingga iti maika-14 nga aldaw daytoy a bulan,+ ket partien dayta ti amin a pamilia dagiti Israelita sakbay a sumipnget kalpasan a lumnek ti init.*+  Masapul met a mangalada iti dara ti pinartida ken iwarsida iti kannawan, kannigid, ken makinngato a paset ti hamba ti ridaw dagiti balbalay a pangananda iti dayta.+  “‘Masapul a kanenda ti karne iti daytoy a rabii.+ Itunoda dayta ken kanenda agraman ti tinapay nga awan lebadurana+ ken napait a natnateng.+  Diyo kilawen ti karne. Diyo met ipaburek wenno iyanger no di ket itunoyo a sibubukel, manipud ulo agingga iti saka, agraman lalaemna. 10  Dikay mangibati iti uray ania agingga iti bigat. Masapul a puoranyo ti aniaman a matda agingga iti bigat.+ 11  Kastoy ti rumbeng a pannanganyo: nakasinturonkayo,* nakasandaliaskayo, ken nakasarukodkayo. Darasenyo ti mangan ta daytoy ti Paskua ni Jehova. 12  Ta sursorekto ti intero nga Egipto iti daytoy a rabii ket patayek ti amin nga inauna, tao ken animal;+ ket dusaek ti amin a didiosen dagiti Egipcio.+ Siak ni Jehova. 13  Ti dara ti agbalinto a pagilasinan iti balbalayyo. No makitak ti dara iti ridawyo, labsakto ti balayyo ket saankayto a mairaman iti panangdidigrak iti Egipto.+ 14  “‘Rumbeng a laglagipenyo daytoy nga aldaw, ken masapul nga itultuloyyo a selebraran kas piesta para ken Jehova iti amin a henerasionyo. Kas agnanayon a paglintegan, masapul a selebraranyo dayta. 15  Pito nga aldaw a mangankayo iti tinapay nga awan lebadurana.+ Iti umuna nga aldaw, awan koma ti aniaman nga adda lebadurana iti balayyo, ta ti asinoman a tao* a mangan iti adda lebadurana manipud umuna nga aldaw agingga iti maikapito ket masapul a mapapatay iti Israel. 16  Iti umuna nga aldaw, mangyurnoskayo iti nasantuan a panagtataripnong ken iti sabali pay a nasantuan a panagtataripnong iti maikapito nga aldaw. Dikay agtrabaho kadagita nga aldaw.+ Ti panangisagana iti kanen ti tunggal maysa ti mabalinyo laeng nga aramiden. 17  “‘Masapul a selebraranyo ti Piesta ti Tinapay nga Awan Lebadurana,+ ta iti daytoy met la nga aldaw, iruarkayo iti Egipto, dakayo a nakaad-adu a tattaok.* Masapul nga itultuloyyo a selebraran daytoy nga aldaw kas agnanayon a paglintegan iti amin a henerasionyo. 18  Masapul a mangankayo iti tinapay nga awan lebadurana manipud iti rabii ti maika-14 nga aldaw ti umuna a bulan agingga iti rabii ti maika-21 nga aldaw ti bulan.+ 19  Awan koma ti aniaman nga adda lebadurana iti balayyo ta mapapatay ti asinoman a mangan iti nalebaduraan,+ Israelita man wenno ganggannaet a residente.+ 20  Saankayo a mangan iti adda lebadurana no di ket mangankayo iti tinapay nga awan lebadurana iti balayyo.’” 21  Pinaayaban a dagus ni Moises ti amin a panglakayen iti Israel+ ket kinunana kadakuada: “Mapankay mangala kadagiti urbon nga animal,* maysa iti tunggal pamilia, ket partienyo dayta para iti Paskua. 22  Isawsawyo ti nareppet a mula a hisopo iti dara nga adda iti palanggana ket warsianyo iti dara ti ngato, kannawan, ken kannigid a paset ti hamba ti ridaw. Dikay rumrummuar iti balayyo agingga iti bigat. 23  Ta inton agsursor ni Jehova a mangdidigra kadagiti Egipcio ket makitana ti dara iti ngato, kannawan, ken kannigid a paset ti hamba ti ridaw, sigurado a labsanto ni Jehova ti ridawyo ket saannanto nga ipalubos a sumrek iti balayyo ti didigra a mangyeg iti ipapatay.*+ 24  “Masapul nga itultuloyyo ken dagiti annakyo a tungpalen daytoy a bilin.+ 25  Ket inton makadanonkayo iti daga nga inkari ni Jehova nga ited kadakayo, masapul nga itultuloyyo a selebraran daytoy.+ 26  No damagento dagiti annakyo no ania ti kaipapanan kadakayo daytoy a selebrasion,+ 27  ibagayonto kadakuada, ‘Daytoy ket daton ti Paskua para ken Jehova, a nanglabas kadagiti balay dagiti Israelita idi dinidigrana dagiti Egipcio, ngem insalakanna dagiti pamiliatayo.’” Kalpasanna, nagparintumeng dagiti umili ken nagruknoyda. 28  Inaramid dagiti Israelita ti imbilin ni Jehova kada Moises ken Aaron.+ Kasta ti eksakto nga inaramidda. 29  Iti tengnga ti rabii, pinatay ni Jehova ti amin nga inauna iti Egipto,+ manipud iti inauna nga anak ti agturturay a ni Faraon agingga iti inauna nga anak daydiay adda iti pagbaludan,* ken ti amin nga inauna nga animal.+ 30  Iti dayta a rabii, nariing ni Faraon ken ti amin nga adipenna ken dagiti Egipcio. Adda napigsa a panagsasangit ta adda natay iti tunggal balay dagiti Egipcio.+ 31  Iti dayta met la a rabii, pinaayabanna a dagus da Moises ken Aaron+ ket kinunana: “Pumanawkayon ken amin a kakaduayo nga Israelita. Inkayon agserbi ken Jehova a kas iti ibagbagayo.+ 32  Alaenyo met dagiti baka, karnero, ken kaldingyo ket inkayon kas iti imbagayo.+ Ngem masapul met a bendisionandak.” 33  Dinagdag dagiti Egipcio dagiti Israelita a pumanaw iti Egipto+ ket kinunada, “Mataykamto aminen no dikay pay la pumanaw!”+ 34  Gapuna, innalada dagiti namasa nga arina a saan pay a nalebaduraan, ken imbaklayda dagiti pagmasaanda* a nabungon iti badoda. 35  Tinungpal dagiti Israelita ti bilin ni Moises. Nagdawatda kadagiti Egipcio kadagiti banag a naaramid iti pirak ken balitok agraman badbado.+ 36  Tinignay ni Jehova dagiti Egipcio a mangted a sipaparabur kadagiti tattaona, isu nga inted dagiti Egipcio dagiti dinawat dagiti Israelita, ket innalada dagiti sanikua dagiti Egipcio.+ 37  Pimmanaw dagiti Israelita idiay Rameses+ ket nagturongda idiay Succot.+ Agarup 600,000 a lallaki ti nagnagna, saan pay a karaman dagiti ubbing.+ 38  Nakikuyog kadakuada ti adu pay a sabali a tattao*+ agraman ti nakaad-adu a baka, karnero, ken kaldingda. 39  Inaramidda a tinapay nga awan lebadurana ti masa nga inggapuda idiay Egipto. Awan lebadura dagita gapu ta inapura ida dagiti Egipcio a pinapanaw, isu a dida nakaitugot iti sabali a taraon.+ 40  Ti panagnaed dagiti Israelita, a nagyan idi idiay Egipto,+ ket 430 a tawen.+ 41  Iti mismo nga aldaw a nagpatingga ti 430 a tawen, pimmanaw iti Egipto ti amin a tattao* ni Jehova. 42  Maysa dayta a rabii a panangselebrarda iti panangiruar kadakuada ni Jehova idiay Egipto. Dayta a rabii para ken Jehova ket masapul a selebraran ti amin nga Israelita ken ti amin a henerasionda.+ 43  Kalpasanna, kinuna ni Jehova kada Moises ken Aaron: “Daytoy ti paglintegan maipapan iti Paskua: Saan a mabalin a mangan iti dayta ti ganggannaet.+ 44  Ngem mabalin a mangan iti dayta ti asinoman a nagatang nga adipen no la ket ta kugitenyo nga umuna.+ 45  Saan a mabalin a mangan iti dayta ti makipaggigian ken ti matangtangdanan a trabahador. 46  Kanenyo dayta iti uneg ti balay. Saanyo nga iruar iti balay ti aniaman a karne ken saanyo a tukkolen ti aniaman a tulangna.+ 47  Masapul a selebraran dayta ti amin nga Israelita. 48  No adda ganggannaet a residente a makipagnanaed kadakayo a mayat a makipagselebrar iti Paskua para ken Jehova, masapul a kugitenyo nga umuna ti amin a lallaki iti pamiliana. Iti kasta, makipagselebrar ken agbalin a kas maysa nga Israelita. Ngem awan ti di nakugit a mabalin a mangan iti dayta.+ 49  Maymaysa a linteg ti suroten dagiti Israelita ken ganggannaet a residente a makipagnanaed kadakayo.”+ 50  Inaramid ti amin nga Israelita ti imbilin ni Jehova kada Moises ken Aaron. Kasta ti eksakto nga inaramidda. 51  Iti daytoy met la nga aldaw, inruar ni Jehova ti amin nga Israelita* manipud iti Egipto.

Footnotes

Lit., “iti nagbaetan ti dua a rabii.”
Lit., “nabariksan dagiti patongyo.”
Wenno “kararua.”
Lit., “nga armadak.”
Kayatna a sawen, urbon a karnero wenno kalding.
Lit., “pannakadadael.”
Lit., “balay nga addaan iti pagurnongan ti danum.”
Wenno “malukongda.”
Kayatna a sawen, dagiti saan nga Israelita agraman dagiti Egipcio.
Lit., “nga armada.”
Lit., “annak ni Israel agraman dagiti armadada.”