Exodo 2:1-25
2 Iti daydi a tiempo, adda maysa a lalaki iti tribu ni Levi a nangasawa iti katribuanna.+
2 Nagsikog ti babai ket nangyanak iti lalaki. Idi nakitana a makaay-ayo ti itsura ti anakna, inlemmengna iti tallo a bulan.+
3 Idi dinan mailemmeng,+ nangala iti basket a naaramid iti papiro ket kinalupkopanna iti alkitran. Inkabilna ti ubing iti dayta a basket sa impanna iti karunuan iti igid ti Karayan Nilo.
4 Nagtakder ti manang ti ubing+ iti saan unay nga adayo tapno makitana ti mapasamak iti adingna.
5 Idi napan nagdigus idiay Karayan Nilo ti balasang ni Faraon, nagpagnapagna dagiti katulonganna a babbai iti igid ti karayan. Nakitana ti basket iti karunuan isu a dagus nga impaalana dayta iti adipenna a babai.+
6 Linuktanna ti basket ket nakitana ti maysa nga ubing a lalaki nga agsangsangit isu a naasian. “Maysa daytoy kadagiti annak dagiti Hebreo,” kinunana.
7 Idi kuan, dinamag ti manang ti ubing iti balasang ni Faraon: “Kayatmo kadi a mangayabak iti Hebreo a babai a mangaywan iti ubing para kenka?”
8 Insungbat ti balasang ni Faraon: “Sige!” Dagus a napan ti balasitang ket inayabanna ti ina ti ubing.+
9 Kinuna kenkuana ti balasang ni Faraon: “Iyawidmo daytoy nga ubing ket aywanam para kaniak, ket tangdanankanto.” Isu nga innala ti babai ti ubing ket inaywananna.
10 Idi dimmakkelen ti ubing, impanna iti balasang ni Faraon a nangibilang kenkuana kas anakna.+ Pinanagananna iti Moises* ket kinunana: “Gapu ta inaonko iti danum.”+
11 Idi agkabannuagen ni Moises,* napan iti ayan dagiti kakabsatna ket nakitana ti rigatda nga agtrabtrabaho iti nadagsen+ ken nakitana ti padana a Hebreo a kabkabilen ti maysa nga Egipcio.
12 Kinitana ti aglawlaw ket gapu ta awan ti makakitkita, pinatayna ti Egipcio ket inlemmengna iti kadaratan.+
13 Kabigatanna, rimmuar manen ni Moises ket nakitana ti dua a Hebreo a lallaki nga aglablaban. “Apay a kabkabilem ti kaduam?”+ kinunana iti nakabasol.
14 “Asino ti nangdutok kenka kas prinsipe ken mangukom kadakami? Kayatnak kadi a patayen kas iti panangpataymo iti Egipcio?”+ kinuna ti nakabasol. Nadanagan ni Moises ket kinunana: “Naammuandan ti inaramidko!”
15 Nadamag dayta ni Faraon ket kayatna a patayen ni Moises. Ngem nagtalaw ni Moises ket napan nagnaed idiay Midian.+ Idi kuan, nagtugaw iti abay ti maysa a bubon sadiay.
16 Immay simmakdo ti pito a babbalasang ti padi ti Midian+ ket pinunnoda dagiti pagkargaan iti danum tapno painumenda ti arban ni amada.
17 Ngem kas iti dati, immay dagiti pastor ket pinapanawda ida. Isu a timmakder ni Moises ket tinulonganna* dagiti babbai ken pinainumna ti arbanda.
18 Idi nagawidda, masmasdaaw a dinamag ti amada a ni Reuel:*+ “Apay a nagsapakayo a nakaawid ita?”
19 Kinunada: “Adda Egipcio+ a nangisalakan kadakami idi pappapanawendakami dagiti papastor. Insakduannakami pay ken pinainumna ti arban.”
20 Kinunana kadagiti babbalasangna: “Ayanna ngay dayta a lalaki? Apay a pinanawanyo? Inkay ayaban tapno kaduatayo a mangan.”
21 Kalpasan dayta, immanamong ni Moises a makipagnaed ken Reuel. Ket intedna ken Moises ti anakna a ni Zipora+ tapno agbalin nga asawana.
22 Idi agangay, nangipasngay ni Zipora iti anak a lalaki ket pinanaganan ni Moises iti Gersom*+ ta kinunana: “Maysaak a ganggannaet a residente iti sabali a daga.”+
23 Kalpasan ti adu a tawen,* natay ti ari ti Egipto,+ ngem umas-asug ken agrekreklamo latta dagiti Israelita gapu iti pannakaadipenda, ket kanayon nga ipakpakaasida iti pudno a Dios a tulonganna ida.+
24 Idi agangay, nangngeg ti Dios ti asugda+ ket linagipna ti tulagna kada Abraham, Isaac, ken Jacob.+
25 Gapuna, nakita ti Dios ti kasasaad dagiti Israelita ket impangagna ida.
