Nga Zan klɛli’n 6:1-71
6 I sin’n, Zezi kpɛli Galile Jenvie mɔ be flɛ i ekun kɛ Tiberiadi’n, ɔ ɔli i bue kun lɔ.+
2 Sran kpanngban kpa be su i su.+ Afin be wun abonuan sa ng’ɔ yo be’n. Yɛle kɛ ɔ yo tukpacifuɛ’m be juejue.+
3 Zezi nin i sɔnnzɔnfuɛ’m be fuli oka kun su. Kpɛkun be trannin ase lɛ.
4 Delɛ Cɛn+ m’ɔ ti Zifu’m be cɛn dan’n, w’a mantan koko.
5 Kɛ Zezi mɛnnin i ɲin su m’ɔ wunnin kɛ sran kpanngban kpa be su bɛ i wun lɛ’n, ɔ usali Filipu kɛ: “?Nin yɛ é kó tó kpanwun naan y’a fa man sran nga mun naan b’a di-ɔ?”+
6 Ɔ seli sɔ naan ɔ́ sí akunndan nga Filipu bu’n. Afin ɔ si like ng’ɔ su wa yo’n.
7 Filipu tɛli i su kɛ: “Sɛ e to kpanwun denie* ya nɲɔn (200) naan e bubu nun kannganngan bɔbɔ’n, ɔ su juman be ngba.”
8 Simɔn i niaan bian Andre m’ɔ ti i sɔnnzɔnfuɛ’m be nun kun’n seli i kɛ:
9 “Ba yasua kaan kun o wa, ɔ le ɔɔzu kpanwun nnun ɔ nin jue kanngan nɲɔn. ?Sanngɛ sran kpanngban nga be o yɛ’n, ɔ kwla ju be?”+
10 Zezi seli kɛ: “An se sran’m be kɛ be trantran ase.” Kɛ mɔ ijre kpanngban o lika sɔ’n nun’n ti’n, sran’m be trannin ase lɛ. Be nun yasua’m be ti sran kɔe akpi nnun (5.000).+
11 Zezi fali kpanwun’n, kpɛkun ɔ lali Ɲanmiɛn ase. I sin’n, ɔ fa cɛcɛli be kwlaa nga be trannin ase lɛ’n. Ɔ fali jue mun mannin be wie. Be dili i lele be ku yili.
12 Kɛ be dili mɔ be ku yili’n, ɔ seli i sɔnnzɔnfuɛ’m be kɛ: “An tiantian i sinsin kanngan nga be kali’n be nuan. I liɛ’n, wie fi su saciman.”
13 Ɔ maan be tiantiannin be nuan. Ɔɔzu kpanwun nnun nga be dili’n i sinsin ng’ɔ kali’n, ɔ yili gbogbo blu-nin-nɲɔn (12).
14 Kɛ sran’m be wunnin abonuan sa ng’ɔ yoli’n, be seli kɛ: “Nanwlɛ, Ɲanmiɛn Nuan Ijɔfuɛ nga be seli kɛ ɔ́ bá mɛn’n nun’n yɛ ɔ o yɛ.”+
15 Kɛ mɔ Zezi si kɛ be su wa trɛ i naan bé síe i famiɛn’n ti’n, ɔ cuɛnnin i wun+ ekun, i ngunmin ɔli oka’n su lɔ.+
16 Kɛ lika’n sannin’n, i sɔnnzɔnfuɛ’m be jrali be ɔli jenvie’n su lɔ.+
17 Be fuli alie kun nun, be waan bé kpɛ́ jenvie’n naan bé kɔ́ Kapɛɛnaɔmun. Kɛ ɔ́ yó sɔ’n nn lika’n w’a lu kpa, yɛ Zezi kusu nin-a toman be lɔ.+
18 Asa kusu’n, jenvie’n su keje dan kpa, afin aunmuan dan kun su fita.+
19 Sanngɛ kɛ be kannin alie’n ɔli kilo nnun annzɛ nsiɛn’n,* be wunnin kɛ Zezi su nanti nzue’n su ba alie’n i wun lɛ. Srɛ kunnin be dan kpa.
20 Sanngɛ ɔ seli be kɛ: “Min-ɔn, nán srɛ kun amun!”+
21 Ɔ maan aklunjɔɛ su, be fɛli i alie’n nun. Kɛ ɔ yoli sɔ’n, w’a cɛman yɛ be juli lika nga be su kɔ’n niɔn.+
22 Kɛ aliɛ cɛnnin’n, sran kpanngban kpa nga be kali jenvie’n i bue kun lɔ’n, be wunnin kɛ alie fi nunman lɛ. Alie kaan kun o lɛ laa, sanngɛ Zezi w’a fuman i sɔnnzɔnfuɛ’m be sin alie sɔ’n nun. Afin i sɔnnzɔnfuɛ’m be ngunmin yɛ be ɔli-ɔ.
23 Alie wie’m be fin Tiberiadi be bali lika nga e Min’n srɛli Ɲanmiɛn mɔ be dili kpanwun’n, i wun koko lɛ.
24 Ɔ maan kɛ sran’m be wunnin kɛ Zezi nin i sɔnnzɔnfuɛ’m be nunman lɛ’n, be fuli be alie’m be nun, kpɛkun be ɔli Zezi i kunndɛlɛ Kapɛɛnaɔmun lɔ.
25 Kɛ be toli i jenvie’n i bue kun lɔ’n, be seli i kɛ: “?Rabi,+ blɛ onin nun yɛ a juli wa-ɔ?”
26 Zezi tɛli be su kɛ: “Nanwlɛ, ń kán klé amun kpa kɛ nán abonuan sa nga amun wunnin be’n be ti yɛ amun kunndɛ min-ɔn. Sanngɛ kɛ mɔ amun dili kpanwun mɔ amun ku yili’n ti-ɔ.+
27 Nán amun di junman aliɛ m’ɔ saci’n ti. Sanngɛ amun di junman aliɛ m’ɔ saciman m’ɔ man nguan m’ɔ leman awieliɛ’n,+ i ti. Sran Wa’n yɛ ɔ́ mán amun aliɛ sɔ’n niɔn. Afin Siɛ’n, mɔ yɛle Ɲanmiɛn bɔbɔ’n, ɔ fɛli i nzɔliɛ’n sieli i su fa kleli kɛ i klun jɔ i wun.”+
28 Ɔ maan be usali Zezi kɛ: “?Ngue yɛ ɔ fata kɛ e yo naan Ɲanmiɛn i klun w’a jɔ e wun-ɔn?”
29 Zezi tɛli be su kɛ: “Like nga Ɲanmiɛn klo kɛ amun yo’n yɛ ɔ o yɛ: Maan amun kle kɛ amun lafi sran m’ɔ sunmɛnnin i’n i su.”+
30 Ɔ maan be seli i kɛ: “?Abonuan sa onin+ yɛ á yó naan y’a wun i naan y’a lafi ɔ su-ɔ? ?Like onin yɛ á yó-ɔ?
31 E nannan’m be dili manin aawlɛ flɛnnɛn’n nun lɔ.+ Afin be klɛli i kɛ: ‘Ɔ mannin be kpanwun m’ɔ fin ɲanmiɛn su lɔ’n kɛ be di.’”+
32 Zezi seli be kɛ: “Nanwlɛ, ń kán klé amun kpa kɛ Moizi w’a manman amun kpanwun m’ɔ fin ɲanmiɛn su’n. Sanngɛ min Si yɛ ɔ man amun kpanwun kpafuɛ’n m’ɔ fin ɲanmiɛn su’n niɔn.
33 Afin Ɲanmiɛn i kpanwun’n yɛle sran m’ɔ fin ɲanmiɛn su m’ɔ man mɛn nunfuɛ’m be nguan’n.”
34 Ɔ maan be seli i kɛ: “E Min, man e kpanwun sɔ’n titi.”
35 Zezi seli be kɛ: “Min yɛ n ti kpanwun m’ɔ man nguan’n niɔn. Sran kwlaa ng’ɔ ba min sin’n, awe su kunmɛn i kun mlɔnmlɔn. Yɛ sran kwlaa ng’ɔ kle kɛ ɔ lafi min su’n, nzuewe su kunmɛn i kun le.+
36 Sanngɛ kɛ nga n kan kleli amun’n sa’n, amun wunnin min, ɔ nin i sɔ ngba’n, amun lafiman su.+
37 Be kwlaa nga Siɛ’n fa be man min’n, bé bá min sin. Yɛ sran ng’ɔ ba min sin’n, n su fuɛnmɛn i le.+
38 Afin nán min klun sa yolɛ ti yɛ n fin ɲanmiɛn su lɔ n bali-ɔ.+ Sanngɛ n bali sran ng’ɔ sunmannin min’n, i klun sa yolɛ.+
39 Sran ng’ɔ sunmannin min’n i klun sa’n yɛ: Ɔ fataman kɛ n mlin be kwlaa ng’ɔ fali be mannin min’n be nun kun sa, sanngɛ ɔ fata kɛ n cɛn+ be blɛ kasiɛn’n nun.
40 Afin min Si i klun sa’n yɛ: Maan sran kwlaa ng’ɔ sɔ sran Wa’n i nun’n, m’ɔ kle kɛ ɔ lafi i su’n, ɔ ɲan nguan m’ɔ leman awieliɛ’n.+ Kpɛkun blɛ kasiɛn’n nun’n ń cɛ́n i.”+
41 Kɛ ɔ yoli sɔ’n, Zifu’m be ijɔli be konviabo. Be kannin Zezi i wun ndɛ, afin ɔ seli kɛ: “N ti kpanwun m’ɔ fin ɲanmiɛn su’n.”+
42 Yɛ be seli kɛ: “?Nán Zezi m’ɔ ti Zozɛfu i wa’n niɔn? E si i si nin i nin.+ ?Yɛ ngue ti yɛ ɔ se kɛ: ‘N fin ɲanmiɛn su-ɔ’?”
43 Zezi tɛli be su kɛ: “An yaci amun konviabo ijɔlɛ’n.
44 Sɛ Siɛ’n m’ɔ sunmannin min’n, w’a faman* sran kun w’a baman min sin’n, sran fi kwlá baman min sin.+ Yɛ blɛ kasiɛn’n nun’n ń cɛ́n sran sɔ’n.+
45 Be klɛli i Ɲanmiɛn nuan ijɔfuɛ’m be fluwa’n nun kɛ: ‘Zoova* wá klé be kwlaa be like.’+ Sran kwlaa ng’ɔ tili Siɛ’n i ndɛ’n m’ɔ sɔli like ng’ɔ kle’n nun’n, ɔ ba min sin.
46 Nán kɛ sran wie wunnin Siɛ’n ti-ɔ.+ Saan sran ng’ɔ fin Ɲanmiɛn i wun lɔ’n. Sran sɔ’n yɛ ɔ wunnin Siɛ’n niɔn.+
47 Nanwlɛ, ń kán klé amun kpa kɛ sran kwlaa ng’ɔ lafi min su’n, ɔ le nguan m’ɔ leman awieliɛ’n.+
48 “N ti kpanwun m’ɔ man nguan’n.+
49 Amun nannan’m be dili manin’n aawlɛ flɛnnɛn’n nun lɔ. Ɔ nin i sɔ ngba’n be wuli.+
50 Kpanwun m’ɔ fin ɲanmiɛn su’n yɛ. Sran kwlaa ng’ɔ di wie’n, ɔ su wuman.
51 Min yɛ n ti kpanwun m’ɔ man nguan m’ɔ fin ɲanmiɛn su’n niɔn. Sɛ sran kun di kpanwun sɔ’n, ɔ́ ká nguan nun tititi. Afin kpanwun nga ń fá mán naan mɛn nunfuɛ’m be ɲan nguan’n yɛle min wunnɛn’n.”+
52 Kɛ ɔ yoli sɔ’n, Zifu’m be sili akplowa be afiɛn lɔ. Be seli kɛ: “?Wafa sɛ yɛ bian nga kwla fɛ i wunnɛn’n man e kɛ e di-ɔ?”
53 I sɔ’n ti’n, Zezi seli be kɛ: “Nanwlɛ, ń kán klé amun kpa kɛ sɛ amun a diman sran Wa’n i wunnɛn’n naan amun a nɔnmɛn i mmoja’n, amun su ɲanman nguan.*+
54 Sran kwlaa ng’ɔ di min wunnɛn’n m’ɔ nɔn min mmoja’n, ɔ le nguan m’ɔ leman awieliɛ’n. Kpɛkun blɛ kasiɛn nun’n, ń cɛ́n+ sran sɔ’n.
55 Afin min wunnɛn’n ti aliɛ kpa, yɛ min mmoja’n ti nzan kpa.
56 Sran kwlaa ng’ɔ di min wunnɛn’n m’ɔ nɔn min mmoja’n, e nin i e o nun titi.+
57 Siɛ m’ɔ o lɛ titi’n sunmannin min, yɛ Siɛ’n ti’n n wo nguan nun. I wafa kunngba’n, sran ng’ɔ di min wunnɛn’n, min ti ɔ́ ɲán nguan.+
58 Kpanwun m’ɔ fin ɲanmiɛn su’n yɛ. Ɔ timan kɛ kpanwun mɔ amun nannan’m be dili mɔ sanngɛ be wuli’n sa. Sran kwlaa ng’ɔ di kpanwun nga’n, ɔ́ ká nguan nun tititi.”+
59 Kɛ ɔ́ klé like Ɲanmiɛn sulɛ sua kun nun* Kapɛɛnaɔmun lɔ’n, yɛ ɔ kannin ndɛ sɔ mun-ɔn.
60 Kɛ i sɔnnzɔnfuɛ’m be tili ndɛ sɔ’n, be nun kpanngban be seli kɛ: “Ndɛ nga timan kpa mlɔnmlɔn. ?Wan yɛ ɔ kwla tie-ɔ?”
61 Zezi si kɛ ndɛ sɔ’n ti’n, i sɔnnzɔnfuɛ’m be su ijɔ be konviabo. Ɔ maan ɔ seli be kɛ: “?Ndɛ sɔ’n lo amun ngasi?*
62 ?Yɛ sɛ amun wun sran Wa’n kɛ ɔ su fu kɔ lika nga ɔ o lɔ laa’n nin?+
63 Ɲanmiɛn wawɛ’n yɛ ɔ man nguan-ɔn.+ Klɔ sran kwlá yoman sa fi. Ndɛ nga n kan kleli amun lɛ’n, be fin Ɲanmiɛn wawɛ’n, kpɛkun be man nguan.+
64 Sanngɛ amun nun wie’m be lafiman min su.” Afin i bo bolɛ nun bɔbɔ’n, Zezi si sran nga be lafimɛn i su’n. Yɛ ɔ si sran ng’ɔ́ wá fɛ́ i mán sran mun’n.+
65 Ɔ seli be kɛ: “I sɔ’n ti yɛ n seli amun kɛ, sɛ Siɛ’n w’a manman sran kun i atin kɛ ɔ bla min sin’n, ɔ su kwlá baman min sin’n niɔn.”+
66 I sɔ’n ti’n, i sɔnnzɔnfuɛ kpanngban be sali be sin ninnge nga be yacili be’n be wun.+ Be nin i b’a nantiman kun.
67 Zezi seli i akoto blu-nin-nɲɔn (12) mun kɛ: “?Amun li, amun kɔman wie?”
68 Simɔn Piɛli tɛli i su kɛ: “?E Min, wan sin yɛ é kɔ́-ɔ?+ Ɔ ndɛ’m be man nguan m’ɔ leman awieliɛ’n.+
69 E lafili ɔ su, yɛ e wunnin i wlɛ kɛ a ti Ɲanmiɛn i Sran.”+
70 Zezi tɛli be su kɛ: “N kpali amun sran blu-nin-nɲɔn (12) mun. ?Nɛ́n i-ɔ?+ Sanngɛ amun nun kun ti sran wun sacifuɛ.”*+
71 Simɔn Iskariɔti i wa Zida i ndɛ yɛ ɔ su kan-ɔn. Afin kannzɛ ɔ ti akoto blu-nin-nɲɔn (12) mun be nun kun’n, ɔ́ wá fɛ́ i mán sran mun.+
