Nga Zan klɛli’n 18:1-40
-
Zida fali Zezi mannin sran mun (1-9)
-
Piɛli fali tokofi kun kpɛli Malkisi i su’n (10, 11)
-
Be fali Zezi ɔli Anin lɔ (12-14)
-
Kpɛ klikli nga Piɛli seli kɛ ɔ siman Zezi’n (15-18)
-
Zezi o Anin i ɲrun (19-24)
-
Kpɛ nɲɔn su nin i nsan su nga Piɛli seli kɛ ɔ siman Zezi’n (25-27)
-
B’a fa Zezi b’a ɔ Pilati ɲrun (28-40)
-
“Min Famiɛn Dilɛ’n finman klɔ sran mun” (36)
-
18 Kɛ Zezi kannin ndɛ sɔ mun wieli’n, ɔ nin i sɔnnzɔnfuɛ’m be ɔli Sedrɔn Kongo’n+ i bue kun lɔ, fie kun o lɔ, ɔ nin be ɔli lɔ.+
2 Zida m’ɔ́ wá yí i mán’n i kusu si lika sɔ’n. Afin ɔ ju wie’n, Zezi nin i sɔnnzɔnfuɛ’m be yia lɔ.
3 Ɔ maan Zida fali sonja akpasua kun ɔ nin Ɲanmiɛn ɲrun jranfuɛ’m be su kpɛn mun nin Farizifuɛ’m be sonja mun ɔli. Kɛ bé kɔ́’n, tɛ nin kannin nin alɛ ninnge o be sa nun.+
4 Kɛ mɔ Zezi si sa kwlaa nga be su wa tɔ i su’n ti’n, ɔ wunngeli be wun lɔ naan w’a se be kɛ: “?Wan yɛ amun su kunndɛ i-ɔ?”
5 Be tɛli i su kɛ: “Zezi m’ɔ fin Nazarɛti’n.”+ Ɔ seli be kɛ: “Min-ɔn.” Zida m’ɔ́ wá yí i mán’n, ɔ jin be wun lɛ wie.+
6 Sanngɛ kɛ Zezi seli be kɛ: “Min-ɔn,” be wunngeli siɛn kpɛkun be tɔli.+
7 Yɛ ɔ usali be ekun kɛ: “?Wan yɛ amun su kunndɛ i-ɔ?” Be seli kɛ: “Zezi m’ɔ fin Nazarɛti’n.”
8 Zezi tɛli su kɛ: “N seli amun kɛ min-ɔn. Ɔ maan sɛ min yɛ amun su kunndɛ min’n, amun yaci sran nga’m be nun maan be wɔ.”
9 Sa sɔ’n juli naan ndɛ ng’ɔ kɛnnin i laa’n, ɔ kpɛn su. Ɔ seli kɛ: “Be nga a fa be mannin min’n, be nun wie fi w’a mlinman min sa nun.”+
10 Tokofi kun o Simɔn Piɛli i sa nun. Ɔ fa finnin Ɲanmiɛn ɲrun jranfuɛ dan’n i junman difuɛ’n naan w’a kpɛ i su fama’n.+ Junman difuɛ sɔ’n i dunman’n yɛle Malkisi.
11 Sanngɛ Zezi seli Piɛli kɛ: “Fa tokofi’n wlɛ i i bua’n nun.+ ?Ɔ fataman kɛ n nɔn klowa nga min Si fa mannin min’n nun?”+
12 Yɛ sonja mun nin sonja akpi su kpɛn’n, ɔ nin Ɲanmiɛn i sua’n nun lɔ gladi difuɛ’m be trali Zezi-ɔ. Kpɛkun be cili i.
13 Be dun mmua fɛ i ɔli Anin lɔ, afin ɔ ti Kaifu i sia.+ Kaifu yɛ ɔ ti Ɲanmiɛn ɲrun jranfuɛ dan afuɛ sɔ’n nun-ɔn.+
14 Kaifu sɔ’n yɛ ɔ seli Zifu’m be kɛ sɛ sran kunngba wu nvle’n i dunman nun’n, ɔ ti kpa man be’n niɔn.+
15 Simɔn Piɛli nin Zezi i sɔnnzɔnfuɛ kun ekun be suli Zezi su.+ Ɲanmiɛn ɲrun jranfuɛ dan’n si Zezi i sɔnnzɔnfuɛ sɔ’n. Ɔ maan ɔ nin Zezi be wluli Ɲanmiɛn ɲrun jranfuɛ dan’n i awlo’n i klun lɔ.
16 Sanngɛ Piɛli kali gua su lɔ. Ɔ jin anuan’n nun lɛ. Ɔ maan Zezi i sɔnnzɔnfuɛ ng’ɔ si Ɲanmiɛn ɲrun jranfuɛ dan’n fiteli, ɔ kannin ndɛ kleli junman difuɛ talua ng’ɔ nian anuan’n su’n naan w’a fa Piɛli w’a wlu lɔ.
17 Talua’n usali Piɛli kɛ: “?A nunman bian sɔ’n i sɔnnzɔnfuɛ’m be nun wie yɛ ɔ o lɛ-ɔ?” Piɛli seli kɛ: “N nunman be nun wie.”+
18 Blɛ sɔ’n nun’n, junman difuɛ mun nin Ɲanmiɛn i sua’n nun lɔ gladi difuɛ mun be trɔli sin, afin ayrɛ o nun. Ɔ maan be o lɛ be su tɔn sin. Piɛli kusu jin be wun lɛ, ɔ su tɔn sin wie.
19 Kpɛkun Ɲanmiɛn ɲrun jranfuɛ’m be su kpɛn’n usali Zezi i sa. Ɔ usɛli i sɔnnzɔnfuɛ mun nin like ng’ɔ kle sran mun’n, be su sa.
20 Zezi tɛli i su kɛ: “N kannin ndɛ n kleli sran mun nzra nun titi. Ɲanmiɛn sulɛ sua mun nin Ɲanmiɛn sua+ mɔ Zifu’m be yia be nun’n, be nun yɛ n kleli sran’m be like-ɔ. M’an kanman ndɛ fi nvialiɛ nun.
21 ?Yɛ ngue ti yɛ min yɛ a usa min sa-ɔ? Usa be nga n kannin ndɛ n kleli be’n. Be si ndɛ nga n kannin’n.”
22 Kɛ Zezi kannin ndɛ sɔ mɔ i nuan tɔli’n, Ɲanmiɛn sua’n nun lɔ gladi difuɛ’m be nun kun m’ɔ jin lɛ’n, ɔ kpacili Zezi i ɲrun.+ Kpɛkun ɔ seli kɛ: “?Kɛ a tɛ Ɲanmiɛn ɲrun jranfuɛ’m be su kpɛn’n i su sa?”
23 Zezi tɛli i su kɛ: “Sɛ ndɛ nga n kannin’n timan su’n, kan kle min. ?Sanngɛ kusu sɛ ndɛ nga n kannin’n ti su’n, ngue ti yɛ a fin min like-ɔ?”
24 Kɛ ɔ yoli sɔ’n, Anin cili i. Kpɛkun ɔ fɛ i ko mannin Kaifu m’ɔ ti Ɲanmiɛn ɲrun jranfuɛ dan’n.+
25 Kɛ ɔ́ yó sɔ’n, nn Piɛli jin lɛ, ɔ su tɔn sin. Yɛ be seli i kɛ: “?A nunman bian sɔ’n i sɔnnzɔnfuɛ’m be nun wie yɛ ɔ o lɛ-ɔ?” Ɔ sɛli i nuan. Ɔ seli kɛ: “N nunman be nun wie.”+
26 Ɲanmiɛn ɲrun jranfuɛ dan’n i junman difuɛ’m be nun kun mɔ i osufuɛ yɛle bian nga Piɛli kpɛli i su’n,+ ɔ usali kɛ: “?Nán wɔ yɛ n wunnin wɔ fie’n nun lɔ’n niɔn?”
27 Sanngɛ Piɛli sɛli i nuan ekun. Kɛ ɔ yoli sɔ cɛ’n, yɛ akɔɲinman kun boli-ɔ.+
28 I sin’n, be fali Zezi Kaifu i awlo lɔ be ɔli Pilati m’ɔ ti mɛn siefuɛ’n i awlo lɔ.+ Sanngɛ be bɔbɔ b’a wluman lɔ, kɛ ɔ ko yo naan b’a yoman fiɛn+ naan b’a kwla di Delɛ Cɛn aliɛ’n ti. Kɛ ɔ́ yó sɔ’n, nn lika’n nin-a wieman cɛn.
29 Pilati toli be gua su lɛ, naan w’a se kɛ: “?Sa tɛ onin yɛ amun waan bian nga yoli-ɔ?”
30 Be tɛli i su kɛ: “Sɛ bian nga timan sa tɛ yofuɛ’n, nn y’a fɛmɛn i y’a baman ɔ ja su.”
31 Yɛ Pilati seli be kɛ: “Amun bɔbɔ amun fɛ i be wɔ naan amun nian amun mmla’n su be di i jɔlɛ.”+ Zifu’m be seli i kɛ: “E leman atin e kunman sran.”+
32 Sa sɔ’n yoli sɔ naan ndɛ nga Zezi kannin fa kleli wafa ng’ɔ́ fá wú’n, ɔ kpɛn su.+
33 Yɛ Pilati wluli i sua’n nun lɔ ekun-ɔn. Ɔ flɛli Zezi, kpɛkun ɔ seli i kɛ: “?Wɔ yɛ a ti Zifu’m be Famiɛn’n niɔn?”+
34 Zezi tɛli su kɛ: “?Ndɛ nga á kɛ́n i lɛ’n, ɔ fin ɔ bɔbɔ annzɛ sran uflɛ yɛ ɔ kannin min wun ndɛ kleli wɔ-ɔ?”
35 Pilati tɛli su kɛ: “?Be waan Zifu yɛle min? Ɔ bɔbɔ ɔ nvle’n nunfuɛ mun nin Ɲanmiɛn ɲrun jranfuɛ’m be su kpɛn mun yɛ be fali wɔ wlali min sa nun-ɔn. ?Ngue sa yɛ a yoli-ɔ?”
36 Zezi tɛli su kɛ:+ “Min Famiɛn Dilɛ’n finman klɔ sran mun.+ Sɛ ɔ ti kɛ min Famiɛn Dilɛ’n fin klɔ sran mun’n, nn min sran’m be kplili kpa naan b’a faman min b’a wlaman Zifu’m be sa nun.+ Sanngɛ min Famiɛn Dilɛ’n finman klɔ sran mun.”
37 Yɛ Pilati seli i kɛ: “?Ɔ maan a ti famiɛn?” Zezi tɛli su kɛ: “Yɛ ɔ bɔbɔ ɔ nuan o su lɛ-ɔ.+ Like nga ti yɛ be wuli min’n ɔ nin like nga ti yɛ n bali mɛn’n nun’n yɛ: N bali kɛ ń dí ndɛ ng’ɔ ti nanwlɛ’n i ti lalo.+ Ɔ maan sran kwlaa ng’ɔ o nanwlɛ’n i sin’n, ɔ sie i su min nuan bo.”
38 Pilati seli i kɛ: “?Ngue yɛle nanwlɛ’n?”
Kɛ ɔ wieli ndɛ sɔ’n i kan’n, ɔ fite ɔli Zifu’m be wun lɔ ekun, yɛ ɔ seli be kɛ: “N wunman kɛ ɔ yoli sa tɛ.+
39 Asa ekun’n, titi’n Delɛ Cɛn’n nun’n, n yaci sran kun nun n man amun.+ ?Ɔ maan amun klo kɛ n yaci Zifu’m be Famiɛn’n i nun n man amun?”
40 Be kpannin kekle kpa ekun be seli kɛ: “Cɛcɛ, nán yaci bian nga nun, sanngɛ yaci Barabasi nun!” Kusu nn Barabasi sɔ’n ti awiefuɛ.+
