Isaías 7:1-25
7 Rezin, rei di Siria, i Peka,+ rei di Israel i yu hòmber di Remalías, a sali pa ataká Herúsalèm. Esei tabata tempu ku Ákas+ (yu hòmber di Yótam i ñetu di Uzías) tabata rei di Huda. Pero nan* no a logra konkistá e stat.+
2 Kas* di David a haña e siguiente notisia: “Siria a uni forsa ku Efraím.”*
Ákas i su pueblo a haña hopi miedu, i nan a kuminsá tembla manera palu di mondi ku ta sagudí den bientu.
3 Anto Yehova a bisa Isaías: “Por fabor, abo ku bo yu hòmber Sear-Yasub*+ sali bai topa Ákas na kabamentu di e kanal di awa* di e tanki di awa mas ariba,+ serka di e kaminda grandi ku ta hiba na e lugá kaminda e hendenan ta bai laba paña.
4 Bis’é: ‘Keda trankil. No tene miedu ni no desanimá pa motibu di e furia di Rezin, rei di Siria, i e yu di Remalías.+ E dos reinan ei ta manera stòmpi di palu ku ta saka huma so.
5 Ta bèrdat ku Siria, Efraím i e yu di Remalías a traha un kòmplòt kontra bo, bisando:
6 “Laga nos subi kontra Huda, sker e na pida pida* i konkist’é.* Despues, nos lo nombra e yu di Tabel komo rei di Huda.”+
7 Pero esaki ta loke Señor Soberano Yehova ta bisa:“E kòmplòt ei lo no tin éksito,ni lo e no tuma lugá.
8 Kapital di Siria ta Damasko,i rei di Damasko ta Rezin.Den apénas 65 aña,Efraím lo keda kompletamente destruí, i lo no eksistí mas komo pueblo.+
9 Sí, kapital di Efraím ta Samaria,+i rei di Samaria ta e yu di Remalías.+A ménos ku boso tin fe firme,boso reino lo no keda para firme.”’”
10 Yehova a sigui papia ku Ákas i bis’é:
11 “Pidi ami, Yehova bo Dios, un señal.+ E señal por tuma lugá unda ku bo ke, sea den un lugá hundu manera Graf* òf te na un lugá haltu manera shelu.”
12 Pero Ákas a bisa: “Lo mi no pidi niun señal, ni lo mi no pone Yehova na prueba.”
13 E ora ei, Isaías a bisa: “Skucha mi, por fabor, kas di David. No ta basta ku boso ta kaba ku hende su pasenshi? Awor boso ta kaba ku Dios su pasenshi tambe?+
14 Pues, Yehova mes lo duna boso un señal: Tende! Un mucha muhé* lo sali na estado, i lo e haña un yu hòmber,+ i lo e yam’é Emanuel.*+
15 Ora e yu ei yega edat ku e sa kon pa rechasá loke ta malu i skohe loke ta bon, lo e no tin nada otro pa kome ku no ta manteka i stropi di abeha.
16 Pasobra promé ku e mucha hòmber sa kon pa rechasá loke ta malu i skohe loke ta bon, e pais di e dos reinan ei, ku bo tin asina tantu miedu di dje, lo keda kompletamente bandoná.+
17 Ákas, Yehova lo laga abo i bo pueblo i famia di bo tata pasa den tempu difísil, un tempu ku boso no a pasa aden for di dia ku Efraím a separá for di Huda;+ sí, Dios lo manda e rei di Asiria ataká bo.+
18 Den e tempu ei, Yehova lo flùit pa yama e muskitanan for di e kanalnan mas leu di riu Nilo di Egipto, i lo e flùit pa yama e abehanan ku ta na Asiria.
19 Nan lo bini i baha den e vayenan* hundu i den e burakunan den baranka; i nan lo baha riba tur mata di sumpiña, i nan lo bai na tur lugá di bebe awa.
20 Den e tempu ei, Yehova lo usa e nabaha ku Ákas a hür for di e region di riu Eufrátes,* esta, e rei di Asiria,+ pa feita boso kabes i pa feita e kabeinan na boso pia. I e nabaha lo kita boso barba tambe.
21 Den e tempu ei, un hende lo tene un di su bakanan yòn i dos di su karnénan na bida.
22 I komo ku lo tin abundansia di lechi, hende lo kome manteka, pasobra e hendenan ku a resta den e pais lo no tin nada otro pa kome ku no ta manteka i stropi di abeha.
23 Den e tempu ei, tur kaminda ku ántes tabatin 1.000 mata di wendrùif na balor di 1.000 pida plata lo tin mata di sumpiña i mal yerba so.
24 Hende lo bai einan ku bog i flecha, pasobra henter e pais lo yena ku mata di sumpiña i mal yerba.
25 Lo bo no bai mas den bisindario di e serunan ku ántes nan tabata rosa ku chapi pasobra lo bo tin miedu di mata di sumpiña i mal yerba. E lugánan ei lo bira un lugá pa toro kome yerba i un lugá pa karné kana.”
