Numeri 23:1-30
23 Tsopano Balamu anauza Balaki kuti: “Mundimangire pamalo ano maguwa ansembe+ okwanira 7. Mukatero mundikonzere ng’ombe zamphongo 7, ndi nkhosa zamphongo 7.”
2 Nthawi yomweyo Balaki anachita monga momwe anamuuzira Balamu. Kenako, Balaki ndi Balamu anapereka nsembe. Anapereka ng’ombe yamphongo ndi nkhosa yamphongo paguwa lililonse.+
3 Ndiyeno Balamu anauza Balaki kuti: “Muime pafupi ndi nsembe yanu yopsereza.+ Mundilole ine ndichoke, kuti mwina Yehova akumana nane n’kundilankhula.+ Akatero, zimene andiuzezo n’zimenenso ndinene kwa inu.” Chotero Balamu anapita pamwamba pa phiri.
4 Mulungu atam’peza Balamu,+ iye anamuuza Mulunguyo kuti: “Ndamanga maguwa ansembe 7 m’mizere, ndipo ndapereka nsembe ng’ombe yamphongo ndi nkhosa yamphongo paguwa lililonse.”+
5 Pamenepo Yehova anamuika Balamu+ mawu m’kamwa, n’kumuuza kuti: “Bwerera kwa Balaki, ukamuuze mawu amenewa.”+
6 Iye atabwerera kwa Balaki, anapeza Balakiyo limodzi ndi akalonga onse a ku Mowabu ataima pafupi ndi nsembe yake yopsereza.
7 Pamenepo Balamu anayamba kulankhula mwa ndakatulo,+ kuti:“Balaki mfumu ya Mowabu yandiitana kuchokera ku Aramu,+Kuchokera kumapiri a kum’mawa, kuti:‘Bwera, udzanditembererere Yakobo.Bwera, udzaitanire tsoka pa Isiraeli.’+
8 Ndingathe bwanji kutemberera anthu amene Mulungu sanawatemberere?+Anthu amene Yehova sanawaitanire tsoka, ndingathe bwanji kuwaitanira tsoka?+
9 Pakuti pomwe ndili pano ndikutha kuwaona, pamwamba pa matanthwe pano,Ndikuwaona ndithu, pano pamwamba pa mapiri.Akukhala paokhaokha m’mahema awo,+Iwo akudziona kuti ndi osiyana ndi mitundu ina.+
10 Ndani watha kuwerenga mtundu wa Yakobo,+ wochuluka ngati fumbi,Ndipo ndani watha kuwerenga gawo limodzi mwa magawo anayi a Isiraeli?Moyo wanga ufe imfa ya olungama,+Ndipo mathero anga akhale ngati awo.”+
11 Balaki atamva zimenezi anafunsa Balamu kuti: “N’chiyani mwandichitachi? Ndinakutengani kuti mudzatemberere adani anga, koma inu mwawadalitsa kwambiri.”+
12 Koma iye anamuyankha kuti: “Kodi chilichonse chimene Yehova wandiika m’kamwa, si chimene ndinayenera kunena?”+
13 Ndiyeno Balaki anauza Balamu kuti: “Tabwerani chonde, tiyeni tipite kumalo ena kumene mungathe kuwaona anthuwo. Simukaona onse, koma mukangoona okhawo amene ali chakufupi.+ Mukanditembererere amenewo.”+
14 Chotero anamutengera ku Zofimu, pamwamba pa phiri la Pisiga.+ Kumeneko anamanga maguwa ansembe 7, n’kupereka nsembe ng’ombe yamphongo ndi nkhosa yamphongo paguwa lililonse.+
15 Pambuyo pake, Balamu anauza Balaki kuti: “Muime pano, pafupi ndi nsembe yanu yopserezayi koma ine mundilole ndichoke ndikalankhule ndi Mulungu uko.”
16 Kumeneko Yehova analankhuladi ndi Balamu, n’kumuika mawu m’kamwa, ndipo anamuuza kuti:+ “Bwerera kwa Balaki+ ukamuuze zimenezi.”
17 Balamu atabwerera kwa Balaki, anam’peza ataima pafupi ndi nsembe yake yopsereza, akalonga a ku Mowabu ali naye limodzi pamenepo. Ndiyeno Balaki anafunsa Balamu kuti: “Kodi Yehova wati chiyani?”
18 Pamenepo Balamu anayambanso kulankhula mwa ndakatulo, kuti:+“Nyamuka, Balaki iwe, tamvera.Tchera khutu kwa ine, iwe mwana wa Zipori.+
19 Mulungu si munthu, woti anganene mabodza,+Si mwana wa munthu, woti angadzimve kuti ali ndi mlandu.+Kodi ananenapo kanthu koma osachita,Analankhulapo kanthu kodi koma osakwaniritsa?+
20 Inetu ndalamulidwa kudzadalitsa,Ndipo Iye wadalitsa,+ ine sindisintha zimenezo.+
21 Iye sanaone mphamvu yamatsenga+ iliyonse ikuchita kanthu pa Yakobo,Ndipo sanaone Isiraeli akuponyeredwa vuto.Mulungu wake Yehova ali naye,+Ndipo mfuu yotamanda mfumu ikumveka pakati pake.
22 Mulungu wawatulutsa ku Iguputo.+Akuwayendetsa mwa liwiro la ng’ombe yam’tchire yamphongo.*+
23 Palibe amene walodza Yakobo,+Ngakhale kuchesa Isiraeli.+Za Yakobo ndi Isiraeli, adzati,‘Mwaonatu zimene Mulungu wachita!’+
24 Taonani, mtundu udzadzuka ngati mkango,Udzanyamuka monga mkango.+Sugona pansi mpaka ugwire nyama,Ndipo udzamwa magazi a ophedwawo.”+
25 Tsopano Balaki anauza Balamu kuti: “Ngati mwalephera kuwatemberera ngakhale pang’ono pokha, ndiye musawadalitsenso m’pang’ono pomwe.”
26 Pamenepo Balamu anafunsa Balaki kuti: “Kodi sindinanene kwa inu kuti, ‘Ndichita zokhazo zimene Yehova andiuze’?”+
27 Koma Balaki anauza Balamu kuti: “Chonde tabwerani. Tiyeni tipite kumalo enanso. Mwina kumeneko Mulungu woona angalole kuti munditembererere anthuwa.”+
28 Balaki atatero, anatengera Balamu pamwamba pa phiri la Peori, loyang’ana ku Yesimoni.+
29 Kumeneko Balamu+ anauza Balaki kuti: “Mundimangire pamalo ano maguwa ansembe 7, ndipo mundikonzere ng’ombe zamphongo 7, ndi nkhosa zamphongo 7.”+
30 Chotero Balaki anachita monga momwe Balamu ananenera. Anapereka nsembe ng’ombe yamphongo ndi nkhosa yamphongo paguwa lililonse.+
Mawu a M'munsi
^ Mwina nyama imeneyi inali yooneka ngati njati.
