Proverbio 8:1-36
8 Saan aya nga agpukpukkaw ti sirib?
Saan aya nga ipigpigsa ti pannakatarus ti timekna?+
2 Kadagiti nangato a lugar+ iti igid ti dalan,Nagpuesto kadagiti nagsangaan ti dalan.
3 Iti abay dagiti pagserkan ti siudad,Kadagiti ruangan,Ipukpukkawna:+
4 “Umaw-awagak kadakayo, O tattao;Pukpukkawak ti tunggal maysa.*
5 Dakayo nga awanan kapadasan, agmasiribkayo;+Dakayo a maag, gun-odenyo ti mannakaawat a puso.*
6 Dumngegkayo, ta napateg ti ibagak,Umiso ti ibaga ti bibigko;
7 Ta iyarasaas ti ngiwatko ti kinapudno,Ken kagura ti bibigko ti dakes.
8 Nalinteg amin nga ibaga ti ngiwatko.
Awan kadagita ti tiritir wenno killo.
9 Nalawag dagita kadagiti makatarusKen umiso kadagidiay nakasarak iti pannakaammo.
10 Awatenyo ti disiplinak imbes a ti pirak,Ken ti pannakaammo imbes a ti kasayaatan a balitok.+
11 Ta nasaysayaat ti sirib ngem dagiti korales;*Saan a maipada iti dayta ti amin a dadduma pay a matarigagayan a banag.
12 Siak, ti sirib, agnanaedak a kadua ti pannakaawat;Nabirokak ti pannakaammo ken abilidad nga agpanunot.+
13 Ti panagbuteng ken Jehova kaipapananna ti pananggura iti dakes.+Kagurak ti kinapannakkel ken kinatangsit+ ken dakes a dalan ken kinaulbod.+
14 Adda kaniak ti nasayaat a balakad ken praktikal a sirib;+Kukuak ti pannakaawat+ ken bileg.+
15 Agturturay dagiti ari babaen kaniak,Ken agar-aramid dagiti nangato nga opisial iti nalinteg a bilin.+
16 Agturturay dagiti prinsipe babaen kaniak,Ken nalinteg ti panangukom dagiti natan-ok.
17 Ayatek dagidiay mangay-ayat kaniak,Ken masarakandakto dagidiay mangbirbirok kaniak.+
18 Adda kaniak ti kinabaknang ken dayag,Manayon a kinabaknang* ken kinalinteg.
19 Nasaysayaat ti bungak ngem ti napasudi a balitok,Ken nasaysayaat ti patpataudek ngem ti kasayaatan a pirak.+
20 Magnaak iti dana ti kinalinteg,Iti tengnga dagiti dalan ti hustisia;
21 Adu a tawid ti itedko kadagidiay mangay-ayat kaniak,Ken punnuek dagiti kamarinda.
22 Pinataudnak ni Jehova kas pangrugian ti dalanna,+Ti kaunaan kadagiti gapuananna idi un-unana.+
23 Naisaadakon idi pay un-unana,*+Idi rugrugi, sakbay nga adda ti daga.+
24 Napataudak* idi awan pay dagiti adalem a danum,+Idi awan pay dagiti ubbog nga agliplippias iti danum.
25 Napataudak sakbay a naisaad dagiti bantay,Sakbay nga adda dagiti turod,
26 Idi saanna pay nga inaramid ti daga ken dagiti tanapnaWenno dagiti immuna a bingkol ti daga.
27 Addaak idi insaganana ti langit,+Idi minarkaanna ti nagsabatan* ti langit ken danum,+
28 Idi insaadna* dagiti ulep iti ngato,Idi insaadna dagiti adalem a danum,
29 Idi nangted iti linteg para iti baybayA saan a lumbes dagiti danumna iti imbilinna,+Idi insaadna* dagiti pundasion ti daga,
30 Addaak idi iti abayna kas eksperto a trabahador.+
Siak ti nangnangruna a pakaragsakanna+ iti inaldaw;Kanayon a naragsakak iti sanguananna;+
31 Naragsakanak iti daga a pagnaedan ti tao,Ken nangnangruna a pakaragsakak dagiti annak ti tattao.*
32 Ita, dumngegkayo kaniak, annakko;Wen, naragsak dagidiay mangsurot iti dalanko.
33 Ipangagyo ti disiplina+ ket agbalinkayo a masirib,Ken dikay baybay-an dayta.
34 Naragsak ti tao a dumngeg kaniakBabaen ti nasapa nga iyaayna* kadagiti ridawko iti inaldaw,Babaen ti panagurayna iti abay ti pagserkan ti balayko;
35 Ta ti mangbirok kaniak masarakannanto ti biag,+Ken umawatto iti pabor ni Jehova.
36 Ngem ti saan a mangikankano kaniak dangdangranna ti bagina,*Ken dagidiay manggura kaniak ay-ayatenda ni patay.”+
Footnotes
^ Lit., “annak a lallaki ti tattao.”
^ Lit., “tarusanyo ti puso.”
^ Wenno “Dagiti natawid a prinsipio.”
^ Wenno “nakabaybayagen a tiempo.”
^ Wenno “Nayanakak babaen ti panagpasikal.”
^ Lit., “sirkulo.”
^ Lit., “pinatibkerna.”
^ Wenno “binilinna.”
^ Wenno “ti sangatauan.”
^ Wenno “Babaen ti panagtalinaedna a siririing.”
^ Wenno “kararuana.”
