Proverbio 3:1-35

  • Agmasirib ken agtalek ken Jehova (1-12)

    • Idayaw ni Jehova iti napapateg a banag (9)

  • Mangted ti sirib iti kinaragsak (13-18)

  • Mangted ti sirib iti kinatalged (19-26)

  • Umiso a panangtrato iti sabsabali (27-35)

    • Agaramid iti kinaimbag iti sabsabali no posible (27)

3  Anakko, dimo lipaten ti pannursurok,*Ket tungpalen koma ta pusom dagiti bilinko,   Ta nayonandanto iti adu nga aldawKen tawen ti biagmo ken ipaayandaka iti talna.+   Dimo ipalubos a panawannaka ti napudno nga ayat ken kinamatalek.*+ Igalutmo dagita iti tengngedmo;Isuratmo dagita iti pusom;+   Iti kasta, magun-odmo ti pabor ti Dios ken ti tao+Ken ibilangda a nauneg ti pannakatarusmo.   Agtalekka ken Jehova+ iti amin a pusom,Ket dika agtalek* iti bukodmo a pannakaawat.+   Ikabilangam iti amin a dalanmo,+Ket palintegennanto dagiti danam.+   Dika agtalek iti bukodmo a sirib.+ Agbutengka ken Jehova ket umadayoka iti dakes.   Daytanto ti mangpaimbag iti bagim*Ken mangbang-ar kadagiti tulangmo.   Idaydayawmo ni Jehova kadagiti napateg a banagmo,+Ken iti umuna a bungbunga* ti amin nga apitmo;*+ 10  Iti kasta, mapnonto dagiti kamarinmo,+Ken aglippiasto dagiti tangkem* iti baro nga arak. 11  Anakko, saanmo a laksiden ti disiplina ni Jehova,+Ken saanmo a guraen ti pannubngarna,+ 12  Ta tubngaren ni Jehova dagidiay ay-ayatenna,+No kasano a tubngaren ti ama ti anak a pagragsakanna.+ 13  Naragsak ti tao a makasarak iti sirib,+Ken ti tao a makagun-od iti pannakatarus; 14  Nasaysayaat ti pananggun-od iti dayta ngem ti pananggun-od iti pirakKen nasaysayaat dayta a gunggona ngem iti balitok.+ 15  Napatpateg dayta ngem kadagiti korales;*Saan a maikompara iti aniaman a tarigagayam. 16  Atiddog a biag ti adda iti kannawan nga imana;Kinabaknang ken dayag ti adda iti kannigid nga imana. 17  Makaay-ayo dagiti dalanna,Ken natalna ti amin a danana.+ 18  Maysa dayta a kayo ti biag kadagidiay kumpet iti dayta,Ket maawaganto iti naragsak dagidiay mangpetpet iti dayta.+ 19  Imbangon ni Jehova ti daga babaen ti sirib.+ Sititibker nga isaadna ti langit babaen ti pannakatarus.+ 20  Babaen ti pannakaammona, naluktan dagiti adalem a danumKen nagarbis dagiti naulep a tangatang.+ 21  Anakko, saanmo a liplipatan dagita.* Salaknibam ti praktikal a sirib ken abilidad nga agpanunot; 22  Dagitanto ti mangipaay kenka iti biagKen agbalinda nga arkos iti tengngedmo; 23  Iti kasta, natalgedkanto a magna iti dalanmo,Ket saanto a pulos maitibkol ti sakam.*+ 24  Awanto ti pagbutngam no agiddaka;+Agiddakanto a naimas ti turogmo.+ 25  Saankanto nga agbuteng iti bigla a dumteng a didigra+Wenno iti bagyo a dumteng kadagiti dakes.+ 26  Ta naan-anayto a makapagtalekka ken Jehova;+Saannanto nga ipalubos a matiliw ti sakam.+ 27  Dimo ipaidam ti naimbag kadagidiay rumbeng a pangipaayam* iti dayta+No kabaelam* ti tumulong.+ 28  Dimo ibaga iti kaarrubam, “Inkan; agsublikanto! Ikkanka inton bigat,” No maitedmo met ita. 29  Dimo panggepen a dangran ti kaarrubam+No sitatalged a makipagnanaed kenka. 30  Dika makiriri iti maysa a tao nga awan gapgapuna+No awan ti dakes nga inaramidna kenka.+ 31  Dimo apalan ti naranggas a tao+Ken dimo pilien ti aniaman nga ar-aramidenna, 32  Ta kagura ni Jehova ti nasikap a tao,+Ngem nasinged a gayyemna ti nalinteg.+ 33  Ilunod ni Jehova ti balay ti dakes a tao,+Ngem bendisionanna ti pagtaengan ti nalinteg.+ 34  Ta laisenna dagiti managuyaw,+Ngem maragsakan kadagiti naemma.+ 35  Dayaw ti tawiden dagiti masirib,Ngem pannakaibabain ti pagpannakkel dagiti maag.+

Footnotes

Wenno “lintegko.”
Wenno “kinapudno.”
Lit., “agsadag.”
Lit., “pusegmo.”
Wenno “kasayaatan.”
Wenno “ganansiam.”
Wenno “pagpespesam iti ubas.”
Kitaem ti Glosario.
Nalawag a tumukoy kadagiti kualidad ti Dios a nadakamat kadagiti napalabas a bersikulo.
Wenno “maidungpar ti sakam iti aniaman.”
Wenno “kadagidiay agkasapulan.”
Wenno “kabaelan ti imam.”