Proverbio 31:1-31

  • SASAO NI ARI LEMUEL (1-31)

    • Asino ti makasarak iti nagsayaat nga asawa a babai? (10)

    • Nagaget ken napinget (17)

    • Adda iti dilana ti kinaimbag (26)

    • Padayawan dagiti annak ken asawana (28)

    • Agkupas ti imnas ken pintas (30)

31  Ti sasao ni Ari Lemuel, ti napateg a mensahe nga inted ti inana a pakasursuruanna:+   Ania ti rumbeng nga ibagak, O anakko,Ania, O anakko a naggapu iti tianko,Ken ania, O anakko nga inkarik?+   Dimo ited ti pigsam kadagiti babbai,+Dimo met suroten dagiti dalan a pakadadaelan dagiti ari.+   Saan a para kadagiti ari, O Lemuel,Saan a rumbeng nga uminum ti ari iti arakWenno ibaga dagiti agturay, “Ayan ti inumek?”+   Tapno saanda nga uminum ket malipatanda ti lintegKen ipaidamda ti kalintegan dagiti nanumo.   Ikkanyo iti naingel nga inumen dagidiay dandanin matay+Ken arak dagidiay marirriribukan.*+   Bay-anyo nga uminumda ket malipatanda ti kinapanglawda;Bay-anyo a saanda a malagip ti problemada.   Agsaoka agpaay kadagiti umel;Idepensam ti kalintegan ti amin a dandanin matay.+   Agsaoka ket mangukomka a sililinteg;Idepensam ti kalintegan* dagiti nanumo ken napanglaw.+ א [Alef] 10  Asino ti makasarak iti nagsayaat* nga asawa a babai?+ Isu ket adayo a napatpateg ngem kadagiti korales.* ב [Beth] 11  Naimpusuan nga agtalek kenkuana ti asawana,Ket awan pagkurangan ti asawana. ג [Gimel] 12  Gunggonaanna ti asawana iti naimbag, saan nga iti dakes,Iti amin nga aldaw ti panagbiagna. ד [Daleth] 13  Mangala iti delana ken lienso;Maragsakan nga agtrabaho babaen ti imana.+ ה [He] 14  Kayariganna dagiti barko ti komersiante,+A mangyeg iti taraonna manipud iti adayo. ו [Waw] 15  Bumangon met bayat a nasipnget pay,Nga ipaayna ti taraon ti sangakabbalayannaKen ilak-amanna dagiti adipenna a babbai.+ ז [Zayin] 16  Sinukimatna ti maysa a talon sa ginatangna;Agmula kadagiti ubas babaen ti nagbannoganna.* ח [Heth] 17  Agsagana nga agtrabaho iti nadagsen,*+Ken papigsaenna dagiti takiagna. ט [Teth] 18  Makitana a mayat ti negosiona;Saan a maid-iddep ti lamparana iti rabii. י [Yod] 19  Petpetanna ti ungkal,Ken iggamanna ti takbian.*+ כ [Kaf] 20  Iyawatna ti dakulapna kadagiti nanumo,Ken iyukradna ti imana kadagiti napanglaw.+ ל [Lamed] 21  Saanna a pakadanagan ti sangakabbalayanna uray iti tiempo ti lam-ek,Ta naimeng* ti bado ti intero a pamiliana. מ [Mem] 22  Agaramid iti abbong ti katrena. Ti badona ket lienso ken delana a purpura. נ [Nun] 23  Ti asawana ket pagaammo kadagiti ruangan ti siudad,+A sadiay a makikatkatugaw kadagiti panglakayen iti daga. ס [Samekh] 24  Agaramid ken aglako iti lienso a bado*Ken suplayanna iti sinturon dagiti komersiante. ע [Ayin] 25  Nakakawes iti bileg ken kinapintas,Ken saan a madanagan iti masanguanan.* פ [Pe] 26  Agsao ti ngiwatna iti kinasirib;+Adda iti dilana ti linteg ti kinaimbag.* צ [Tsade] 27  Asikasuenna ti aktibidad iti sangakabbalayanna,Ken saan a mangan iti tinapay ti kinasadut.+ ק [Qof] 28  Tumakder dagiti annakna a padayawanda;Tumakder ti asawana a mangpadayaw kenkuana. ר [Resh] 29  Adu ti nagsayaat* a babbai,Ngem sika—​atiwem amin ida. ש [Shin] 30  Makaallilaw ti imnas, ken agkupas* ti pintas,+Ngem maidaydayawto ti babai nga agbuteng ken Jehova.+ ת [Taw] 31  Gunggonaam ti aramidna,*+Ket maidaydayaw koma kadagiti ruangan ti siudad gapu kadagiti aramidna.+

Footnotes

Wenno “naladingit ti kararuana.”
Wenno “Ipakaasim ti pagimbagan.”
Wenno “makabael.”
Kitaem ti Glosario.
Wenno “urnongna.” Lit., “bunga ti imana.”
Lit., “Bariksanna ti padingpadingna iti pigsa.”
Ti ungkal ken takbian ket babassit a kayo a mausar iti panagabel wenno panagaramid iti sinulid ken sag-ut.
Lit., “doble.”
Wenno “makin-uneg a bado.”
Wenno “agkatawa iti masanguanan nga aldaw.”
Wenno “naayat nga instruksion; linteg ti napudno nga ayat.”
Wenno “makabael.”
Wenno “awan serserbi.”
Lit., “Itedmo ti bunga ti imana.”