Para sa mga Taga-Galacia 6:1-18

  • Magtinabangay sa mga palas-anon (1-10)

    • Kon unsay gipugas maoy anihon (7, 8)

  • Pagkatinuli dili importante (11-16)

    • Bag-ong linalang (15)

  • Konklusyon (17, 18)

6  Mga igsoon, bisan kon ang usa ka tawo makahimog sayop nga lakang ug wala makamatikod niini, kamong hamtong nga mga Kristohanon* paningkamoti nga tul-iron siya sa malumong paagi.+ Apan bantayi ang imong kaugalingon,+ kay basig matental sab ka.+  Padayon mong magtinabangay sa inyong bug-at nga mga palas-anon,+ sa ingon matuman ninyo ang balaod sa Kristo.+  Kay kon ang usa naghunahuna nga importante siya apan ang tinuod dili diay,+ gilimbongan niya ang iyang kaugalingon.  Apan angayng susihon sa matag usa ang iyang kaugalingong binuhatan,+ aron malipay siya sa iyang mga buhat ug dili tungod sa pagtandi sa iyang kaugalingon sa uban.+  Kay ang matag usa magpas-an sa iyang kaugalingong palas-anon.*+  Dugang pa, si bisan kinsa nga natudloan sa pulong sa Diyos makig-ambit sa tanang maayong butang uban sa nagtudlo kaniya.+  Ayaw palimbong: Ang Diyos dili malimbongan.* Kay kon unsay gipugas sa usa ka tawo, mao pod ang iyang anihon;+  kay siya nga nagpugas maylabot sa iyang unod moanig daotan* nga resulta sa iyang makasasalang mga tinguha, apan siya nga nagpugas maylabot sa espiritu moani ug kinabuhing walay kataposan gikan sa espiritu.+  Busa dili ta mohunong sa pagbuhat ug maayo, kay sa takdang panahon kita moani kon dili ta maluya.*+ 10  Busa kon naa tay kahigayonan, buhaton nato ang maayo ngadto sa tanan, apan ilabina sa atong mga igsoon sa pagtuo. 11  Ako mismo ang nagsulat kaninyo, ug tan-awa kon unsa ka dagko ang mga letra. 12  Ang tanan nga gustong magpahimuot sa mga tawo mao ang nagpugos ninyo nga magpatuli, aron lang dili sila lutoson tungod sa estaka sa pagsakit* sa Kristo. 13  Kay bisan kadtong nagpatuli wala magsunod sa Balaod,+ apan gusto nilang magpatuli mo aron makapanghambog sila bahin sa inyong lawas. 14  Apan hinaot dili ko manghambog, gawas lang sa atong Ginoong Jesu-Kristo nga namatay sa estaka sa pagsakit.*+ Para nako, ang kalibotan gipatay* pinaagi niya, apan para sa kalibotan, ako gipatay pinaagi niya. 15  Kay dili importante ang pagkatinuli o ang pagkadili-tinuli,+ kondili ang pagkahimong bag-ong linalang.+ 16  Ug para sa tanang nagsubay niini nga sukdanan sa panggawi, hinaot ang kalinaw ug kaluoy maanaa kanila, oo, sa Israel sa Diyos.+ 17  Sukad karon, wala na untay mosamok nako, kay naa sa akong lawas ang mga marka ingong ulipon ni Jesus.+ 18  Mga igsoon, hinaot maanaa kaninyo ang dili hitupngang pagkamaayo* sa atong Ginoong Jesu-Kristo tungod sa espiritu nga inyong gipakita. Amen.

Mga Footnote

O “kamong gigiyahan sa espiritu sa Diyos.”
O “responsibilidad.”
O “dili puwedeng tamayon.”
Literal, “kalaglagan.”
O “moundang.”
Tan-awa sa Glossary.
Tan-awa sa Glossary.
O “gilansang sa estaka.”
Tan-awa sa Glossary.