Jesuspa discipulonkunaqa manan entienderankuchu imaraykus Jesuspa sepulturan ch’usaq kasharan chayta (Mateo 28:9, 10; Lucas 24:11). Chay p’unchayqa 16 de nisán domingon karan. Chay p’unchay tardentan Jesuspa iskay discipulonkuna Jerusalenmanta Emaús llaqtaman risharanku, jujninmi karan Cleopas sutiyoq. Chay llaqtaqa 11 kilometropi jinan kasharan.

Chayman rishaqtinkun juj runa paykunaman achhuykuspa tapuran: “¿Imamantan afantaraq rimashankichis?”, nispa. Jinan Cleopasqa niran: “¿Sapallan tiyaq waj llaqtayoq runachu kanki, chaychu mana yachanki kay p’unchaykunapi Jerusalén llaqtapi imakunachus pasasqanta?”, nispa. Chay runataq niran: “¿Imakunataq pasaranri?”, nispa (Lucas 24:17-19).

Paykunataq niranku: ‘¿Manachu Jesusmanta imatapas uyariranki? Noqaykuqa: “Paychá Israel llaqtataqa kacharichinqa”, nispan nisharayku’, nispa (Lucas 24:19-21).

Jinaspan paykunaqa willaranku wakin warmikuna Jesuspa sepulturanta ch’usaqta tarisqankumanta, chaypi rijuriq angelkunamanta, chay angelkuna “Jesusqa kausashanmi” nisqankumanta, wakin qharikunapas ‘chay warmikunaq nisqanta jinatapuni tarimusqankumantawan’ (Lucas 24:24).

Jinan chay runaqa paykunata niran: ‘Yau mana yuyayniyoq, mana entiendeq sonqoyoq runakuna, ¿imaraykun mana entiendenkichischu profetakunaq llapa rimasqanta? ¿Manachu Cristoqa chaykunata ñak’arinanpuni karan?’, nispa (Lucas 24:25, 26). Jinaspataq Diospa simin qelqapi Cristomanta willaq profeciakunata entiendechiran.

Emaús llaqta qayllaman chayaqtinkutaq iskayninku astawan yachayta munaspa chay runata niranku: “Ama jinachu kay, noqaykuwan qhepakuy, intipas ñamá chinkaykapushanña”, nispa. Jinan chay runaqa paykunawan kuska wasiman jaykuran. Paykunawan mijushaspataq t’antata jap’ispa Diosman graciasta qoran, phasmispataq paykunaman jaywaran. Jinaqtinmi paykunaqa repararanku chay runa Jesús kasqanta, paymi ichaqa qonqaylla ch’usaqman tukupuran (Lucas 24:29-31). Chaywanmi yacharanku Jesús kausarimpusqanta.

Jinan paykunaqa ninakuranku: “¿Manachu ñanpi rimapayawaspanchis Diospa simin qelqaq nisqanta llapanta entiendechiwashaqtinchisqa sonqonchisraq llanllariran?”, nispa (Lucas 24:32). Jinaspataq usqhaylla Jerusalenman kutiranku, chaypin apostolkunata jujkunatawan juñusqata tariranku. Manaraq imatapas nishaqtinkutaq paykuna willaranku: “Cheqaqtapunichá Señorqa kausarimpun, Simonmanpas rijurimusqan”, nispa (Lucas 24:34). Jinan Cleopaspas juj kaqpiwan willaranku paykunamanpas Jesús rijurimusqanmanta.

Chaypi kaqkunaqa judiokunata manchakusqankuraykun allin wisq’asqa chay wasipi kasharanku, chayllamanmi Jesús chaupinkupi rijuriran, jinaspa niran: “Thaj kay kachun qankunapaq”, nispa. Paykunan ichaqa sinchitapuni mancharikuranku “juj espirituchá kayqa” nispanku (Lucas 24:36, 37; Mateo 14:25-27).

Chaymi Jesusqa paypuni kasqanta rikuchinanpaq niran: “¿Imaraykun mancharisqa kashankichis? ¿Imaraykun sonqoykichispipas iskayashankichis? Qhawariychis makiykunata chakiykunata, noqa kikiymi kashani. Llamiykuwaychis, qhawaykuwaychis; juj espirituqa manan tulluyoqchu ni aychayoqchu ¿riki? Rikuwasqaykichis jinapas noqaqa tulluyoqmi aychayoqmi kashani”, nispa (Lucas 24:36-39). Paykunaqa kusisqaña kasharanku chaypas,  manaraqmi creesharankuchu imachus rikushasqankuta.

Chaymi Jesusqa nillarantaq: “¿Kashanchu imallaykichispas mijunapaq?”, nispa. Jinan paykunaqa challwa kankata qoranku, Jesustaq paykunaq rikushasqan mijuran. Chaymantataq niran: “Qankunawanraq kashaspaymá riki niraykichis: ‘Moisespa chaskisqan kamachikuy simipi, profetakunaq qelqasqanpi, salmo takikunapipas noqamanta qelqasqa kaqqa junt’akunanpunin’”, nispa (Lucas 24:41-44).

Chaymantataq imaynan Cleopastapas juj kaq discipulontawan ñanpi entiendechiran Diospa simin qelqakunata, chhaynata paykunatapas yanaparan. Niranmi: “Cristoqa ñak’arinanmi karan, kinsa p’unchaymantataq wañusqanmanta kausarimpunan karan, paypa sutinpitaq Jerusalenmanta qallarispa llapa nacionkunapi willasqa kanan karan runakuna juchankumanta pesapakuspa perdonasqa kanankumanta willakuy. Chaykunamantan qankunaqa willankichis”, nispa (Lucas 24:46-48).

Chay kutipiqa manan apóstol Tomasqa chaypichu kasharan, chaymi Jesusta rikusqankumanta willaqtinku payqa niran: “Manachus clavokunaq t’oqosqanta makinpi rikusaq, dedoytapas clavokunaq t’oqosqanman mana winasaqchu, waqtan t’urpusqankumanpas mana makiyta winasaqchu chayqa, manapunin creesaqchu”, nispa (Juan 20:25).

Chaymanta pusaq p’unchay qhepamanmi Jesuspa discipulonkunaqa wajmanta wasi ukhupi wisq’asqa kasharanku, chaypin Tomaspas kasharan. Chayllamanmi Jesusqa chaupinkupi rijurillarantaq, jinaspa niran: “Thaj kay kachun qankunapaq”, nispa. Chaymantataq Tomasta niran: “Qhawariy makiyta, dedoykita kayman winaykuy; makiykitapas waqtanniyman winaykuy, amaña iskayaychu, aswanpas creey”, nispa. Jinan Tomasqa niran: “¡Señorníy, Diosníy!”, nispa (Juan 20:26-28). Chhaynatan niran Jehová Diospa representanten Jesús kasqanrayku.

Jinan Jesusqa Tomasta niran: “¿Rikuwasqaykiraykuchu creenki? Kusisqa kachunku mana rikuspalla creeqkunaqa”, nispa (Juan 20:29).