Kichay leenaykipaq

Índice nisqaman riy

 122 CAPÍTULO

Jesús altos patapi último mañakusqan

Jesús altos patapi último mañakusqan

JUAN 17:1-26

  • DIOSTA WAWANTAWAN REQSIQKUNA WIÑAY KAUSAYNIYOQ KANANKUMANTA

  • DIOSWAN JESUSWANQA JUJLLAN KANKU, CHHAYNAN APOSTOLKUNAPAS KANANKU KARAN

Apostolninkunata munakusqanraykun Jesusqa manaraq ripushaspa paykunata preparasharan. Jinaspan Yayanta niran: “Yayáy, ñan hora chayaramunña. Churiykita jatunchay paypas qanta jatunchanasuykipaq, chhaynapi lliu runata kamachinanpaq atiyta qosqaykiman jina, payman jap’ichisqayki lliu runakunaman wiñay kausayta qonanpaq”, nispa (Juan 17:1, 2).

Chay nisqanwanmi Jesusqa rikuchisharan Diosta jatunchay ancha importante kasqanta. Chaymantapas allintan rikuchisharan paypa wañusqanrayku runakuna wiñay kausayman aypay atisqankuta, payqa ‘lliu runata kamachinanpaq atiyniyoq kasqanraykun’ chay wiñay kausayta qoyta atiran. Ichaqa, ¿imatan chaypaq runakuna ruwananku karan? Chaymantan Jesús niran: “Paykuna wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa (Juan 17:3).

Yayata Churitawan reqsiq runaqa paykunamantan anchata sientenan, paykuna jinan imatapas qhawarinan, paykuna jinan sumaq sonqo, jujkunata allin rikuq kanan. Chaymantapas Dios jatunchaytan ñaupaqtaqa maskhanan wiñay kausaymantaqa. Chaymantan Jesusqa niran:

“Noqaqa ñan tukuniña qowasqayki llank’anataqa, chaywanmi kay pachapi jatunchaykiña. Chhaynaqa, Yayáy, ladoykipi kachispa jatunchaway, manaraq kay pachapi runakuna kashaqtin jatunchasqa kasqay jatunchaywan”, nispa (Juan 17:4, 5). Chaywanmi Jesusqa Diosmanta mañakusharan wañuymanta kausarichispa cieloman pusapunanta.

Jesusqa nillarantaqmi: “Kay pachamanta qowasqayki runakunamanmi sutiykita reqsichiniña. Paykunaqa qanpan karan, ichaqa noqamanmi qopuwaranki”, nispa (Juan 17:6). Jesusqa Diospa sutinta rimasqanmantapas allintan apostolninkunaman entiendechiran imayna sonqoyoqchus Dios kasqanta, imaynatachus runakunata qhawarisqantapas.

Chaymantan Jesusqa rimaran imaynapis apostolkuna payta, Jehová Diostapas allinta reqsiranku chayta. Niranmi: “Chaytaqa yachanku lliu ima niwasqaykikunata paykunaman willasqayraykun, chaykunata chaskikuspan paykunaqa yachanku sutiykipi jamusqayta, creenkutaq qanpuni kachamuwasqaykitapas”, nispa (Juan 17:8).

Chaymantataq Jesusqa niran: “Paykunapaqmi mañakamuyki, manan kay pachapaqchu, aswanpas qowasqaykikunapaqmi, paykuna qanpa kasqankurayku [...]. Yayáy, qanqa ch’uyan kanki, qowasqayki sutiykirayku paykunata cuiday, chhaynapi paykunapas noqanchis jina jujlla kanankupaq. [Paykunataqa] noqan cuidaqpas kani; manan mayqenninkupas chinkanqachu, aswanmi jujlla”, nispa. Chay chinkanan kaqqa Judas Iscarioten karan (Juan 17:9-12).

Chaymantataq Jesusqa niran: “Kay pacha runakunan paykunata cheqnikunku. Noqaqa mañakamushayki manan kay pachamanta paykunata orqonaykipaqchu, aswanpas Satanasmanta cuidanaykipaqmi. Imaynan noqapas mana kay pacha runakuna jinachu kani, chhaynallataqmi paykunapas mana kay pacha runakuna jinachu kanku”, nispa (Juan 17:14-16). Apostolkunaqa Saqraq kamachisqan runakuna ukhupiña tiyasharanku chaypas, chay runakunaq mana allin kausayninmanta t’aqasqan kananku karan.

Chaypaqmi paykunaqa “ch’uya” otaq Diospaq t’aqasqa kananku karan; Diospa simin qelqakunaman jina, Jesuspa yachachisqanman jinan kausananku karan. Chaymi Jesusqa Yayanta niran: “Cheqaq kaqwan paykunata ch’uyanchay;  simiykin cheqaq kaqqa”, nispa (Juan 17:17). Tiempowanqa chay ‘cheqaq kaq’ yachachikuykunamanmi yapakuran wakin apostolkunaq qelqasqan librokuna.

Jesusqa nillarantaqmi. “Manan paykunallapaqchu [apostolkunallapaqchu] noqaqa mañakamushayki, pikunachus paykunata uyarispa noqapi iñinqaku chaykunapaqwanmi mañakamushayki, chhaynapi llapallanku jujlla kanankupaq; imaynan qanpas, Yayáy, noqawan jujlla kanki, noqapas qanwan jujlla kani, chhaynallataq paykunapas noqanchiswan jujlla kanankupaq”, nispa (Juan 17:20, 21). ¿Imaynapin Jesuswan Yayanwan jujlla karanku? Tukuy imatapas juj yuyaylla ruwasqankupin. Jesusqa discipulonkunapas chhayna kanankutan munaran.

Chaykunata nisqan ñaupaqllatan Jesusqa apostolkunata niran: ‘Yayaypa wasinmanmi rishani qankuna maypichus tiyanaykichispaq preparaq’, nispa (Juan 14:2, 3). Chaymantan Jesusqa Yayanta niran: “Yayáy, qowasqayki runakunapaqmi mañakamuyki maypichus kasaq chaypi paykunapas noqawan kuska kanankupaq, chhaynapi qowasqayki qhapaq atiyta rikunankupaq, munakuwasqaykiraykun chaytaqa qowaranki manaraq runakuna kay pachapi mirayta qallarishaqtinku”, nispa (Juan 17:24). Chaywanmi Jesusqa rikuchisharan manaraq Adán Evawan wawayoq kashaqtinku payta Dios anchata munakusqanta.

Mañakuyninta tukushaspan Jesusqa wajmanta rimaran Diospa sutinmanta, chaymantapas astawan rimaran imaynas Yayanqa apostolninkunata llapan iñiqkunatawan munakun chayta. Niranmi: “Paykunamanmi noqaqa sutiykita reqsichini, reqsichishallasaqtaqmi kanpas, chhaynapi paykunapas munakuwasqayki munakuyta rikuchinankupaq”, nispa (Juan 17:26).