Kichay leenaykipaq

Índice nisqaman riy

 109 CAPÍTULO

Jesús contranpi kaqkunata juchachan

Jesús contranpi kaqkunata juchachan

MATEO 22:41-23:24 MARCOS 12:35-40 LUCAS 20:41-47

  • ¿PIQPA CHURINMI CRISTO KARAN?

  • JESÚS RIKUCHIN CONTRANPI KAQKUNA ISKAY UYA KASQANKUTA

Jesuspa contranpi kaqkunaqa manan pantachiyta atirankuchu (Lucas 20:20). Chaymi Jesusqa paykunatañataq tapuyta qallariran chay 11 de nisán martes p’unchaypi. Niranmi: “¿Ima niwaqchistaq Cristomanta? ¿Piqpa Churintaq payri?”, nispa. Paykunataq Davidpa mirayninmanta jamunanta yachaspa niranku: “Davidpa Churinmi”, nispa (Mateo 9:27; 12:23; 22:42; Juan 7:42).

Jinan Jesusqa paykunata niran: “Chhaynaqa, ¿imaynapitaq Davidri Diospa yuyaychasqan kaspa ‘Señor’ nispa niran? Davidmi niran: ‘Jehová Diosmi Señorniyta niran: “Paña ladoypi tiyaykuy, enemigoykikunata chaki sarunaykiman churanaykama”’, nispa. Chhaynaqa, Davidtaq Cristota ‘Señor’ niran chayqa, ¿imaynapitaq payri Churin kanman?”, nispa (Mateo 22:43-45).

Chayta niqtinmi fariseokunaqa ch’inlla karanku. Paykunaqa piensaqku Cristoqa Davidpa mirayninmanta jamuq runalla kananpaqmi, Roma nacionmanta paykunata librananpaq ima. Jesusmi ichaqa Davidpa imachus nisqanwan rikuchisharan Cristoqa Davidpa Señornin kananta, paymi Diospa paña ladonpi tiyaykuspa kamachikamunan karan (Salmo 110:1, 2).

Chaymantan Jesusqa discipulonkunaman kutirispa niran: “Kamachikuy simita yachachiqkunapas fariseokunapas Moisés jina atiyniyoqpaqmi creekunku. Chayrayku, tukuy ima nisqasuykichistapas ruwallaychis, ichaqa aman paykuna jinaqa ruwankichischu, paykunaqa nishaspankupas manan ruwankuchu”, nispa (Mateo 23:2, 3).

Chay tiempopi wakin judiokunaqa mat’inkupi paña makinkupi iman juch’uy cajachakunata watakuqku, chaykunapin churaqku Diospa simin qelqamanta wakin partechakunata. Fariseokunapas churakuqkun chay cajachakunataqa, ichaqa jatunyachiqkun chaykunata, chhaynapi aswan allinpaq qhawarichikunankupaq. Chaymantapas paykunaqa jatunyachiqkun p’achankuq cantonpi q’aytukunatapas (Números 15:38-40). Tukuy chaykunatan paykunaqa ‘runakunaq rikunallanpaq ruwaqku’ (Mateo 23:5).

Chaymi Jesusqa ama paykuna jina kanankupaq discipulonkunata niran: “Ama ‘yachachikuq’ nispaqa nichikunkichischu, jujllan yachachiqniykichisqa, qankunaqa llapaykichispas wayqe-panallantinmi kankichis. Amataq kay pachapiqa pitapas ‘yayáy’ ninkichischu, jujllan Yayaykichisqa janaq pachapi kaqlla. Amallataq piwanpas ‘umalli’ nispaqa nichikunkichischu, jujllan umalliykichisqa, payqa Criston. Pipas qankuna ukhupi kuraqpaq qhawarikuqqa serviqniykichismi kanan. Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”, nispa (Mateo 23:8-12).

Chaymantan Jesusqa contranpi kaq umallikunata niran: “¡Ay qankunamanta, iskay uya fariseokuna, kamachikuy simita yachachiqkuna! Janaq pacha gobiernoq punkuntan wisq’ankichis runakuna mana jaykunanpaq, manataqmi qankunapas jaykunkichischu, jaykuy munaqkunatapas jark’ankichismi”, nispa (Mateo 23:13).

Chaymantataq paykunata juchacharan mana Dios jinachu imatapas qhawarisqankumanta. Niranmi: “Qankunan ninkichis: ‘Pipas templorayku juran chayqa, manan imananpaschu; pipas templopi qorirayku juraqmi ichaqa junt’ananpuni’”, nispa. Chay umallikunaqa qoritan aswan allinpaq qhawariqku, manan reparaqkuchu temploqa Diosta adoranapaq, payman achhuykunapaq ima kasqanta. Chaymantapas paykunaqa qonqapusqakun aswan importante  kaqkunata, ‘chanin kayta, khuyapayakuq kayta, junt’aq kayta ima’ (Mateo 23:16, 23; Lucas 11:42).

Jesusmi paykunata nillarantaq: “¡Ñausa umallikuna! Qankunaqa ch’uspitan suysunkichis, camellotan ichaqa enterollata millp’uykunkichis”, nispa (Mateo 23:24). Diospa kamachikuyninman jinaqa “qhelli” nisqan karan ch’uspipas camellopas. Chaymi paykunaqa suysuqkupuni ch’uspita ujanankuman urmaruqtinqa, ichaqa manan kasukurankuchu Diospa aswan importante kamachikuyninkunata, chaymi karan camellotapas millp’uykushankuman jina (Levítico 11:4, 21-24).