Kichay leenaykipaq

Índice nisqaman riy

 139 CAPÍTULO

Jesús kay pachata paraisoman tukuchipunqa

Jesús kay pachata paraisoman tukuchipunqa

1 CORINTIOS 15:24-28

  • ¿IMAN PASANQA OVEJAKUNAWAN CABRAKUNAWANPAS?

  • ASKHA RUNAKUNAN PARAISOPI TIYANQAKU

  • JESUSMI LLIUPAQ KANQA ÑAN, CHEQAQ KAQ, KAUSAY IMA

Bautizakusqan qhepallatan Jesustaqa Saqra urmachiyta munaran, chhaynapi imapaqchus jamusqanta mana junt’ananpaq; ichaqa manan urmachiyta atiranchu. Chaymi Jesusqa Saqramanta niran: “Kay pacha kamachikuqqa ñan jamushanña, [...] payqa manan imanaytapas atiwanmanchu”, nispa (Juan 14:30).

Saqrataqa nikullantaqmi ‘dragón, ñaupa mach’aqway, Satanás’ nispapas. Apóstol Juanmi juj rijuriypi rikuran imas paywan pasanan karan chayta. Chay rijuriypin rikuran Saqrata cielomanta kay pachaman wijch’uykusqa kasqanta, ‘phiñasqallañas wijch’uchikamusqa, yachasqataqsi tiempon pisillaña kanantapas’ (Apocalipsis 12:9, 12). Kunanqa chay pisi tiempo ukhupiñan kashanchis, chaymantaqa 1.000 watapaqmi Saqra chinkay-chinkay ukhuman wijch’uykusqa kanqa, chay tiempopitaq Jesús kay pachata kamachimunqa (Apocalipsis 20:1, 2).

¿Iman chay tiempopi pasanqa kay pachapi? ¿Pikunan chaypi tiyanqaku? Chaymantan Jesús rimaran ovejakunamanta cabrakunamantawan ejemplo willasqanpi. Chaypi nisqan jina, Jesuspa wayqenkunata yanapaq, oveja jina kaq allin runakunaqa ‘wiñay kausaymanmi rinqaku’, cabrakuna jina kaq mana allin runakunataq “wiñay wañuyman rinqaku” (Mateo 25:46).

Chay wiñay kausayqa kay pachapin kanqa, chaytan Jesusqa ladonpi warkusqa kaq runaman prometeran: “Cheqaqtan kunan niyki: Noqawanmi paraisopi kanki”, nispa (Lucas 23:43). Jesusqa manan apostolkunaman prometesqan janaq pacha gobiernotachu chay runamanqa prometesharan, aswanpas kay pachapi kausananpaqmi prometesharan. Chaymi junt’akunqa kay pacha munay huerta jina kaqtin. Oveja jina kaq runakunapas chay paraisomanmi rinqaku.

 ¿Imaynan kausay kanqa chay paraisopi? Chaymantan apóstol Juanpas niran: “Diospa karpanqa runakuna ukhupin kashanqa, paymi runakunawan kuska tiyanqa, paykunan llaqtan kanqa. Dios kikinmi paykunawan kashanqa, paymi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu”, nispa (Apocalipsis 21:3, 4).

Jesuspa ladonpi warkusqa runa chay paraisopi kausananpaqqa kausarichisqan kanan kanqa. ¿Payllachu kausarichisqa kanqa? Manan. Juj runakunapas kausarichisqan kanqaku. Chaymi Jesusqa niran: “Tiempon chayamunqa, chaypin sepulturakunapi llapa kaqkunaqa runaq Churinpa kunkanta uyarispa lloqsimunqaku; allin kaqta ruwaqkunan kausaypaq kausarimpunqaku, mana allin kaqta ruwaqkunataq juchachasqa kanankupaq kausarimunqaku”, nispa (Juan 5:28, 29).

¿Iman kanqa apostolkunamanta, paykuna jina cieloman ripuq qharikunamanta warmikunamantapas? Chaymantan Biblia nin: “Paykunaqa Diospa sacerdotenkuna Cristoq sacerdotenkuna ima kanqaku, waranqa watataqmi kamachinqakupas”, nispa (Apocalipsis 20:6). Paykunaqa kay pachapi noqanchis jina runakunataq karanku chayqa, allintachá entiendewasunchis khuyapayawasunchis ima (Apocalipsis 5:10).

Chay tiempopin Jesusqa sacrificionpa valorninwan runakunata yanapanqa juchankuta chinkachinanpaq. Arí, paymi kamachikuqmasinkunapiwan runakunata pisi-pisimanta mana ima juchayoqman tukuchipunqaku. Chhaynapin runakunaqa qallariypi Diospa munasqanman jina kausanqaku; manañan wañuypas kanqañachu. Chhayna kausaytan payqa Adán Evapaqqa munaran.

Chhaynapin Jesusqa Jehová Diospa tukuy ima encargasqanta junt’anqa. Waranqa wata kamachikuyta tukuspataq gobiernonta Diosman qopunqa, llapa runakunatapas mana ima juchayoqtan payman entregapunqa. Chaywanmi Jesusqa rikuchinqa ancha k’umuykukuq kasqanta. Chaymantan apóstol Pablo niran: “Tukuy imapas payman k’umuchisqa kaqtinmi Churipas chay k’umuchiqman k’umuykullanqataq, chhaynapi Dioslla lliupa kamachiqnin kananpaq”, nispa (1 Corintios 15:28).

Rikusqanchis jina, Jesusllawanmi Diospa munayninqa junt’akunqa. Wiñay-wiñaypaqpas chhaynapunin kanqa, arí, imaña Diospa munaynin kaqtinpas Jesusqa wiñaypaqmi kanqa ‘ñanpas, cheqaq kaqpas, kausaypas’ (Juan 14:6).