Kichay leenaykipaq

Índice nisqaman riy

 130 CAPÍTULO

Jesusta wañuchinankupaq apanku

Jesusta wañuchinankupaq apanku

MATEO 27:31, 32 MARCOS 15:20, 21 LUCAS 23:24-31 JUAN 19:6-17

  • PILATO JESUSTA KACHARIPUYTA MUNAN

  • PILATO JESUSTA WAÑUCHINANKUPAQ ENTREGAN

Maytaña Jesusta maltratashaqtinkupas, askha kutitaña Pilato kacharipuyta munashaqtinpas umalli sacerdotekunaqa paykunawan kaqkunapiwanmi Jesusta wañuchiytapuni munasharanku. Chaymi qaparishallaranku: “¡K’aspipi warkuy!”, nispa. Pilatotaq paykunata niran: “Qankunayá apakapuspa warkumuychis, noqaqa manan ima juchatapas paypiqa tarinichu”, nispa (Juan 19:6).

Judiokunaqa manataq Pilatota convenceyta atirankuchu Jesusta wañuchinanpaq chayqa, jujniraymantañataq Jesusta tumparanku. Nirankun: “Noqaykupaqqa kanmi juj kamachikuy, chaypi nisqanman jinaqa wañunanmi chay runaqa ‘Diospa Churinmi kani’ nisqanrayku”, nispa (Juan 19:7).

Jesustaqa nishutañan maltrataranku, Pilatoq esposanpas willachiranñan ama payta imatapas ruwananpaq, chaymi Pilatoqa wasinman jaykuspa Jesusta kacharipuyta munaran (Mateo 27:19). Ichaqa yachaytan munasharan pipunichus Jesús kasqanta, chaymi yacharanña Galileamanta kasqanta chaypas, wajmanta tapuran: “¿Maymantataq kankiri?”, nispa (Lucas 23:5-7; Juan 19:9). Pilatoqa ‘¿icha cielomantachu kay runaqa kanmanpas? ¿Juj dioschu kanmanpas?’ nispapaschá piensasharan.

Jesusqa ñan Pilatoman willaranña rey kasqanta, gobiernonpas mana kay pachamantachu kasqanta. Chaymi manaña imatapas niranchu Pilato chaymanta tapuqtin. Chaywanmi Pilatoqa phiñasqa Jesusta niran: “¿Manachu ima niwankipas? ¿Manachu yachanki qanta kacharipunaypaq wañuchinaypaqpas atiyniyoq kasqayta?”, nispa (Juan 19:10).

Jinan Jesusqa niran: “Manachus Dios atiyta qosunkiman karan chayqa, manachá imata ruwawanaykipaqpas atiyniyoqchu kawaq. Chayraykun qanman entregawaqniy runaqa aswan juchayoq”, nispa (Juan 19:11). Jesús ‘entregawaqniy runa’ nispaqa Judasmanta, Caifasmanta, paywan kaqkunamantawanmi rimasharan. Paykunan Pilatomantaqa aswan juchayoq karanku.

Jesuspa imayna kasqanwan, imayna rimasqanwan admirakuspan Pilatoqa astawan Jesusta kacharipuyta munasharan ‘cielomantapaschá jamuran’ nispa. Chayllamanmi judiokunaqa manchachinankupaq niranku: “Chay runatachus kacharipunki chayqa, manan Roma reypa amigonchu kanki. Pipas ‘reymi kani’ niqqa Roma reypa contranpin rimashan”, nispa (Juan 19:12).

Jinan Pilatoqa Jesusta wajmanta jawaman pusachimuspa runakunata niran: “¡Qhawariychis reyniykichista!”, nispa. Paykunataq ichaqa qapariranku: “¡K’aspipi paytaqa warkuy!”, nispanku. Jinan Pilatoqa niran: “¿Reyniykichistachu wañuchisaq?”, nispa. Judiokunaqa sintisqapunin kausaranku Roma reypaqqa, chaywanpas umalli sacerdotekunaqa nirankun: “Manan Roma reymanta waj reyniykuqa kanchu”, nispa (Juan 19:14, 15).

Jinan Pilatoqa manchakuywan atipachikuspa Jesusta entregaran k’aspipi warkumunankupaq. Jinan soldadokuna Jesusman churasqanku mantata ch’utispa kaqta churapuranku jawa p’achanwan, jinaspa ñak’arinan k’aspita apachiranku.

Chaykunan pasasharan 14 de nisán viernes p’unchaypi. Cercañan kasharan chaupi p’unchaypaqpas. Jesusqa juevesmantapachan rijch’asqalla kasharan, sinchi maltratasqataq kasharanpas, chaymi kallpan pisiruqtin manaña k’aspita apayta atiranñachu. Chaymi soldadokunaqa África ladopi Cirenemanta Simón sutiyoq  runata kamachiranku k’aspita apananpaq. Runakunaqa askhan Jesusta qatikusharanku, wakinqa sonqonkuta takakuspan paymanta khuyayta waqasharanku.

Chaymi Jesusqa waqashaq warmikunata niran: “Jerusalén llaqta warmikuna, ama noqamantaqa waqaychischu, aswanpas qankuna kikiykichismanta wawaykichiskunamantawan waqaychis. Tiempon chayamunqa, chaypin ninqaku: ‘Kusisqa kachunku wijsallikuyta mana atiq warmikuna, mana onqokuq warmikuna, wawata mana ñuñuq warmikunapas’, nispa. Orqokunatan ninqaku: ‘¡Pakaykuwayku!’, nispa. Moqokunatapas: ‘¡Jark’awayku!’, ninqakun. Q’omerllaraq sach’a kashaqtintaq kaykunata ruwashanku chayqa, ¡imaraqchá kanqa ch’akisqa kaqtinqa!”, nispa (Lucas 23:28-31).

Jesusqa juj sach’awanmi judío nacionta comparasharan. Chay nacionqa q’omer sach’a jinallaraqmi kasharan Jesús paypi iñiqkunapas chaypi kasqankurayku. Jesús wañupuqtin, paypi iñiqkunapas manaña judío religionpichu kaqtinkun ichaqa, chay nacionqa ch’akisqa sach’a jinan kananku karan Diospaqqa. Chaymi Diosqa Roma ejercitokunawan chay nacionta thunichinan karan. Chaypin sinchi llakikuy kanan karan.