Kichay leenaykipaq

Índice nisqaman riy

 92 CAPÍTULO

Juj runalla Jesusta agradecekun

Juj runalla Jesusta agradecekun

LUCAS 17:11-19

  • JESÚS QHALIYACHIN LEPRA ONQOYNIYOQKUNATA

Jatun juntapi kaqkuna mana wañuchinankupaqmi Jesusqa Efraín llaqtata riran discipulonkunawan kuska (Juan 11:54). Ichaqa 33 watapi Pascua fiesta cercañataq kasharan chayqa, wajmantan Jesusqa Jerusalenta kutinan karan. Ñaupaqtan ichaqa Galilea provinciataraq riran Samaria ladonta pasaspa, chay kutillatawanñan payqa chay provinciaman risharan manaraq wañupushaspa.

Purishaspanmi Jesusqa lepra onqoyniyoq chunka runakunawan tuparan. Chay onqoyqa sinchi millaymi karan, pisi-pisimantan aycha qarata ismuchiq contagiosotaqmi kaqpas (Números 12:10-12). Chaymi chay onqoyniyoqkunaqa “qhellin kani” nispa qaparkachaspanku purinanku karan, sapaq ladopitaqmi tiyanankupas karan (Levítico 13:45, 46).

Chaymi chay runakunaqa karullamanta Jesusta wajakuranku: “¡Jesús, yachachikuq, khuyapayaykuwayku!”, nispa. Jesustaq paykunata rikuspa niran: “Phaway riychis, jinaspa sacerdotekunawan qhawachikamuychis”, nispa (Lucas 17:13, 14). Lepra onqoymanta qhaliyapuq runakunataqa sacerdotekunan qhawananku karan ‘limpion kashanki’ ninankupaq, chaymi Jesusqa Diospa chay kamachisqanta respetaspa chhaynata kamachiran (Levítico 13:9-17).

Jinan chay runakunaqa qhaliyachisqa kanankupi confiaspa sacerdotekunaman riranku. Ñanllapiraq kashaqtinkutaq onqoyninkuqa chinkapuran Jesuspi iñisqankurayku. ¡Maytachá chaywanqa kusikuranku!

Ichaqa paykunamanta jujllan kutimuran Jesusta maskhaq. Payqa Samaria llaqtayoqmi karan, anchatataqmi Jesusta agradecekuyta munasharan. Payqa yacharanmi Diospa atiyninwan Jesuspa qhaliyachisqanta, chaymi “alto kunkawan Diosta jatunchaspa kutimuran” (Lucas 17:15). Jesusta tarispataq ñaupanpi k’umuykuspa agradecekuran.

Jesustaq niran: “¿Manachu chunka runakuna qhaliyachisqa karanku? Chhaynaqa, ¿maytaq wakin isqon runakunari? ¿Imaraykutaq paykunari mana jujnillankupas kutimunchu Diosta jatunchaq? ¿Imaraykutaq waj nacionmanta runallari kutimun?”, nispa. Jinan chay runata niran: “Sayarispa ripuy, iñiyniykin qhaliyachisunki”, nispa. (Lucas 17:17-19).

Chay chunka runakunata qhaliyachispan Jesusqa rikuchiran Jehová Dios paywan kashasqanta. Chaytan chay agradecekuq runaqa allinta repararan, payqa chay qhepamanqa servinmanmi karan Diosta, chhaynapitaq wiñay kausay ñanman jaykupunman karan. Kay tiempopiqa manaña milagrokunata ruwakushanchu chaypas, Jesuspi iñispaqa atisunmanmi noqanchispas chay wiñay kausay ñanman jaykuyta. ¿Agradecekusunchu Diosta chaymanta?