Kichay leenaykipaq

Índice nisqaman riy

 137 CAPÍTULO

Ancha askha discipulonkuna Jesusta rikunku

Ancha askha discipulonkuna Jesusta rikunku

MATEO 28:16-20 LUCAS 24:50-52 HECHOS 1:1-12; 2:1-4

  • JESÚS ASKHA DISCIPULONKUNAMAN RIJURIN

  • JESÚS JANAQ PACHAMAN WICHAPUN

  • 120 JINA DISCIPULOKUNA SANTO ESPIRITUTA CHASKINKU

Kausarimpusqan qhepamanmi Jesusqa 11 apostolninkunata kamachiran Galileapi juj orqoman rinankupaq. Juj discipulonkunapas askhan chaymanqa riranku, llapankuqa 500 jinan karanku. Chaypin Jesusta rikuranku. Chaywanpas wakinqa iskayasharankuraqmi (Mateo 28:17; 1 Corintios 15:6). Jesuspa rimasqanta uyarispan ichaqa convencekuranku kausarimpusqanmanta.

Jesusmi paykunata niran: “Diosmi tukuy atiyta qowan janaq pachapipas kay pachapipas. Chayrayku, llapa nacionmanta runakunaman riychis, jinaspa yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis. Qankunaman llapa kamachisqaykunata paykunaman yachachimuychis kasukunankupaq”, nispa (Mateo 28:18-20). Jesusqa anchatan munasharan discipulonkuna allin willakuykunata lliuman willanankuta.

Jesusqa llapan discipulonkunamanmi chay llank’anata saqesharan. Chaymi tukuy atiyta chaskisqanta willaspa paykunata niran: “Noqaqa sapa p’unchaymi qankunawan kashasaq kay tiempoq tukukapunankama”, nispa. Chhaynaqa manaña Jesús llapankumanchu atiyta qonan karan milagrokunata ruwanankupaq chaypas, santo espirituwanmi llapankuta yanapanan karan, chhaynapi runakuna contrankupi jatariqtinku mana pisipanankupaq.

Kausarimpusqan qhepamanqa “tawa chunka p’unchay ukhupin” Jesusqa askha kutita discipulonkunaman rijuriran. Sapa rijurinanpaqmi payqa runaman tukuq, chhaynapi kausashasqanta rikuchinanpaq, chaymantapas ‘Diospa gobiernonmantan paykunata rimapayaran’ (Hechos 1:3; 1 Corintios 15:7).

Galileallapiraq kashaqtinkun Jesusqa apostolkunata kamachiran Jerusalenman rinankupaq. Chay llaqtapiña kashaqtinkutaq paykunata kamachiran: “Aman Jerusalenmanta lloqsinkichischu, aswanpas Yayaq prometesqanta qankunaman willasqaytan suyashallankichis; Juanqa unullawanmi bautizaran, qankunan ichaqa pisi p’unchaykunamanta santo espirituwan bautizasqa kankichis”, nispa (Hechos 1:4, 5).

Chaymantan Jesusqa apostolninkunata pusaran “Betania llaqtachakama”, chayqa kasharan Olivos orqoq ladollanpin (Lucas 24:50). Jesusqa askha kutipiñan willaran cieloman ripunanmanta, chaywanpas paykunaqa piensashallarankuraqmi paypa gobiernon kay pachapi kananpaq (Lucas 22:16, 18, 30; Juan 14:2, 3).

Chaymi Jesusta tapuranku: “¿Señor, wajmantachu Diospa gobiernonta Israelpi jatarichishanki?”, nispa. Jinan Jesusqa paykunata niran: “Qankunaqa manan necesitankichischu chaykuna yachaytaqa, [...] ichaqa atiytan chaskinkichis santo espíritu qankunaman chayamuqtin, jinan noqamanta willankichis Jerusalenpi, lliu Judeapi, Samariapi ima, jinallataq kay pachaq k’uchunkunakamaraq”, nispa (Hechos 1:6-8).

Jinan apostolkuna rikushaqtinku Jesusqa cieloman wichayta qallariran, chayllamanmi juj phuyu pakaruran. Jesusqa kausarimpusqan qhepamanqa askha kutipin runaman tukuran rikuchikunanpaq, cieloman wichashaspan ichaqa runa cuerponta saqeran, jinaspa espíritu jina cieloman ripuran (1 Corintios 15:44, 50; 1 Pedro 3:18). Apostolkuna wichayman qhawashaqtinkun qonqaylla ladonkupi rijuriran “yuraq p’achayoqkama iskay qharikuna”, paykunan apostolkunata niranku: “¿Galileamanta runakuna, imaraykun cielota qhawarayashankichis? [...] Jesusqa imaynan ripushan chhaynallataqmi kutimunqa”, nispa (Hechos 1:10, 11).

Jesusqa ch’inllan cielomanqa ripuran, chaymantapas discipulonkunallan chaytaqa rikuranku. Chhaynallataqmi kutimuyninpas kanan karan,  payqa manan “¡kutimushaniñan!” nisparaqchu kutimunan karan, chaymantapas discipulonkunallan reparananku karan reyña kashasqanta.

Chaymantan apostolkunaqa Jerusalenman kutipuranku. Chayman qatiq p’unchaykunaqa Jesuspa juj discipulonkunawanmi juñunakuranku, chaypin kasharanku “Jesuspa maman Mariapas, wayqenkunapas” (Hechos 1:14). Llapankun tukuy sonqo Diosmanta mañakuqku. Judas Iscarioteq rantinpi jujta ajllanankupaqpas llapankun mañakuranku (Mateo 19:28). Chaypaqmi Jesuspa ruwasqankunata paypa kausarimpusqantawan rikuqta ajllananku karan. Paykunaqa sorteaspankun yacharanku pitachus Dios ajllasharan chayta (Salmo 109:8; Proverbios 16:33). Chaypin Matías ajllasqa karan, payqa Jesuspa 70 kachasqan discipulokunamanta jujninmi kanman karan. Chhaynapin Matiasqa “chunka jujniyoq apostolkunawan yupasqa kapuran” (Hechos 1:26).

Jesús cieloman ripusqanmanta chunka p’unchay qhepamanmi Pentecostés fiesta karan 33 watapi. Chaypin 120 jina discipulokuna Jerusalenpi juñusqa kasharanku juj altos patapi. Chayllamanmi juj fuerte suenay chay wasipi uyarikuran, jinan qallu jina nina rauraykuna chay discipulokunaq umanku pataman tiyaykuran. Jinan llapanku juj rimaykunapi rimayta qallariranku. Chhaynapin Jesuspa prometesqanman jina santo espirituta chaskiranku (Juan 14:26).