Kichay leenaykipaq

Índice nisqaman riy

 25 CAPÍTULO

Jesús lepra onqoyniyoq runata khuyapayan

Jesús lepra onqoyniyoq runata khuyapayan

MATEO 8:1-4 MARCOS 1:40-45 LUCAS 5:12-16

  • JESÚS LEPRA ONQOYNIYOQ RUNATA QHALIYACHIN

Jesús tawa discipulonkunapiwan “jinantin Galileapi” predicasqanman jinan paymanta willakuyqa ratolla lliuman ch’eqeriran (Marcos 1:39). Chhaynapin juj llaqtapi lepra onqoyniyoq runapas paymanta uyariran. Médico Lucaspa nisqan jina, chay runaqa ‘lepra onqoypa tukusqanmi’ kasharan (Lucas 5:12). Chay onqoyqa sinchi millaymi karan, pisi-pisimantan runaq cuerpontapas ismuchiq.

Chhayna onqoyniyoq runakunaqa khuyaytan kausaqku, runakunamantapas t’aqasqan kausananku karan. Chaymantapas pitapas rikuspaqa “¡qhellin kani!” nispan qaparinanku karan, chhaynapi ama pipas achhuykunanpaq (Levítico 13:45, 46). Chay lepra onqoyniyoq runan ichaqa Jesusman achhuykuspa pampakama k’umuykuran, jinaspa rogakuran: “Señor, munanki chayqa, atinkin qhaliyachiwayta”, nispa (Mateo 8:2).

Chay runaqa khuyaypunichá rikukuran chay onqoyrayku, ichaqa Jesuspi iñisqantan rikuchisharan. Chaymi Jesusqa anchata khuyapayaspa makinta jaywariran, llamiykuspataq niran: “Arí, munanin qhali kapuy”, nispa (Mateo 8:3). Jinan chay runaqa kaq rato qhaliyapuran. ¡Mana creenapaq jinaraqchá chayqa karan! Chaypi kawaq karan chayri, ¿Jesús jinachu imatapas ruwawaq karan?

Rikusqanchis jina, Jesusqa anchatan chay runataqa khuyapayaran. ¿Manachu chhayna khuyapayakuq runata munasunman reyninchis kananpaq? Chhaynatan Jesusqa khuyapayawasunchis kay pachata kamachimuspa. Chaymantan Biblia nin: ‘Payqa mana piniyoqtawan wajchatawanmi khuyapayanqa, wajchakunaq kausaynintan qespichinqa’, nispa (Salmo 72:13). Maytachá payqa munashan chay tiempo chayamunanta, chhaynapi lliuta qhaliyachinanpaq.

Jinantinmantaq Jesusmanta willakuy ch’eqerisharan chayqa, astawanraqchá paymanta rimankuman karan chay runata qhaliyachisqanmanta uyarispaqa. Jesusmi ichaqa mana munaranchu imakunachus ruwasqanmanta uyarispalla runakuna paypi iñinankuta. Chaymantapas payqa allintan yacharan: “Manan callekunapipas kunkanqa uyarikunqachu”, nisqa profeciamanta (Isaías 42:1, 2). Chaymi chay qhaliyachisqan runata niran: “Aman pimanpas willankichu, aswanpas sacerdoteman rispa qhawachikamuy, Moisespa kamachikusqanman jinataq ofrendaykita jaywamuy”, nispa (Mateo 8:4).

Chay runaqa ancha kusisqan kasharan qhaliyapusqanmanta, chaymi lliuman willakuran Jesuspa qhaliyachisqanmanta. Willakusqanta uyarispaqa astawanraqmi runakunaqa Jesusta rikuyta munaranku. Chaymi payqa manaña mayqen llaqtamanpas runakunaq rikusqan jaykuyta atiqchu, ch’inneq jawakunallapiñan qhepakuqpas. Chaywanpas askha runakunan paypa kasqanmanqa riqku, chhaynapi Jesús paykunata yachachinanpaq qhaliyachinanpaq ima.