Kichay leenaykipaq

Índice nisqaman riy

 74 CAPÍTULO

Jujkuna chaskiymanta, imayna mañakuymantawan

Jujkuna chaskiymanta, imayna mañakuymantawan

LUCAS 10:38-11:13

  • JESÚS WATURIKUN MARTATA MARIATAWAN

  • DIOSMANTAQA MAÑAKUSHANALLAPUNIN

Olivos orqoq ladonpi Jerusalenmanta kinsa kilometropi jinan kasharan Betania llaqtacha (Juan 11:18). Chaypin tiyaranku Jesuspa amigonkuna Marta, María, turanku Lazaropiwan. Chaymi Jesusqa wasinkuman chayaran, paykunataq sumaqta payta chaskiranku.

Cristotaq wasinkupi kasharan chayqa, Martaqa imaymanatan wayk’uyta qallariran. Ñañan Marian ichaqa Jesuspa ñaupanpi tiyaykuspa payta uyarisharan. Jinan Martaqa Jesusman achhuykuspa niran: “Señor, ñañaymi sapallayta saqerparimuwan imaymana ruwanakunantinta, ¿manachu chay imapas qokusunki? Niykapuwayyá yanapawananpaq”, nispa (Lucas 10:40).

Jesusmi ichaqa niran: “Marta, Marta, imaymanakunawanmi nishu afanasqa kashanki. Manan imaymanakunatachu necesitakun, aswanpas pisillatan otaq jujllata. Mariaqa aswan allin kaqtan ajllakun, manataqmi pipas chaytaqa qechunqachu”, nispa (Lucas 10:41, 42). Chaywanmi Jesusqa entiendechisharan mana imaymanataraqchu wayk’una kasqanta, paypaqqa imachallapas allinmi kanman karan.

Martaqa allin razonwanña imaymanata wayk’usharan chaypas, manan tiempota aypachikuranchu Diospa Churinta uyarinanpaq. Marian ichaqa Jesusta uyarispa ancha allin yachachikuykunata yachasharan, chaymi Jesusqa allinta paymanta rimaran. Chaymi yachachiwanchis imachus aswan importante kasqanta.

Chaymantan juj kutipi Jesusta jujnin discipulon niran: “Señor, yachachiwayku mañakuyta imaynan Juanpas discipulonkunata yachachiran jinata”, nispa (Lucas 11:1). Jesusqa juj wata kuskan ñaupaqtañan juj orqopi yachachiran imaynatas Diosmanta mañakuna chayta (Mateo 6:9-13). Chay discipulonqa manapaschá chaypichu kasharan, chaymi Jesusqa wajmanta chayta yachachiran. Jinaspa juj ejemplowan yachachiran sapa kutilla mañakuna kasqanta.

Niranmi: ‘Juj amigoykichis kanman, jinaspa payman kuska tuta horasta riwaqchis: “Amigolláy, ama jinachu kay, kinsa t’antaykita ayniriway, juj amigoymi viajemanta chayaramuwan, manan imaypas kanchu jaywarinaypaq”, nispa. Paytaq wasi ukhumanta nimunman: “Ama rimapayamuwaychu, punkupas allin wisq’asqañan kashan, wawakunantinmi puñushanipas, manan jatarimuyta atiymanchu”, nispa. Niykichismi: Amigoykiña kashaspapas manan kuska tutataqa jatarimunmanchu, chaywanpas mana sayk’uspa wajakachakusqaykiraykun payqa jatarimuspa imachus necesitasqaykita qosunki’, nispa (Lucas 11:5-8).

Chhaynaqa, mana yanapay munaq runapas askha kuti rimapayasqa kaspaqa uyarikuntaq chayqa, astawanraqchá riki Jehová Diosqa serviqninkunata uyarinqa sapa kutilla mañakuqtinkuqa. Chaymi Jesusqa niran: “Mañakushallaychis, chaskinkichismi; maskhashallaychis, tarinkichismi; punkutapas takashallaychis, kicharimusunkichismi. Pipas mañakuqqa chaskinmi, pipas maskhaqqa tarinmi, pipas takaqmanqa punkupas kichasqan kanqa”, nispa (Lucas 11:9, 10).

Jinaspa chay yachachikuyta astawan mat’ipayananpaq niran: “¿Qankunamanta mayqen taytataq wawan challwata mañakushaqtin mach’aqwayta qonman? ¿Runtuta mañakushaqtinpas alacrán kuruta qonman? Qankunapas millay runaña kashaspapas yachankichismi wawaykichiskunaman allin regalokuna qoytaqa ¿riki? ¿Chaychu janaq pachapi kaq Yayaqa mañakuqninkunaman santo espirituta mana qonman?”, nispa (Lucas 11:11-13). Chhaynaqa Yayanchisqa liston kashan uyariwananchispaq.