Kichay leenaykipaq

Índice nisqaman riy

 91 CAPÍTULO

Jesús Lazarota kausarichin

Jesús Lazarota kausarichin

JUAN 11:38-54

  • LÁZARO KAUSARIMPUN

  • JATUN JUNTA RIMANAKUN JESUSTA WAÑUCHINANPAQ

Martawan Mariawan tupasqan qhepatan Jesusqa paykunawan kuska riran maypichus Lazaroq ayanta churaranku chayman. Ayantaqa qaqa t’oqopin churasqaku, jatun rumiwantaqmi chayqa wisq’asqa kasharan, chaymi Jesusqa chayman chayaspa niran: “Chay rumita suchuchiychis”, nispa. Martataq niran: “Señor, ñachá asnakushanña, ñan tawa p’unchayña karun”, nispa. Jesustaq niran: “¿Manachu nirayki: ‘Creenki chayqa, rikunkin Diospa qhapaq atiyninta’, nispa?”, nispa (Juan 11:39, 40).

Jinan rumita suchuchiqtinku Jesusqa wichayman qhawarispa niran: “Yayáy, graciastan qoyki uyariwasqaykimanta. Noqaqa yachanin uyariwaqpuni kasqaykita; ichaqa kaypi kashaq runakuna kachamuwasqaykita yachanankupaqmi  mañakamushayki”, nispa. Jesusqa Diospa atiyninwanmi juj jatun milagrota ruwananpaq kasharan, chaytan chay mañakusqanwan rikuchiran. Chaymantan payqa fuerteta niran: “¡Lázaro, lloqsimuy!”, nispa. Jinan Lazaroqa telawan chakin makin k’uyusqa lloqsimuran, uyanpas k’uyusqan kasqa. Chaymi Jesusqa: “Paskaychis purinanpaq”, niran (Juan 11:41-44).

Chay milagrota rikuspan askha runakuna Jesuspi iñipuranku. Wakinkunan ichaqa fariseokunaman rispa willamuranku Jesuspa chay milagro ruwasqanta. Jinan fariseokunaqa umalli sacerdotekunapiwan jatun juntata juñuranku, chay juntapin kasharan uma sacerdote Caifaspas. Paykunamanta wakinmi niranku: “¿Imatan ruwasun? Kay runaqa imaymana señalkunatamá ruwashan. Jinallata qhawasun chayqa, llapa runachá paypi iñipunqaku, jinaqtintaq Roma llaqta runakuna jamuspa templonchista llaqtanchistawan qechupuwasunchis”, nispa (Juan 11:47, 48). Chay runakunaqa manan kusikurankuchu Diospa atiyninwan Jesús milagrokuna ruwasqanmanta, aswanpas paykunaqa puestonkuta pierdeymantan astawan llakikusharanku.

Saduceokunaqa manataq kausarimpuypi creeqkuchu chayqa, manapunin kusisqachu kasharanku Jesús Lazarota kausarichisqanwan. Chaymi paykunamanta jujnin uma sacerdote Caifás niran: “Qankunaqa manan imatapas yachankichischu, ¿manachu reparankichis llaqtantin runa wañunanmantaqa juj runaq wañunallan allin kasqanta?”, nispa (Juan 11:49, 50; Hechos 5:17; 23:8).

Caifasqa ‘manan payllamantachu chaytaqa rimaran’, aswanpas Diosmi chaytaqa rimachiran uma sacerdote kasqanrayku. Caifaspa nisqanman jinaqa wañuchikunanmi karan Jesusta, chhaynapi chay umallikuna puestonkuta mana pierdenankupaq. Diosmi ichaqa chhaynata rimachiran Jesuspa wañusqanwan llapan iñiq judiokuna, ‘Diospa ch’eqerisqa wawankunapas’ juchamanta wañuymantawan kacharichisqa kanankuta rikuchinanpaqmi (Juan 11:51, 52).

Jatun juntapi kaqkunaqa Caifasta kasuspankun decidiranku Jesusta wañuchinankupaq. Paykunamanta jujnin Nicodemo sutiyoq umallin ichaqa Jesusta allinpaq qhawariran, ¿willachinmanchu karan Jesusman imatachus payta ruwayta munasharanku chayta? Manan yachanchischu. Imaynaña karan chaypas, Jesusqa ripuranmi Jerusalén qaylla ladokunamanta, chhaynapi ama mana wañunan tiempopi wañunanpaq.