Kichay leenaykipaq

Índice nisqaman riy

 22 CAPÍTULO

Jesús ajllan tawa discipulonkunata

Jesús ajllan tawa discipulonkunata

MATEO 4:13-22 MARCOS 1:16-20 LUCAS 5:1-11

  • JESÚS TAWA DISCIPULONKUNATA WAJAN TUKUY TIEMPO PAYTA QATIKUNANKUPAQ

  • CHALLWAQKUNA RUNA CHALLWAQMAN TUKUPUNKU

Nazaretpi wañuchinankumanta ayqekuspan Jesusqa Galilea qochaq ladonpi kaq Capernaum llaqtata riran. Chay qochatan “Genesaret qocha” nillaqkutaq (Lucas 5:1). Chhaynapin junt’akuran Isaiaspa willasqan profecía, paymi qelqasqa chay qochaq ladonpi kaq runakunaman juj k’anchay k’ancharimunanmanta (Isaías 9:1, 2).

Chaypin Jesusqa predicaran: “Janaq pacha gobiernon qayllaykamunña”, nispa (Mateo 4:17). Chaypi Judea provinciapi puriysiq tawa discipulonkunawanpas tuparan. Chay provinciamanta Jesús kutimpuqtinmi paykunaqa llank’anankuman kutipusqaku (Juan 1:35-42). Jesusqa paykunata yachachinanpaqmi tukuy tiempo qatikunankuta munasharan, chhaynapi paykunaman predicay llank’ayta saqenanpaq.

Qocha patanta purishaspan Jesusqa Pedrota, wayqen Andresta, juj runakunatawan rikuran challwananku llika allichashaqta. Jinan Jesusqa Pedroq botenman seqaspa juj chikanta qochaman jaykuran. Jinaspa botepi tiyaykuspa qocha patapi kaq runakunaman yachachiyta qallariran.

Chaymantataq Pedrota niran: “Boteta apaykuy qocha ukhukama, jinaspa chayman llikaykichista wijch’uykuychis”, nispa. Jinan Pedroqa niran: “Yachachikuq, tutantinmi llank’aykuyku, manataqmi ni jujllatapas jap’iykuchu. Ichaqa qantaq niwashanki chayqa, wijch’uykusaqyá”, nispa (Lucas 5:4, 5).

Llikankuta wijch’uykuspataq askhallataña challwakunata jap’iranku, llikankupas llik’ikapusharanñan. Chaymi juj kaq botepi kaqkunata wajaranku, jamuqtinkutaq iskaynin botekunaman junt’achiranku, botekunaqa yaqañan chinkaykusharankupas. Chayta rikuspan Pedroqa qonqoriykuspa Jesusta niran: ‘Señorníy, ayqeriy noqamanta, juchasapan kani’, nispa. Chaymi Jesusqa niran: “Amaña manchakuychu, kunanmantaqa runakunatan kausashaqta challwanki”, nispa (Lucas 5:8, 10).

Jesusqa Pedrota Andrestawanmi niran: “Qhepayta jamuychis, noqan runakuna challwayta yachachisaykichis”, nispa (Mateo 4:19). Chaymantan wajaran Zebedeoq wawankuna Santiagota Juantawan. Paykunapas kaq raton Jesusta qatikuranku. Chhaynapin tawa challwaqkuna runa challwaqman tukupuranku.