Kichay leenaykipaq

Índice nisqaman riy

 45 CAPÍTULO

Jesús askha supaykunata qarqon

Jesús askha supaykunata qarqon

MATEO 8:28-34 MARCOS 5:1-20 LUCAS 8:26-39

  • JESÚS SUPAYKUNATA KHUCHIKUNAMAN QARQON

Sinchi wayra pasasqan qhepamanmi Jesuspa discipulonkunaqa wajmanta mancharikullarankutaq qocha pataman chayaspanku. Chaypin supaypa junt’aykusqan iskay phiña runakuna panteonmanta lloqsimuranku. Jujninmi aswan unay tiempo chhayna kashanman karan, aswan phiñataq kanman karan. Chaychá Bibliaqa paymanta masta riman.

Chay runan q’alalla puriq, “tuta-p’unchaytaqmi panteonpipas orqokunapipas qaparkachaspa puriq, rumikunawantaq kuchukuqpas” (Marcos 5:5). Chhayna sinchi phiña kasqanraykun runakunapas manaña chayninta puriqkuchu. Askha kutitan paytaqa watayta munaranku, paymi ichaqa cadenakunatapas p’itispa mana dejakuranchu.

Chay runa Jesusman k’umuykuqtinmi paypi kaq supaykuna qaparichiranku: “¿Iman noqawan ruwanayki, ancha jatun Diospa Churin Jesús? Diosrayku jurapuway ama ñak’arichiwanaykipaq”, nispa. Jinan Jesusqa niran: “Lloqsiy chay runamanta, millay espíritu”, nispa (Marcos 5:7, 8). Chaywanmi payqa rikuchiran supaykunata kamachinanpaq atiyniyoq kasqanta.

Chay runapiqa askha supaykunan kasharan, chaymi Jesús sutinta tapuqtin payqa niran: “Legionmi sutiyqa, askha kasqaykurayku”, nispa (Marcos 5:9, nota). Roma ejercitopi juj legionpiqa askha waranqa soldadokunan karan, chhaynaqa askhapunichá karan chay runapi supaykunaqa, maytachá kusikuqku chay runata ñak’arichispapas. Chay supaykunaqa yachankumanmi karan imas paykunawan Satanaswanpas pasanan karan chayta, chaychá Jesusta rogakuranku “ama chinkay-chinkay ukhuman kachaykunanpaq” (Lucas 8:31).

Chay cercallapin 2.000 jina khuchikuna mijusharan. Jinan supaykunaqa niranku: “Khuchikunaman kachawayku”, nispa (Marcos 5:12). Jesús “riychisyá” niqtintaq chay khuchikunaman jaykuranku, jinan khuchikunaqa qochaman phawaykuspa chaypi wañuranku. Diospa kamachikuyninman  jinaqa qhellin karan chay animalkunaqa, chaymi judiokunaqa mana uywanallankupaschu karan.

Khuchikunawan imachus pasasqanta rikuspan khuchi michiqkunaqa phawaylla rispa runakunaman chayta willamuranku. Jinan runakunaqa jamuspa supaypa junt’aykusqan runata rikuranku Jesuspa ladonpi p’achasqa tiyashaqta, yuyayninpi kashaqta ima.

Chayta rikuspan runakunaqa sinchita mancharikuranku, jinaspa Jesusta rogakuranku ripunanpaq. Boteman Jesús seqaqtintaq chay qhaliyachisqan runaqa paywan ripunanpaq rogakuran. Jesusmi ichaqa niran: “Phaway wasiykita ripuy, jinaspa familiaykikunaman willamuy imatachus Jehová Dios qanpaq ruwapusqasuykimanta”, nispa (Marcos 5:19).

Jesusqa pitapas qhaliyachispaqa “aman pimanpas chayta willankichu” niqmi, chhaynapi runakuna ama juj-jujtachu paymanta rimanankupaq. Chay qhaliyachisqan runatan ichaqa kamachiran paymanta willamunanpaq. Chaymi chay runaqa jinantin Decápolis llaqtakunapi willayta qallariran. Chhaynapin payqa chayaran Jesuspa mana chayasqan llaqtakunaman. Chaymantapas paypipunitaq Jesús jatun milagrota ruwaran chayqa, chay willasqanwanmi rikuchiran chay khuchikuna wañusqanmanta mana Jesuschu juchayoq kasqanta.