Kichay leenaykipaq

Índice nisqaman riy

 16 CAPÍTULO

Jesús anchata munakun Diospa wasinta

Jesús anchata munakun Diospa wasinta

JUAN 2:12-22

  • JESÚS NEGOCIO RUWAQKUNATA TEMPLOMANTA QARQON

Caná llaqtapi casarakuy fiesta qhepamanmi Jesusqa mamanwan wayqenkunapiwan Capernaum llaqtata riranku. Paypa wayqenkunan karan: Santiago, José, Simón, Judas ima.

Capernaum llaqtaqa allin partepin kasharan, aswan jatuntaqmi Nazaret llaqtamantapas Caná llaqtamantapas kanman karan. Chaychá Jesusqa chayman riran. Chaymantapas chay llaqtapi otaq chay cercallapin tiyaranku wakin discipulonkuna. Chhaynaqa manan wasinkutaraqchu saqenanku karan paykunata Jesús yachachinanpaqqa.

Capernaum llaqtapin Jesusqa askha milagrokunata ruwaran. Askha runataqmi chay llaqtapi, muyuriqninpi kaq llaqtachakunapipas chay ruwasqanmantaqa yacharanku. Chaymantan Jesusqa paywan kashaq Dios sonqo judiokunapiwan Jerusalenta riranku Pascua fiestaman. Chaykunan pasaran 30 watapi.

Templopi kashaspankun Jesuspa discipulonkunaqa anchata admirakuranku Jesuspa imachus ruwasqanwan.

Diospa kamachikuyninman jinan Israel runakunaqa sacrificiokunata templopi jaywananku karan. Chaymi karu llaqtamanta jamuq judiokunaqa apamusqanku qolqewan rantikunanku karan wakatapas, ovejatapas, cabratapas, otaq ima necesitasqankutapas Jerusalenpi kashanankukama (Deuteronomio 14:24-26). Chaypaqmi Jerusalenpi karan uywa vendeqkuna, urpi vendeqkuna ima. Ichaqa kikin temploq pationpin chaykunata vendesharanku, wakinqa askha qolqepaqraqtaqmi vendesharankupas.

Chayta rikuspan Jesusqa sinchitapuni phiñakuran, jinaspa chay negocio ruwaqkunata qarqomuran, qolqe cambiaqkunaq mesankutapas t’ijrarpariran qolqenkutapas jich’arpariran. Jinaspan niran: “¡Orqoychis kaykunata! ¡Yayaypa wasinqa manan negocio ruwana wasichu!”, nispa (Juan 2:16).

Jesuspa discipulonkunataq chayta rikuspa yuyariranku: “Wasiykita mayta munakusqaymi nina jinaraq noqapi raurarinqa”, nisqa qelqasqata. Judiokunan ichaqa niranku: “Juj señaltayá rikuchiwayku, chhaynapi kaykunata ruwanaykipaq derechoyoqchus kanki icha manachus chayta yachanaykupaq”, nispa. Jinan Jesusqa niran: “Kay templota thuniychis, noqataq kinsa p’unchayllapi jatarirachisaq”, nispa (Juan 2:17-19; Salmo 69:9).

Judiokunataq kikin templomantapuni rimashananpaq piensaspanku niranku: “Kay templotaqa tawa chunka soqtayoq watapimá ruwakuran, ¿chaychu qanri kinsa p’unchayllapi ruwaruwaq?”, nispa (Juan 2:20). Jesusmi ichaqa mana chay templomantachu rimasharan, aswanpas cuerponmantan rimasharan. Kinsa wata qhepatañan discipulonkunaqa chayta entienderanku Jesús kausarimpuqtin.