Kichay leenaykipaq

Índice nisqaman riy

 51 CAPÍTULO

Herodespa fiestanpi Juanta wañuchinku

Herodespa fiestanpi Juanta wañuchinku

MATEO 14:1-12 MARCOS 6:14-29 LUCAS 9:7-9

  • HERODES BAUTIZAQ JUANPA UMANTA WIT’UCHIN

Jesuspa apostolninkunaqa jinantin Galileapin predicasharanku, Jesusta reqsichiq bautizaq Juanmi ichaqa yaqa iskay wataña carcelpi kasharan.

Rey Herodes Antipasmi paytaqa carcelman wisq’achiran. Chay reymi “Diospa kamachikuyninta junt’ani” nishaspa esposanmanta divorciakapuran wayqen Filipoq esposan Herodiaswan casarakunanpaq. Chay ruwasqanmanta Juan juchachaqtinmi Herodesqa payta carcelman wisq’achiran. Esposan Herodiasmi chayta ruwananpaqqa tanqanman karan.

Juantaqa llapa runan “profeta” niqku, chaymi Herodesqa mana munaranchu imananankutapas (Mateo 14:5). Herodiasmi ichaqa Juanta sinchita cheqnikuspa wañuchiytapuni munasharan (Marcos 6:19). Jinan juj kuti chayta ruwananpaq oportunidad chayamuran.

32 watapi Pascua fiestapaq pisillaña faltashaqtinmi rey Herodesqa wata junt’ay p’unchayninta fiestakuran. Chaymanqa askhan jamuranku umalli runakuna, ejercitopi comandantekuna, Galileapi allichachaq runakuna ima. Chay invitadonkunawan kashaqtinmi Herodiaspa ususin Salomé sumaqta tusuran, chaywanqa anchatan kusikuranku Herodespas invitadonkunapas.

Chaymi Herodesqa chay sipasta niran ima munasqantapas mañakunanpaq. Jurasparaqmi niran: “Imapas mañakuwasqaykitaqa qosaykipunin, kamachisqay llaqtaq kuskannintaña mañakuwanki chaypas qosaykin”, nispa. Sipastaq mamanta tapuran: “¿Imatan mañakuyman?”, nispa (Marcos 6:22-24).

Jinan maman Herodiasqa niran: “Bautizaq Juanpa umanta mañakuy”, nispa. Chaymi chay sipasqa Herodespa kasqanman kutispa mañakuran: “Bautizaq Juanpa umanta kunanpacha juj platopi qoway”, nispa (Marcos 6:24, 25).

Herodestaq anchata chaywan llakikuran, ichaqa invitadonkunaq ñaupanpi jurasqanraykun mana atiranchu “manan” niyta. Chaymi payqa juj guardiata kamachiran Juanpa umanta wit’umunanpaq. Chay guardiataq Juanpa umanta wit’umuspa juj platopi chayta apamuran. Jinan Herodesqa sipasman qoran, paytaq mamanman aparan.

Chay pasasqanmanta yachaspan Juanpa discipulonkunaqa jamuspa cuerponta apapuranku, jinaspa p’ampamuranku. Chaymantataq Jesusman chayta willaranku.

Chaykuna qhepatan Herodesqa uyariran Jesuspa milagrokuna ruwasqanmanta, chaymi sinchita admirakuran. Paymi piensasharan Jesús bautizaq Juan kananpaq (Lucas 9:7). Chaymi Jesustaqa rikuytapuni munaran pipunichus pay kasqanta yachananpaq. Ichaqa manan imapas paymanqa qokuranchu Jesuspa imachus yachachisqanqa.