Kichay leenaykipaq

Índice nisqaman riy

 112 CAPÍTULO

“Makilla kashaychis”

“Makilla kashaychis”

MATEO 25:1-13

  • JESÚS WILLAN CHUNKA SIPASKUNAMANTA

Jesusmi apostolninkunaman willasharan paypa chayamunan tiempomanta, tukukuy tiempomantawan. Chaypin paykunaman willallarantaq juj ejemplotawan. Chay ejemploq junt’akusqantaqa paypa chayamunan tiempopi kausaqkunañan rikunanku karan.

Khaynatan niran: “Janaq pacha gobiernoqa kaymanmi rijch’akun: Chunka sipaskunan mecherontinkama novioman taripaq lloqsiranku. Paykunamanta pisqan karan mana allin yuyayniyoq, pisqataq allin yuyayniyoq”, nispa (Mateo 25:1, 2).

¿Imatan chaywan Jesús yachachisharan? ¿Diospa gobiernonman jaykuqkunamanta wakinchu allin yuyayniyoq kananku karan wakintaq mana allin yuyayniyoq? Manan. Ichaqa sapankankumantan dependenan karan makillachus kashananku karan icha manachus chayqa. Chaytan Jesusqa chay ejemplowan yachachisharan. Chhaynaqa sapanka discipulonkunan kallpachakunanku karan Diosta servinankupaq, chhaynapi bendicionkunata chaskinankupaq.

Chay ejemplo willasqanpi sipaskunaqa chunkantinsi novioman taripaq lloqsisqaku, mecherontinkamas lloqsisqaku, chhaynapi novio chayamuqtin chaywan purinan ñanta k’anchaykunankupaq. Chaywanmi noviota sumaqta chaskinanku karan novianta wasinman pusanankama. ¿Iman pasaran chay sipaskunawan?

 Chaymantan Jesús niran: “Mana allin yuyayniyoqkunaqa aparankuña mecheronkuta chaypas, manan aparankuchu yapanankupaq aceiteta. Allin yuyayniyoqkunan ichaqa mecheronkuta apasqankumantapas apallarankutaq yapanankupaq aceitetapas. Novio tardamuqtinmi puñuy aysaqtin llapanku puñupuranku”, nispa (Mateo 25:3-5). Novioq tardamusqanmanta Jesús rimaqtinqa discipulonkunaqa yuyarirankuchá reykunaq familianpi naceq runamanta willasqanta, chay runaqa ‘unay tiempomantañas reyña kutimusqa’ (Lucas 19:11-15).

Chunka sipasmanta willasqanpin Jesusqa niran: “Kuska tutatataq juj wajakuy uyarikuran: ‘¡Kaypiñan novioqa kashan, taripamuychis payman!’”, nispa (Mateo 25:6). ¿Iman pasaran chay chunka sipaskunawan?

Chaymantan Jesús niran: “Jinan chay sipaskunaqa jatarispa mecheronkuta alistaranku. Mana allin yuyayniyoq sipaskunataq allin yuyayniyoqkunata niranku: ‘Juj chikan aceiteykichista qoykuwayku, mecheroykun wañurapushanña’, nispa. Jinan allin yuyayniyoq sipaskunaqa niranku: ‘Manapaschá llapanchismanqa aypawasunmanchu. Aswanpas phawaychis vendeqkunamanta rantirakamuychis’”, nispa (Mateo 25:7-9).

Chay mana yuyayniyoq sipaskunaqa manan preparasqachu kasharanku noviota chaskinankupaq, mecheronkuq aceitenku tukukapusqanrayku, chaymi aceitemanraq rinanku karan. Chaymantan Jesús niran: “Paykuna rantiq rishanankukamataq novioqa chayamuran, jinan listo kashaq sipaskunaqa noviowan kuska casarakuy fiestaman jaykuranku, punkutataq wisq’ampuranku. Chay qhepatataq wakin sipaskunapas jamuspa niranku: ‘¡Señor, Señor, kichamuwayku!’, nispa. Noviotaq paykunata niran: ‘Cheqaqtan niykichis: Manan reqsiykichischu’”, nispa (Mateo 25:10-12) Chhaynapin chay sipaskuna rikukuranku mana allin preparasqa kasqankurayku.

Apostolkunaqa repararankuchá chay ejemplopi novioqa Jesusta representasqanta. Juj kutinpas ñan Jesusqa juj noviowan pay kikinta comparakuranña (Lucas 5:34, 35). Chaymantapas “pisi t’aqa” ovejakunamanta rimaspan payqa niran: “P’achasqallaña listo kashaychis, mecheroykichispas jap’ichisqallaña kashachun”, nispa (Lucas 12:32, 35). Chhaynaqa chay ejemplopi allin yuyayniyoq sipaskunaqa “pisi t’aqa” ovejakunatan representaran. ¿Imatan Jesús chay ejemplowan yachachisharan?

Chaywanmi yachachisharan makilla kashanankupaq, chaymi niran: “Makilla kashaychis, manan yachankichischu ima p’unchaychus ima horachus chay kananta”, nispa (Mateo 25:13).

Jesusqa llapan discipulonkunatan kallpachasharan chayamunan tiempota makilla suyakunankupaq, chhaynapi chay allin yuyayniyoq sipaskuna jina llapanku premionkuta chaskinankupaq.