Kichay leenaykipaq

Índice nisqaman riy

 7 CAPÍTULO

Ch’aska qhawaq watuqkuna Jesusta visitanku

Ch’aska qhawaq watuqkuna Jesusta visitanku

MATEO 2:1-12

  • WATUQKUNATA JUJ CH’ASKA PUSAN JERUSALENMAN, CHAYMANTATAQ JESUSPA KASQANMAN

Inti lloqsimuy ladomantan wakin runakuna Jesusta watukuq jamuranku. Chay runakunaqa ch’askata qhawaspa watuqkunan karanku (Isaías 47:13). Paykunaqa sinchi karutan purimusqaku juj ch’askata qatikamuspa, ichaqa manan Jesuspa kasqan Belén llaqtamanchu chay ch’askaqa pusamuran, aswanpas Jerusalén llaqtamanmi.

Chaypin paykuna tapukuranku: “¿Maypin kashan judío runakunaq reynin kananpaq naceq wawa? Inti lloqsimuy ladopi kashaspaykun ch’askanta rikumuyku, chaymi kunan jamushayku payman k’umuykunaykupaq”, nispa (Mateo 2:1, 2).

Chayta yacharuspan Jerusalenpi rey Herodesqa sinchita phiñakuran. Jinaspa umallikunata wajachimuspa tapuran maypichus Cristo nacenan karan chayta. Paykunataq Diospa simin qelqapi nisqanman jina “Belén llaqtapin” niranku (Mateo 2:5; Miqueas 5:2). Jinan Herodesqa chay watuqkunata pakallapi wajachimuspa niran: “Riychis, jinaspa allintapuni maskhamuychis chay erqechata, tarimuspaykichistaq kutimuspa willawankichis, chhaynapi noqapas rispa payman k’umuykamunaypaq”, nispa (Mateo 2:8). Herodesqa Jesusta wañuchiyta munaspan chaytaqa niran.

Chaymanta watuqkuna ripuqtinmi inti lloqsimuy ladopi rikusqanku ch’aska wajmanta rijurimuran, jinaspa ñaupankuta riran Jesuspa kasqan wasikama. Chay ch’askaqa manan común ch’askachu karan, aswanpas watuqkunata pusananpaqmi churasqa karan.

Wasiman jaykuqtinkun chaypi Mariawan wawan Jesuswan kashasqaku. Jinan watuqkunaqa Jesusman k’umuykuranku, jinaspa regalokunata qoranku: qorita, yuraq inciensota, sumaq q’apaq mirratawan. Chaymanta ripunanku kashaqtinmi Dios paykunata mosqoyninkupi kamachiran ama Herodesman kutinankupaq, chaymi paykunaqa waj ñanninta ripuranku.

¿Pitaq chay watuqkunata pusaq ch’askatari churanman karan? Rikusqanchis jina, chay ch’askaqa manan Jesuspa kasqan Belén llaqtamanchu ñaupaqtaqa pusaran, aswanpas Jesusta wañuchiy munaq rey Herodespa kasqanmanmi. Payqa wañuchinmanmi karan Jesusta manachus Dios chay watuqkunaman mosqoyninkupi rijurinman karan chayqa. Chhaynaqa chay ch’askataqa Diospa enemigon Satanaspunin churanman karan, chhaynapi Jesusta wañuchinankupaq.