Kichay leenaykipaq

Índice nisqaman riy

 32 CAPÍTULO

¿Ima ruwaymi allin kanman sábado p’unchaypi?

¿Ima ruwaymi allin kanman sábado p’unchaypi?

MATEO 12:9-14 MARCOS 3:1-6 LUCAS 6:6-11

  • MAKIN CH’AKISQA RUNATA JESÚS QHALIYACHIN SÁBADO P’UNCHAYPI

Jesusqa Galileapi kashaspan sinagoga wasita sábado p’unchaypi jaykunman karan. Chaypin “kasharan juj runa paña makin ch’akisqa” (Lucas 6:6). Jinan kamachikuy simita yachachiqkunawan fariseokunapiwan Jesusta tapuranku: “¿Allinchu kanman sábado p’unchaypi pitapas qhaliyachiy?”, nispa (Mateo 12:10).

Chaytaqa tapuranku imallamantapas juchachayta munaspankun, paykunamanqa manan imapas qokuranchu chay onqosqa runaqa. Chaymantapas chay umallikunaq nisqanman jinaqa llank’aysi karan sábado p’unchaypi jampikuyqa, chaymi prohibiqku moqonmanta lloqsirapuq tulluta sitionman churaykapuyta, imantapas q’ewikuqpas manas chay p’unchaypiqa jampikunanchu karan, sinchi grave kashaspallas pipas jampikunan karan.

Chay umallikunaqa manan Diospa siminpi nisqanman jinachu ruwasharanku chaykunata jark’aspaqa (Éxodo 20:8-10). Arí, paykunaq imayna piensasqanqa manan allinchu kasharan. Chaymi ñaupaqpas Jesusta juchacharanku sábado p’unchaypi milagro ruwasqanmanta. Jesusqa paykuna pantasqa kashasqankuta rikuchinanpaqmi chay ch’akisqa makiyoq runata niran: “Sayarispa kay chaupiman jamuy”, nispa (Marcos 3:3).

Chay umallikunatataq tapuran: “¿Mayqenniykichistaq juj ovejaykichis sábado p’unchaypi t’oqoman urmaykuqtin mana orqowaqchischu?”, nispa (Mateo 12:11). Chay runakunaqa manan ovejanku t’oqopi wañunantaqa munankumanchu karan, chayqa qolqe pierdeychá paykunapaqqa kanman karan. Chaymantapas juj chanin runaqa allintan uywankunata rikunan karan (Proverbios 12:10).

Chaymantan Jesusqa niran: “¿Manachu runaqa ovejamantapas aswan valorniyoqraq? Chhaynaqa, allinmi sábado p’unchaypi allin kaqta ruwayqa”, nispa (Mateo 12:12). Chayta niqtinmi chay umallikunaqa ch’inlla karanku, manañan imatapas nirankuchu. Chhaynaqa manan Jesusqa ima juchatapas ruwasharanchu sábado p’unchaypi pitapas qhaliyachispaqa.

Chaymi Jesusqa phiñasqa llakisqa ima muyuriqninta qhawarispa chay makin ch’akisqa runata niran: “Makiykita jaywarimuy”, nispa (Mateo 12:13). Jinan makinqa kaq rato allin kapuran, chay runaqa maytan chaywan kusikuran. Ichaqa, ¿kusikurankuchu chay umallikuna?

Manan kusikurankuchu. Chaymi fariseokunaqa chaymanta rispa “Herodespa t’aqanmanta kaqkunawan Jesusta wañuchinankupaq rimanakuranku” (Marcos 3:6). Chay Herodespa t’aqan ukhupin “saduceo” nisqa umallikunapas kasharanku, fariseokunawan saduceokunawanqa manan rimanakuqkuchu imapichus creesqankuta mana tupachisqankurayku. Chay p’unchaymantapachan ichaqa jujlla kapuranku Jesuspa contranpi.