Kichay leenaykipaq

Índice nisqaman riy

 67 CAPÍTULO

Manan pipas pay jinaqa yachachiqchu

Manan pipas pay jinaqa yachachiqchu

JUAN 7:32-52

  • GUARDIAKUNATA KACHANKU JESUSTA JAP’IMUNANKUPAQ

  • NICODEMO JESUSTA DEFIENDEN

Jesusqa ancha kusisqan kasharan Jerusalén fiestapi ‘askha runakuna paypi iñiqtinku’. Judío umallikunan ichaqa chaywan phiñasqa kasharanku, chaymi guardiakunata kacharanku Jesusta jap’imunankupaq (Juan 7:31, 32). Chaywanpas Jesusqa manan pakakuranchu.

Aswanmi payqa lliupa ñaupanpi niran: “Juj chikan tiempotawanraqmi qankunawan kasaq, chaymantaqa kachamuwaqniymanmi kutipusaq. Qankunaqa maskhawankichismi, ichaqa manan tariwankichischu. Maypichus kasaq chaymanqa manan jamuyta atiwaqchischu”, nispa (Juan 7:33, 34). Judiokunataq chayta mana entiendespa ninakuranku: ‘¿Maymantaq kay runari riyta munashan, chaytaq manari tarisunmanchu? Icha, ¿griego runakuna ukhupi ch’eqerisqa judiokunamanchu riyta munashanpas? ¿Ima ninantataq nishan: “Maskhawankichismi, ichaqa manan tariwankichischu. Maypichus kasaq chaymanqa manan jamuyta atiwaqchischu”, nispa nisqanwanri?’, nispa (Juan 7:35, 36). Jesusmi ichaqa cieloman ripunanmanta rimasharan.

Chay fiesta p’unchaykunapin sacerdotekunaqa sapa tutamanta Siloam estanquemanta orqomusqanku unuta templopi altarman jich’aykuqku, chhaynapin chay unuqa altarpa pachanmanta phawamuq. Chayta yachaspachá Jesusqa fiesta tukukuy p’unchayta niran: “Pipas ch’akichikuqqa noqaman jamuchun, jinaspa unuta ujachun. Pipas noqapi iñiqmantaqa, Diospa simin qelqapi nisqan jina, ‘kausay qoq unun sonqon ukhumanta askhapuni t’ojamunqa’”, nispa (Juan 7:37, 38).

Chaywanmi Jesusqa rikuchisharan discipulonkuna santo espirituta chaskiqtinku imachus pasanan karan chayta. Paykunaqa 33 watapin Pentecostés fiesta p’unchaypi santo espirituta chaskiranku. Chay p’unchaymi willayta qallariranku  Diospa cheqaq yachachikuyninkunata; chay ruwasqankun karan kausay qoq unupas t’ojamuyta qallarinman jina.

Jesusta uyarispan runakunaqa ninakuranku: “Kayqa jamunan karan chay profetapunin kanman”, nispa. Wakinpas nirankun: “Payqa Cristopunin kanman”, nispa. Wakintaq ichaqa niranku: ‘Cristoqa manamá Galileamantachu jamunan karan riki. ¿Manachu Diospa simin qelqaqa: “Cristoqa Davidpa mirayninmanta, Davidpa tiyasqan Belén ayllumantan jamunqa”, nishan?’, nispa (Juan 7:40-42).

Chaymi runakunaqa t’aqanasqa kasharanku. Wakinqa jap’iytaña Jesusta munaranku chaypas, manan imanarankupaschu. Judío umallikunaq kachamusqanku guardiakunapas jinallan kutipuranku, chaymi umallikunaqa niranku: “¿Maytaq chay runari? ¿Imaraykun mana apamurankichischu?”, nispa. Guardiakunataq niranku: “Manan jayk’aqpas uyariraykuchu pitapas pay jina yachachiqtaqa”, nispa. Chaymi chay umallikunaqa paykunata niranku: “¿Qankunapas engañarachikamullankichistaqchu? ¿Mayqellanpas umallikunamanta fariseokunamantapas paypi iñirankuchu? Manan ¿riki? Chay runakunan ichaqa kamachikuy simita mana reqsinkuchu, chaymi ñakasqa kanku”, nispa (Juan 7:45-49).

Jinan paykunamanta jujnin, juj kuti tutallapi Jesusman riq Nicodemo sutiyoq runa niran: “Kamachikuyninchisman jinaqa pitapas juzgananchispaqqa paytaraqmi ñaupaqta uyarinanchis, chhaynapi imachus ruwasqanta yachananchispaq ¿riki?”, nispa. Jinan paykunaqa niranku: “¿Galileamantachu qanpas kanki? Allintayá estudiay qelqakunata, chhaynapin yachanki Galileamantaqa mana pi profetapas jamunanchu karan chayta”, nispa (Juan 7:51, 52).

Manaña Diospa simin qelqa sut’itachu willaran Galileamanta juj profeta jamunanta chaypas, willaranmi ‘mana judío runakunaq tiyanan Galilea allpapi jatun k’anchayta runakuna rikunankumanta’ (Isaías 9:1, 2; Mateo 4:13-17). Chaymantapas Jesusqa Belén llaqtapin naceran, Davidpa familianmantataqmi karanpas. Fariseokunaqa yachankumanmi karan chaykunataqa, chaywanpas runakunatan pantachiranku pipunichus Jesús kasqanta mana yachanankupaq.