Kichay leenaykipaq

Índice nisqaman riy

 138 CAPÍTULO

Cristo tiyaykun Diospa paña ladonpi

Cristo tiyaykun Diospa paña ladonpi

HECHOS 7:56

  • JESÚS TIYAYKUN DIOSPA PAÑA LADONPI

  • SAULO SUTIYOQ RUNA CRISTOPI IÑIPUN

  • KUSIKUNANCHISPAQ WILLAKUY

Jesús wichapusqanmanta chunka p’unchay qhepata, Pentecostés p’unchaypi santo espirituta discipulokuna chaskisqankupin sut’ita rikukuran pay cielopiña kasqanta. Chaytaqa aswan allintaraqmi rikukuran Jesuspa discipulon Estebanta manaraq wañuchishaqtinku. Chaypin payqa niran: “¡Qhawariychis! Cielotan rikushani kicharayashaqta, runaq Churintataq Diospa paña ladonpi sayashaqta”, nispa (Hechos 7:56).

Cielopi kashaspan Jesusqa Diospa juj kamachinanta suyanan karan. Chaymantan Diospa simin qelqapi willakuranña juj salmo takipi. Chaypin nin: “[Jehová] Diosmi Señorniyta niran: ‘Paña ladoypi tiyaykuy, auqaykikunata chaki sarunaykiman churanaykama’”, nispa. Tiempo junt’akuqtintaq Diosqa Señor Jesusta ninan karan: “¡Auqaykikunata kamachiy!”, nispa (Salmo 110:1, 2). Chaykaman ichaqa Jesús juj ruwaykunapi tukuy yuyayninta churanan karan.

33 watapi Pentecostés p’unchaymantapachan Jesusqa cristiano iñiq t’aqata cielomantapacha umallinan karan. Arí, janaq pachapaq ajllasqakunatan gobiernanan karan (Colosenses 1:13). Paykunatan yanapanan karan predicanankupaq, allintataq preparanan karan wañupunankukama Diospaq junt’aq kanankupaq, chhaynapi jamuq tiempopi kausarichisqa kaspa paywan kuska Diospa gobiernonpi kamachikunankupaq.

Jesuspa juj allin yachachisqanmi karan Saulo sutiyoq runa, paytan astawan reqsiranku Pablo sutiwan. Manaraq Cristopi iñishaspapas payqa tukuy sonqowanmi Diospa kamachikuyninkunata junt’aq, ichaqa judío umallikunan mana allinta yachachisqaku, chaymi Estebanta wañuchisqankutapas allinpaq qhawariran. Chaymantapas Sauloqa ‘amenazashallaranmi Jesuspa discipulonkunata, wañuchiytataqmi munasharanpas’. Chaymi uma sacerdote Caifasmanta cartakunata qochikuran, Damasco llaqtapi cristianokunata watasqata Jerusalenman apamunanpaq (Hechos 7:58; 9:1). Chay llaqtaman rishaqtinmi ichaqa qonqaylla juj k’anchay sinchitapuni payman k’anchaykuran, chaywanmi payqa pampamanraq wijch’ukuran.

 Jinaspa juj kunkata uyariran: “Saulo, Saulo, ¿imanaqtinmi qatikachawashanki?”, nispa nimuqta. Chaymi payqa niran: “¿Pin kanki, wiraqocha?”, nispa. Jinan chay kunkaqa nimuran: “Noqaqa Jesusmi kani, noqatan qatikachawashanki”, nispa (Hechos 9:4, 5).

Jinaspan Jesusqa Saulota kamachiran Damasco llaqtaman rinanpaq. Chaypiñan payta ninanku karan imatachus ruwanan karan chayta. Jinan Sauloqa makinmanta pusasqa chay llaqtaman riran ñawin ñausayapusqanrayku. Chay llaqtapin tiyaran Ananías sutiyoq runa, paytan Jesusqa juj rijuriypi kamachiran Sauloq alojakusqan wasita rinanpaq. Ananiasqa manchakusharanmi chayman riyta, Jesusmi ichaqa niran: “Phaway rillay, chay runatan noqaqa ajllakuni waj nación runakunaman, reykunaman, Israel runakunamanwan noqamanta willamunanpaq”, nispa. Chayman riqtinmi Sauloqa qhawaripuran, jinaspa chay Damasco llaqtapi “willaranpacha Jesusqa Diospa Churin kasqanmanta” (Hechos 9:15, 20).

Jesuspa yanapayninwanmi Pablopas juj cristianokunapas lliu llaqtaman aparanku Jesuspa qallarichisqan allin willakuykunata, Diostaq bendeciran chay ruwasqankuta. Chaymi Pabloqa Cristopi iñipusqanmanta 25 wata qhepallata niran: “Chay allin willakuykunataqa pachantinpiñan predicakun”, nispa (Colosenses 1:23).

Watakunaq pasasqanman jinan Jesusqa munasqa apostolnin Juanman rijuriykunapi imaymanata rikuchiran. Chaykunan tarikun Apocalipsis libropi. Chay rijuriykunapin Juanqa Jesusta rikuran Diospa gobiernonpi jamushaqta (Juan 21:22). Chhaynapin Juanqa ‘santo espirituq apasqan kaspa qonqaylla Señorpa p’unchayninpi rikukuran’ (Apocalipsis 1:10).

Bibliapi profeciakunaq willasqanman jinaqa chay ‘Señorpa p’unchayninqa’ 1914 watapin qallariran. Chay watapin karan “primera guerra mundial” nisqapas. Chaymantapachan astawan rikukushan guerrakuna, onqoykuna, yarqaykuna, terremotokuna, jujkunapas. Chaywanmi junt’akushan apostolninkunaman Jesuspa willasqan ‘señal’ (Mateo 24:3, 7, 8, 14). Allin willakuykunapas lliu pachantinpin willakushan, manan apostolkunaq predicasqan llaqtakunallapichu.

¿Imatan chaykuna rikuchiwanchis? Diospa gobiernon cielopi churasqaña kasqantan. Chaymantan apóstol Juan niran: ‘¡Ñan qallarinña Diosninchispa salvacionninpas, atiyninpas, gobiernonpas, Cristonpa atiyninpas!’, nispa (Apocalipsis 12:10).

Chayqa ancha allin willakuymi Jesusta llapa qatikuqkunapaq. Chaymi tukuy yuyaywan Juanpa nisqanta uyarinanchis. Paymi nillarantaq: “Chayrayku, ¡kusikuychis janaq pachapi kaqkuna! Ichaqa, ¡imaraqchá kanqa allpa pachamanta, lamar-qochamantapas! Saqran sinchi phiñasqa qankunaman uraykamushan, yachanmi payqa tiempon pisillaña kasqantapas”, nispa (Apocalipsis 12:12).

Chhaynaqa, Jesusqa manan Diospa paña ladonpi tiyaspañachu kashan, aswanmi reyña cielopi kamachikushan, pisi tiempomantataq llapan enemigonkunata chinkachipunqa (Hebreos 10:12, 13). ¿Imakunan chaymanta pasanqa?