Kichay leenaykipaq

Índice nisqaman riy

 121 CAPÍTULO

‘¡Kallpachakuychis! Noqaqa atipaniñan kay pachata’

‘¡Kallpachakuychis! Noqaqa atipaniñan kay pachata’

JUAN 16:1-33

  • APOSTOLKUNAQA MANAÑAN JESUSTA RIKUNANKUCHU KARAN

  • APOSTOLKUNAQ LLAKIKUYNINMI KUSIKUYMAN TUKUPUNAN KARAN

Jesuswan apostolkunawanqa lloqsinankuñan kasharan Pascua mijusqanku cuartomanta. Chaypin Jesusqa imaymanamanta willaspa paykunata niran: “Chaykunataqa nishaykichis ama saqerpariwanaykichispaqmi. Sinagogamantan qarqosqa kankichis. Tiempon chayamushan, chaypachan runakunaqa qankunata wañuchispa piensanqaku Diosta servishanankupaq”, nispa (Juan 16:1, 2).

Chayraqmi Jesusqa apostolkunaman willasharan wañuchisqa kanankumanta. Chayta uyarispaqa anchatachá paykunaqa llakikuranku. Jinan Jesusqa niran: “Qankunawan kashasqayraykun chaykunataqa mana qallariymantapachachu niraykichis”, nispa (Juan 16:4). Jesusqa ripunanñataq karan chayqa, sut’intan paykunaman willasharan imachus pasananta, chhaynapi mana pisipanankupaq.

Jesusqa nillarantaqmi: “Kunanmi ichaqa kachamuwaqniyman ripusaq. ¿Manachu mayqennillaykichispas tapuriwankichis: ‘¿Maytataq rinkiri?’, nispa?”, nispa (Juan 13:36; 14:5; 16:5). Chaykuna ñaupaqllatan paykunaqa Jesusta tapuranku maymanchus rinan karan chayta, imachus paykunawan pasananta pay willaqtinmi ichaqa manaña chaymantaqa tapurankuñachu, llakisqa kasqankurayku. Chhaynapin mana chay ratopi yacharankuchu imas Jesuswan cielopi pasanan karan chayta, imaynapin chay llapa Dios serviqkunaq allinninpaq kanan karan chaytapas. Chaymi Jesusqa niran: “Qankunaqa chaykunata nisqaywanmi sonqoykichispi sinchi llakisqa kashankichis ¿riki?”, nispa (Juan 16:6).

Jinaspa niran: “Allinniykichispaqmi noqaqa ripusaq; manachus ripuyman chayqa, manan yanapaqqa jamunmanchu, ripuspaymi ichaqa noqa chay yanapaqta kachamusaykichis”, nispa (Juan 16:7). Chhaynaqa Jesús wañuspa cieloman ripullaqtinmi pachantinpi discipulonkunaqa santo espirituta chaskinanku karan.

Chay santo espiritun ‘kay pacha runakunaman sut’ita rikuchinan karan imachus jucha chayta, imachus chanin kay chayta, imachus Diospa juzgaynin chaytawan’ (Juan 16:8). Arí, santo espiritun rikuchinan karan runakuna Jesuspi mana iñisqankuqa jucha kasqanta, chaymantapas Jesús cieloman ripusqanwanmi santo espíritu rikuchinan karan pay chanin kasqanta, “kay pachata kamachiq” Satanastaq juchachanapuni kasqantawan (Juan 16:11).

Jesusqa nillarantaqmi: “Imaymanakunaraqmi qankunaman ninay kashan, ichaqa sasa entiendeyraqmi kunanqa kasunkichisman”, nispa. Santo espirituñan paykunamanqa “cheqaq kaqta” llapanta entiendechinan karan, chhaynapi chayman jina kausanankupaq (Juan 16:12, 13).

Chaymantan Jesusqa niran: “Juj chikanmantaqa manañan rikuwankichisñachu, chaymantapas juj chikanmantaqa rikuwallankichismi”, nispa. Jinan discipulonkunaqa chay nisqanmanta tapunakuyta qallariranku. Jesustaq payta tapuyta munasqankuta yachaspa niran: “Qankunaqa waqankichismi, [...] kay pacha runakunataq kusikunqaku; qankunaqa sinchi llakisqan kashankichis, ichaqa llakikuyniykichismi kusikuyman tukupunqa”, nispa (Juan 16:16, 20). Chaymi junt’akunan karan Jesusta wañuchiqtinku, chaypachan religionpi umallikunaqa kusikunanku karan, apostolkunataq sinchita llakikunanku karan. Chaymantan ichaqa apostolkuna anchata kusikunanku karan Jesús kausarimpuqtin, astawantaq chay kusikuyninku yapakunan karan santo espirituta chaskiqtinku.

Jesusqa nillarantaqmi: “Warmiqa sinchitan nanachikun onqokunan hora chayamuqtinqa ¿riki?, onqokusqan qhepamanmi ichaqa manaña  ñak’arisqantapas yuyarinchu nacemuq wawanta rikusqanrayku. Chhaynallataqmi qankunapas kunanqa sinchi llakikuypi kashankichis, jujmanta qankunawan tupaqtiymi ichaqa sonqoykichisraq kusikuymanta llanllarinqa”, nispa (Juan 16:21, 22).

Chaymantataq Jesusqa niran: “Chay p’unchayqa qankunañan Yayamanta sutiypi mañakunkichis”, nispa. ¿Imanaqtinmi Jesuspa sutinpi mañakunanku karan? ¿Manañachu Yayan Dios paykunata uyariyta munaran? Manan. Yayaqa munakuranmi paykunataqa, chaymi Jesusqa niran: “Noqata munakuwasqaykichisrayku, Yayaq sutinpi jamusqayta creesqaykichisrayku iman Yayaqa qankunata munakusunkichis”, nispa (Juan 16:26, 27).

Jinan apostolkunaqa niranku: “Chaypin reparayku Diosmanta jamusqaykita”, nispa. Jinan Jesusqa pruebapi tarikunankuta yachaspa niran: “Ñan hora chayamushanña, kaypiñataqmi kashanpas, chaypin qankunaqa wasiykichisman ch’eqerinkichis, noqatataq sapallayta saqerpariwankichis. Chaykunataqa nishaykichis noqarayku thaj kanaykichispaqmi. Kay pachapiqa sasachakuykunapin tarikunkichis, ichaqa ¡kallpachakuychis!, noqaqa ñan atipaniña kay pachata”, nispa (Juan 16:30-33). Jesusqa ripuspapas yanapashanallanmi karan paykunataqa, chhaynapi pay jina kay pachata atipanankupaq. Chaypaqmi paykunaqa tukuy sonqo junt’ananku karan Diospa munayninta, imataña Saqra kay pachapi runakunapas ruwananku karan chaypas.