Kichay leenaykipaq

Índice nisqaman riy

 41 CAPÍTULO

¿Piqpa atiyninwanmi Jesús milagrokunata ruwaran?

¿Piqpa atiyninwanmi Jesús milagrokunata ruwaran?

MATEO 12:22-32 MARCOS 3:19-30 LUCAS 8:1-3

  • JESÚS WAJMANTA GALILEAPI PREDICAYTA QALLARIN

  • ASKHA SUPAYKUNATA QARQON

  • MANA PERDONANA JUCHAMANTA RIMAN

Simonpa wasinpi kasqan qhepamanmi Jesusqa wajmanta Galileapi predicayta qallariran. Chaypaqqa wata masñan Jesusqa predicasharan. Paywan kuskan riranku 12 apostolninkuna, “millay espiritukunamanta onqoykunamantawan qhaliyachisqa wakin warmikunapas” (Lucas 8:2). Paykunamanta wakinmi karan María Magdalena, Susana, rey Herodespa wasinpi encargadoq esposan Juana ima.

Jesusmanta astawan yachasqankuman jinan runakunaqa t’aqanasqa kasharanku paymanta imachus rimasqankupi. Chaymi sut’ita rikukuran supaypa junt’aykusqan mana rimaq ñausa runata Jesús qhaliyachiqtin. Chay ruwasqanta rikuspan runakunaqa ancha admirasqa ninakuranku: “¿Paychu icha Davidpa Churinqa kanpas?”, nispa (Mateo 12:23).

Wakin fariseokuna, kamachikuy simita yachachiqkuna iman ichaqa mana chhaynatachu Jesusmanta piensaranku. Paykunan Jerusalenmantaraq jamusqaku Jesuspa kasqan wasiman. Chay wasiqa junt’an kasharan runakunawan, chaymi Jesuswan discipulonkunawanqa mana mijuytapas atirankuchu. Chay umallikunan nisharanku: “Kayqa supaykunata kamachiq Beelzebubpa atiyninwanmi supaykunata qarqon”, nispa (Marcos 3:22). Chhaynapin ch’aqwa jatariran. Chaymanta yachaspan Jesuspa familiankunapas jamuranku payta pusakapuq.

Jesuspa wayqenkunaqa manan paypi iñirankuraqchu chay tiempopaqqa (Juan 7:5). Chaymantapas paykunaqa kuskataq Jesuswan wiñaranku chayqa, manan jayk’aqpas paytaqa rikurankuchu ima ch’aqwatapas jatarichiqta, chaymi paykunaqa niranku: “Manan yuyayninpichu kashan”, nispa (Marcos 3:21).

 Ichaqa manan chhaynachu karan. Mana chayqa, manachá Jesusqa chay supaypa junt’aykusqan runata qhaliyachinmanchu karan. Fariseokunawan kamachikuy simi yachachiqkunawanmi Jesustaqa yanqamanta tumpasharanku: “Kayqa supaykunata kamachiq Beelzebubpa atiyninwanmi supaykunata qarqon”, nispa (Mateo 12:24).

Chayta yachaspan Jesusqa niran: “Mayqen nacionpas [...] mayqen llaqtapas mayqen familiapas t’aqanasqa kaspaqa chinkapunmanmi. Chhaynaqa Satanaschus payllatataq qarqokunman chayqa, pay kikinmi t’aqanasqa kashanman, chhayna kaqtinqa, ¿imaynapitaq gobiernonri sayashallanman?”, nispa (Mateo 12:25, 26).

Wakin judiokunapas qarqoqkun supaykunataqa (Hechos 19:13). Chaymi Jesusqa chay umallikunata niran: “Noqachus Beelzebubpa atiyninwan supaykunata qarqoni chayqa, ¿piqpa atiyninwantaq qankunata qatikuq runakunari qarqonku? Chayraykun paykunaqa qankunata juzgasunkichis. Ichaqa Diospa espiritunwanchus supaykunata qarqoni chayqa, Diospa gobiernonmi qonqaylla qankunaman chayaramun”, nispa (Mateo 12:27, 28).

Chaymantataq Jesusqa Satanasta atipananpaq atiyniyoq kasqanta rikuchinanpaq niran: “¿Imaynapitaq pipas juj kallpasapa runaq wasinta jaykuspa kaqninkunata qechunman manaraq chay kallpasapa runata watashaspa? Wataruspañan wasintaqa ch’usaqyachipunman ¿riki? Pipas mana noqawanchu kashan chayqa, contraypin kashan, pipas mana noqawanchu juñuqqa ch’eqechishanmi”, nispa (Mateo 12:29, 30). Jesusta tumpaq umallikunaqa Satanaspa kamachinkunan karanku, chaymi Jesuspa contranpi kasharanku, payta mana qatikunankupaqmi runakunatapas ch’eqechisharanku.

Chaymi Jesusqa paykunata niran: “Runakunaq lliu ima ruwasqanpas perdonasqan kanqa [...]. Santo espirituta pisichaspa k’amiqmi ichaqa mana jayk’aqpas perdonasqachu kanqa”, nispa (Marcos 3:28, 29). Jesusqa Diospa espiritunwanmi milagrokunata ruwasharan, tumpaqninkunan ichaqa “Satanaspa atiyninwanmi ruwashan” niranku. ¡Sinchi mana allinmi chay nisqankuqa karan!