Kichay leenaykipaq

Índice nisqaman riy

 96 CAPÍTULO

Jesús riman juj qhapaq umalli waynawan

Jesús riman juj qhapaq umalli waynawan

MATEO 19:16-30 MARCOS 10:17-31 LUCAS 18:18-30

  • JUJ QHAPAQ WAYNA JESUSTA TAPUN WIÑAY KAUSAYMANTA

Perea ladonta Jerusalenman Jesús rishaqtinmi juj qhapaq wayna phawaylla jamuspa paypa ñaupanpi qonqorikuran, jinaspa niran: “Allin yachachikuq, ¿imatan ruwanay wiñay kausayta chaskinaypaq?”, nispa. Payqa “umalli runakunamanta jujninmi” karan, yaqapaschá sinagogapi umalli karan otaq jatun juntamanta jujnin umalli karan (Lucas 8:41; 18:18; 24:20).

Jesusmi niran: “¿Imaraykun ‘allin’ niwanki? Manan pipas allinqa kanchu, aswanpas Diosllan”, nispa (Lucas 18:19). Jesusqa allin yachachiqña karan chaypas, manan munaranchu “allin” ninataqa, imaynan religionpi umallikuna ruwaqku jinataqa. Paypaqqa Diosllan “allin” ninapaq jinaqa karan.

Jinaspan Jesusqa niran: “Kausaytachus chaskiyta munanki chayqa, kamachikuykunatan tukuy tiempo kasukunayki”, nispa. Paytaq niran: “¿Mayqen kamachikuykunata?”, nispa. Jinan Jesusqa yuyarichiran “aman pitapas wañuchinkichu, aman jujwan pantankichu, aman suwakunkichu, aman llullakuspa yanqamanta tumpankichu, tayta-mamaykitan respetanki, runamasiykitapas qan kikiykita jinan munakunki” niq kamachikuykunata (Mateo 19:17-19).

Chay waynataq niran: “Chaykunataqa llapantan junt’ashani, ¿imatawanraqtaq ruwanayri?”, nispa (Mateo 19:20). Paypa piensasqanman jinaqa imapas ancha allin ruwananraqmi faltashanman karan. Jesustaq yachaytapuni munasqanta rikuspa ‘munakuywan qhawaykuran’ (Marcos 10:21). Ichaqa juj mana allintan chay waynapi rikuran.

Chay waynaqa nishutan munakuq kaqninkunata, chaymi Jesusqa niran: “Kanraqmi juj ruwanayki: Phaway kaqniykikunata vendemuspa wajchakunaman qomuy, chhaynapin janaq pachapi qhapaq kayniyki kanqa; jinaspa qatikamuway”,  nispa. Paytaq Jesuspa chay nisqanwan llakikuran, sinchi llakisqataq ripuranpas askha kaqniyoq kasqanrayku. Kaqninkunaman nishuta k’askakusqanraykun mana repararanchu imas aswan importante karan chayta (Marcos 10:21, 22). Chaymi Jesusqa niran: “¡May sasapunin qolqesapakunapaqqa Diospa gobiernonman jaykuy kanqa!”, nispa (Lucas 18:24).

Jinaspa nillarantaq: “Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”, nispa. Discipulonkunataq chaywan admirakuspa niranku: “Chhaynaqa, ¿pillañataq salvasqari kanman?”, nispa. Jesustaq paykunata qhawaykuspa niran: “Runakunapaq mana atikuqqa atikuqmi Diospaqqa”, nispa (Lucas 18:25-27).

Jinan Pedroqa niran: “Noqaykuqa tukuy imata saqespaykun qatikamushaykiku, ¿imataq noqaykupaqri kanqa?”, nispa. Jesustaq paykunata niran: “Tukuy imapas mosoqyachisqa kanan tiempopin runaq Churinqa qhapaq trononpi tiyaykunqa, chaypin qankuna qatikamuwaqniykunapas, chunka iskayniyoq tiyanakunapi tiyaykullankichistaq, jinaspa Israelpa chunka iskayniyoq ayllunkunata juzgankichis”, nispa (Mateo 19:27, 28).

Jesusqa jamuq tiempopi kay pacha Edén huerta jina munay paraíso kapunanmantan rimasharan. Chay tiempopin Pedro juj discipulokunapiwan Jesuswan kuska kay pachata kamachimunqaku. ¡Imayna munayraqchá chay premioqa kanqa!

Ichaqa manan jamuq tiempollapichu bendicionkunaqa kanqa, chaymi Jesusqa niran: “Pipas wasintapas, esposantapas, wayqenkunatapas, tayta-mamantapas, wawankunatapas Diospa gobiernonrayku saqeqqa astawanraqmi kay tiempopi chaskinqa, jamuq tiempopitaq wiñay kausayta chaskinqa”, nispa (Lucas 18:29, 30).

Jesuspa discipulonkunaqa maypiña kashaspapas iñiqmasinkunawanmi kallpachanakunanku karan. Paykunapaqqa familiankumantapas aswan munasqan iñiqmasinkuqa kanan karan. Chay qhapaq waynan ichaqa chay bendicionta, Diospa gobiernonpi kanantawan pierdekusharan.

Chaymantan Jesusqa niran: “Askha ñaupaqpi kaqkunan qhepapi kanqaku, askha qhepapi kaqkunataq ñaupaqpi kanqaku”, nispa (Mateo 19:30).

Chay ‘ñaupaqpi kaqkuna’ ukhupin chay qhapaq waynaqa tarikuran judío religionpi umalli kasqanrayku. Payqa junt’asharantaq Diospa kamachikuyninkunata chayqa, Jesustan qatikunan karan, chhaynapi imaymana allin ruwaykunata ruwananpaq. Ichaqa qhapaq kaykunatan ñaupaqtaqa maskhasharan. Común runakunan ichaqa Jesuspa yachachikuyninkunata allinta jap’ikuranku. Chaymi ‘qhepapi kaqkuna’ ukhupiña karanku chaypas, ‘ñaupaqpi’ kananku karan, paykunan Jesuswan kuska tronokunapi tiyaykunanku karan kay pachata kamachimunankupaq.