Kichay leenaykipaq

Índice nisqaman riy

 20 CAPÍTULO

Caná llaqtapi wajmanta milagrota ruwan

Caná llaqtapi wajmanta milagrota ruwan

MARCOS 1:14, 15 LUCAS 4:14, 15 JUAN 4:43-54

  • JESÚS PREDICAN ‘DIOSPA GOBIERNONQA ÑAN QAYLLAYKAMUNÑA’ NISPA

  • JESÚS KARUPI KASHAQ WAYNACHATA QHALIYACHIN

Judea provinciapi askha killakuna yachachisqan qhepaman, Samariapipas iskay p’unchay kasqan qhepamanmi Jesusqa wiñasqan Galilea provinciata riran. Payqa manan samananpaqchu chaymanqa riran, aswanpas astawan predicananpaqmi. Ichaqa manan yacharanchu imaynatachus chaypi chaskinanku karan chayta. Paypa nisqan jina, “profetaqa kikin llaqtanpin mana respetasqachu” (Juan 4:44). Discipulonkunapas wasinkuman llank’anankuman iman kutipuranku.

Galilea provinciapin Jesusqa: ‘Diospa gobiernonqa ñan qayllaykamunña. Chayrayku juchaykichismanta pesapakuychis, allin willakuykunapitaq iñiychis’, nispa predicayta qallariran (Marcos 1:15). Chayta uyarispan askha runakuna Jesusta sumaqta chaskiranku. Chaymantapas wakinninkuqa Pascua fiestapi kashaspankun Jesusta rikusqaku askha milagrokuna ruwaqta (Juan 2:23).

Galileaman chayaspaqa Caná llaqtapin Jesusqa predicayta qallarinman karan, chaypin juj kutipipas unuta vinoman tukuchiran. Chay llaqtapi Jesús kashaqtinmi juj reyta serviq runaq wawan Capernaum llaqtapi sinchi onqosqa kasharan, wañuy patapiñan kasharanpas, chaymi chay runaqa Jesusta maskhaq riran, tarispataq rogakuran: “Señor, jaku, manaraq wawachay wañurapushaqtin qhaliyachimpuway”, nispa (Juan 4:49). Chay runaqa rey Herodes Antipaspa serviqninmi karan, chay reymi qhepaman bautizaq Juanpa umanta wit’uchiran.

Chay rogakuq runatan Jesusqa niran: “Phaway rillayña, wawaykiqa qhaliyapunñan”, nispa (Juan 4:50). Jinan chay runaqa kaq rato llaqtanman kutipuran. Ñanllapiraq kashaqtintaq serviqninkuna payta aypamuranku, jinaspa willaranku wawan qhaliña kashasqanta. Jinan payqa tapuran ima horastachus qhaliyapuran chayta.

Paykunataq niranku: “Qayna-unchaymi la unata jina fiebren chinkarapun”, nispa (Juan 4:52).

Chaywanmi chay runaqa yuyariran chay horasllatataq Jesuspas: “Wawaykiqa qhaliyapunñan”, nisqanta. Chaymi chay qhapaq runaqa wasinpi llapa kaqkunapiwan Jesuspa discipulonkuna kapuranku.

Caná llaqtapiqa iskay kutipin Jesusqa milagrota ruwaran, ñaupaqpin unuta vinoman tukuchiran, chaymantataq reyta serviq runaq wawanta qhaliyachiran 25 kilómetro jina karupi kashaqtin. Chaykama milagrokuna ruwasqankunamantaqa chay runaq wawanta qhaliyachisqanmi aswan importante karan. Chaywanmi Jesusqa rikuchiran Diospa ajllasqan profeta jina Galileaman kutishasqanta. Ichaqa, ¿respetarankuchu Jesusta kikin llaqtanpi?

¿Iman pasaran Nazaret llaqtanman Jesús chayaqtin?