Kichay leenaykipaq

Índice nisqaman riy

 4 CAPÍTULO

María manaraq casarakushaspa onqoq rijurin

María manaraq casarakushaspa onqoq rijurin

MATEO 1:18-25 LUCAS 1:56

  • MARÍA JOSEMAN WILLAN ONQOQ KASHASQANTA

  • JOSÉ MARIAWAN CASARAKAPUN

Yachasqanchis jina, Mariaqa kinsa killa jinan parienten Elisabet-ta wasinpi yanaparan Judea orqo-orqo ladopi. Chaymantan payqa Nazaret llaqtanman kutipuran tawa killanpi onqoq kashaspa. Chhaynaqa manchakusharanchá llapa runa wijsayoq kasqanta reparanankuta. ¡Maytachá chayqa payta llakichisharan!

Chaymantapas payqa José sutiyoq carpinterowanmi casarakunanpaq rimanasqa kasharan. Diospa kamachikuyninman jinaqa, pi warmipas casarakunanpaq rimaykusqa kashaspa jujwan pantanman chayqa, rumiwan ch’aqesqan wañuchisqa kanan karan (Deuteronomio 22:23, 24). Manaña María chay juchata ruwaranchu chaypas, tapukusharanchá: “Kunanri, ¿imaynatataq Joseman willasaq onqoq kashasqayta? ¿Iman chaymanta noqamanta kanqa?”, nispa.

Kinsa killamantataq María llaqtanman kutimpusharan chayqa, maytachá Joseqa paywan tupayta munasharan. Mariaqa allintachá Joseman willaran santo espirituq atiyninwan onqoq kashasqanta. Chaywanpas Joseqa manan creeranchu.

Paypaqqa juj qhariwanmi Mariaqa kamunman karan. Ichaqa sumaq sonqo warmi kasqanrayku, anchata munakusqanrayku iman mana munaranchu Mariata p’enqayman churayta, ni wañuchinankutapas. Chaymi pakallapi paymanta divorciakapuyta munasharan. Chay tiempopiqa casarakunankupaq rimaykusqa runakunataqa casarasqata jinañan qhawariqku, chaymi compromisonkuta p’akinankupaqqa divorciakunanku karan.

Chaykunapi José piensashaqtinmi Jehová  Diospa angelnin mosqoypi payman rijurispa niran: “José, ama manchakuychu Mariawan casarakuytaqa, payqa santo espirituq atiyninwanmi onqoq kashan. Juj qhari wawatan onqokunqa, chay wawatan ‘Jesús’ nispa sutichanki, paymi llaqtanta juchankumanta salvanqa”, nispa (Mateo 1:20, 21).

Chaymi payqa angelpa nisqanta kasukuspa Mariata wasinman aparan. Chaywanmi lliuman rikuchiranku casarasqaña kasqankuta. Ichaqa María onqoq kashanankamaqa manan Joseqa payta llamiykuranchu. Joseqa anchatachá Diosta agradecekuran angelninwan imachus willachisqanmanta.

Killakunaq pasasqanman jinan Mariaqa junt’a onqoqña kasharan. Chhayna kashaqtinmi Joseqa karu llaqtata Mariawan kuska viajanan karan. Qatiqninpin yachasunchis imaraykus viajanankupuni karan chayta.